प्रकाशितवाक्य 2 - Halbi

इफिसुस-मया नाहलो कलीसिया

¹ “इफिसुस चो कलीसिया चो दूत के ऐ लिक: ‘जोन सातो तारामन आपलो उजा हाथ ने धरून भाती आसे, आउर सोना चो सातो पटेरामन चो मंजी ने बुलु आय, हुन ऐ बलेसे’”

² “मय तुचो काम, आउर तुचो मसागत, आउर तुचो धीरज के जाने से; आउर ऐ बले कि तुय खराप लोगमन के दकुक नी सकीस; आउर जोन आपन खुद के पठालोबिता बोलु आत, आउर आत नाई, हुनमन के तुय परकुन भाती फंदी पावलीस।”

³ “तुय धीरज धरू आस, आउर मोचो नाव चो काजे दुख उठाते-उठाते थाकलीस नाई।”

⁴ “मान्तर मोके तुचो बिरूद ऐ बोलतोर आसे कि तुय आपलो पयले चो असन मया छांडुन दिली सीस।”

⁵ “ऐईकाजे सुरता कर कि तुय काहां ले घसरली सीस, आउर मन फिराव आउर पयले चो असन काम कर; अगर तुय मन नी फिरासे, तो मय तुचो लगे ऐऊन भाती तुचो पटेरा के हुनचो जगा ले गुचाऊन देयेंदे।”

⁶ “मान्तर हव, तुचो थाने ऐ गोठ तो आसे, कि तुय नीकुलईमन चो काममन ले घिनाऊ आस, जेचो ले मय बले घिनाऊ आंय।”

⁷ “जेचो कान आसे हुन सुनो कि आत्मा कलीसियामन ले काय बले से। जोन जय पावला, मय हुनके हुन जीवना चो रूकमन थानले जोन माहापुरू चो सरग लोक ने आसे, फल खाऊक देयेंदे।”

स्मुरना-कन्दरालो बिती कलीसिया

⁸ “स्मुरना चो कलीसिया चो दूत के ऐ लिक: जोन पयला आउर आखरी आय, जोन मरून रये आउर अदायं जीव होलो से, हुन ऐ बलेसे: कि”

⁹ “मय तुचो कलेश आउर दरिदरता के जाने (मान्तर तुय सवकार आस), आउर जोन लोग आपन खुद के यहूदी बोलु आत आउर आत नाई, मान्तर शयतान चो सभा आत, हुनमन चो निन्दा के बले जाने।”

¹⁰ “जोन दुक तुके झेलुक होयदे, हुनचो ले नी डर। कसनबल्लोने दका, शयतान तुमनमन ले कितलो के जयलघर ने डालतो थाने आसे बल्ले तुमी परका जाआ, आउर तुमके दस दिन ले कलेश उठाऊक पढ़ेदे। जीव देओत ले बिश्वासी रा, तेबे मय तुके जीवना चो मुकुट देयेंदे।”

¹¹ “जेचो कान आसे हुन सुना कि आत्मा कलीसियामन ले काय बलेसे। जोन जय पावला, हुनके दुसर मरना ले हानि नी पहुँचे।”

पिरगमुन-समजा-बुजा करलो बिती कलीसिया

¹² “पिरगमुन चो कलीसिया चो दूत के ऐ लिक: जेचो लगे दुयधारी आउर तेज तलवार आसे, हुन ऐ बलेसे: कि”

¹³ “मय ऐ जाने कि तुय हुता रऊ आस जोन थाने शयतान चो सिंघासन आसे; तुय मोचो नाव थाने थीर रऊ आस, आउर मोचो उपरे बिश्वास करतो ले हुन दिनमन ने बले पाटकुती नी गुचलीस जोनमन ने मोचो बिश्वास लायक गोहई अन्तिपास, तुमचो मंजी हुन जगा थाने घात करा गेलो जोन थाने शयतान रऊ आय।”

¹⁴ “मान्तर मोके तुचो बिरूद काई गोठमन बोलतोर आसे, कसनबल्लोने तुचो थाने कितलो असन आसोत, जोन बिलाम चो सिक्या के मानु आत, जोन बालाक के इस्राएलीमन चो पुरे ठोकरना चो कारन संगाऊक सिकालो कि हुनमन मुरतीमन थाने चेगालो बिती तीजमन खाओत आउर बेबीचार करोत।”

¹⁵ “असने ची तुचो थाने कितलो असन आसोत, जोन नीकुलईमन चो सिक्या के मानु आत।”

¹⁶ “आउर मन फिराव, नाहले मय तुचो लगे झटके ची ऐऊन भाती आपलो मुंह चो तलवार ले हुनमन चो संगे लड़ें दे।”

¹⁷ “जेचो कान आसे हुन सुना कि आत्मा कलीसियामन ले काय बले से। जोन जय पावला, हुनके मय गुपत मन्ना थानले देयेंदे, आउर हुनके गोटक पंडरा पकना बले देयेंदे; आउर हुन पकना थाने गोटक नाव लिकलोर होयदे, जोन के हुनके पावतो बिता के छांडुन आउर कोनी नी जाने।”

थुआथीरा-नसलो कलीसिया

¹⁸ “थुआथीरा चो कलीसिया चो दूत के ऐ लिक: माहापुरू चो बेटा जेचो आँईकमन आईग चो तरास चो असन, आउर जेचो पाँय बड़ीया पीतल चो असन आसे, हुन ऐ बलेसे”

¹⁹ “मय तुचो काममन, तुचो मया आउर बिश्वास आउर सेवा आउर धीरज, के जाने से आउर ऐ बले कि तुचो पाचे चो काम पयलामन ले बडुन भाती आय।”

²⁰ “मान्तर मोके तुचो बिरूद ऐ बोलतोर आय कि तुय हुन बायले लेकी इजेबेल के रऊक देऊ आस जोन आपन खुद के अगम गिआनीन बोलु आय, आउर मोचो दासमन के बेबीचार करतोर आउर मुरतीमन चो पुरे चेगालो बिती जातिमन खातोर सिकाऊन भाती भरमाऊ आय।”

²¹ “मय हुनके मन फिरातो काजे मवका दिले, मान्तर हुन आपलो बेबीचार ले मन फिराऊक नी चाहाये।”

²² “दक, मय हुनके रोग ओचना थाने डालेंसे; आउर जोन हुनचो संगे बेबीचार करू आत अगर हुनमन बले हुनचो असन काममन ले मन नी फिरादे तेबे मय हुनमन के बड़े कलेश ने डालेंदे।”

²³ “मय हुनचो पिलामन के मारून देयेंदे; तेबे सपाय कलीसियामन जानेदे कि देंह आउर मन चो परकतो बिता मय ची आंय, आउर मय तुमनमन ले हरकोनी के हुनचो काममन चो अनुसार पलटा देयदे।”

²⁴ “मान्तर तुमी थुआथीरा चो बाकी लोगमन ले, जितरो ऐ सिक्या के नी मानोत आउर हुन गोठमन के जोनमन के शयतान चो भेद गोठमन बोलु आत नी जानोत, ऐ बलेंसें कि मय तुमचो उपरे आउर बोज नी डालेंदे।”

²⁵ “मान्तर हव, जोन तुमचो लगे आसे हुनके मोचो ऐओत ले थामुन राहा।”

²⁶ “जोन जय पावला आउर मोचो काममन चो अनुसार आखरी ले करते रओ, मय हुनके जाति-जाति चो लोगमन उपरे अधिकार देयेंदे,”

²⁷ “आउर हुन लुआ चो राज बड़गी धरून भाती हुनमन उपरे राज करेदे, जोन परकार कुमार चो माटी चो हांडी कुन्डरी रनबन होऊन जाऊ आय: मय बले असने ची अधिकार आपलो बुआ ले पावले से।”

²⁸ “आउर मय हुनके बिहान चो तारा देयेंदे।”

²⁹ “जेचो कान आसे हुन सुनो कि आत्मा कलीसियामन ले काय बलेसे।”