प्रकाशितवाक्य 20 - Halbi

शयतान के 1000 साल काजे अन्दकुप खोदरा ने पकातोर

¹ फेर मय गोटक सरगदूत के सरग ले उतरतोर दकले, जेचो हाथ ने अन्दकुप खोदरा चो कुची आउर गोटक बड़े सिकरा रली।

² हुन-हुन बोड़ासाप, बल्लोने जुना सांप के जोन इबलीस आउर शयतान आय, धरून भाती हजार बरक चो काजे बान्दुन दिलो,

³ आउर हुनके अन्दकुप खोदरा ने डालुन भाती बन्द करलो आउर हुनचो उपरे मोहर लगाऊन दिलो कि हुन हजार बरक चो पुरा होओत ले जाति-जाति चो लोगमन के फेर नी भरमाओ। ऐचो पाचे जरूरी आय कि हुन थोड़े देर काजे फेर खोला जाओ।

मसीह चो संगे 1,000 बरक तक राज करतोर

⁴ फेर मय सिंघासन दकले, आउर हुन थाने लोग बसुन गेला, आउर हुनमन के नियाय करतोर अधिकार दिया गेली। मय हुनमन चो आत्मामन के बले दकले, जोनमन मुण्ड ईशु चो गोहई देतोर आउर माहापुरू चो बचन चो लागुन काटा जाऊ रवत, आउर जोनमन ना हुन पशु चो, आउर ना हुनचो मुरती चो पुजा करू रला, आउर हुनचो छाप आपलो कपार आउर हाथमन थाने धरून रवत। हुनमन जीव पडुन भाती मसीह चो संगे हजार बरक ले राज करते रवत।

⁵ जिदलदाय ले ऐ हजार बरक पुरा नी होली हुदलदाय ले बाकी मरलो बिता नी जीव उठला। ऐ तो पयला जीव उठतोर आय।

⁶ धन्य आउर पवितर हुन आय, जोन ऐ पयला जीव उठतोर चो भागी आय। असन लोगमन थाने दुसर मरना चो काई बल्ले अधिकार निआय, मान्तर हुनमन माहापुरू आउर मसीह चो याजक हो दे आउर हुनचो संगे हजार बरक तक राज कर दे।

शयतान चो बिनाश

⁷ जिदलदाय हजार बरक पुरा होऊन जाय दे तेबे शयतान कयद ले छांडुन दिया जाय दे।

⁸ हुन-हुन जातिमन के जोन धरतनी चो चारो बाटे हो दे, बल्लोने गोग आउर मागोग के जेचो गेनती समुन्द चो बारू चो बराबर होये दे, भरमाऊन भाती लड़ीई चो काजे रूंड़ा करूक लाय निकरदे।

⁹ हुनमन पुईतराय धरतनी थाने फयलुन भाती पवितर लोगमन चो छांवनी आउर लाड़रा नंगर के घेरदे; आउर आईग सरग ले उतरून भाती हुनमन के भसम करे दे।

¹⁰ हुनमन चो भरमातो बिता शयतान आईग आउर गन्धक चो हुन झील ने, जोन थाने हुन पशु आउर फंदी अगम गिआनी बले होये दे, डालुन दिया जाय दे; आउर हुनमन रात दिन जुग-जुग दुखा ने तड़प ते रदे।

पंडरा माहा सिंघासन आउर आखरी नियाय

¹¹ फेर मय गोटक बड़े पंडरी सिंघासन आउर हुनके, जोन हुन थाने बसलो से, दकले; हुनचो पुरे ले धरतनी आउर बादरी पराला, आउर हुनमन चो काजे जगा नी मिरली।

¹² फेर मय नानी बड़े सपाय मरलो बितामन के सिंघासन चो पुरे उबा होलोर दकले, आउर किताबमन खोला गेली; आउर फेर गोटक किताब खोला गेली, बल्लोने जीवना चो किताब; आउर जसन हुन किताबमन ने लिकलोर रली, असने ची हुनमन चो काममन चो अनुसार मरलो बितामन चो नियाय करा गेली।

¹³ समुन्द हुन मरलो बितामन के जोन हुन थाने रवत देऊन दिलो, आउर मरना आउर अधलोक ने हुन मरलो बितामन के जोन हुनमन थाने रवत देऊन दिलो; आउर हुनमन थानले हरकोनी चो काममन चो अनुसार हुनमन चो नियाय करा गेली।

¹⁴ मरना आउर अधलोक आईग चो झील ने डाला गेला। ऐ आईग चो झील दुसर मरना आय;

¹⁵ आउर जोन कोनी चो नाव जीवना चो किताब ने लिकलोर नी मिरली, हुन आईग चो झील ने डाला गेला।