प्रकाशितवाक्य 19 - Halbiसरग ने माहापुरू चो स्तुति 1 ऐचो पाचे मय सरग ने माना बड़े भीड़ के बड़े जोर ले ऐ बोलते सुनले, “हाल्लेलुय्याह! मुक्ति आउर महिमा आउर सामरत आमचो माहापुरू चो ची आय। 2 कसनबल्लोने हुनचो निरनय सत आउर ठीक आय। हुन-हुन बड़े बेश्या चो, जोन आपलो बेबीचार ले धरतनी के भ्रष्ट करते रली, नियाय करलो आउर हुनचो ले आपलो दासमन चो लऊ चो पलटा धरलो।” 3 फेर दुसरहार हुनमन बल्ला, “हाल्लेलुय्याह! हुनचो जरतोर कुमरा जुग-जुग उठते रये दे।” 4 तेबे चोबिसों सियानमन आउर चारो परानीमन घसरुन भाती माहापुरू के पाँय पढ़ला, जोन सिंघासन थाने बसुन रये, आउर बललो, “आमीन! हाल्लेलुय्याह!” 5 तेबे सिंघासन थानले गोटक शब्द निकरली, “हे आमचो माहापुरू ले सपाय डरतो बिता दासमन, काय नानी काय बड़े; तुमी सपाय हुनचो स्तुति करा।” 6 फेर मय बड़े भीड़ चो असन आउर खुबे पानी चो असन शब्द, आउर गरजन चो असन बड़े शब्द सुनले “हाल्लेलुय्याह! कसनबल्लोने परबु आमचो माहापुरू सर्वशक्तिमान राज करे से। 7 ईआ, आमी हरिक आउर उदुम होऊ, आउर हुनचो स्तुति करूं, कसनबल्लोने मेमना चो बिहा लगे अमरली से, आउर हुनचो दुली आपन खुद के तिआर करली से। 8 हुनके शुद्ध आउर चमकदार पातर मलमल पिन्दतोर अधिकार दिया गेली” कसनबल्लोने हुन पातर मलमल चो मतलब पवितर लोगमन चो धरम चो काम आय। 9 तेबे सरगदूत मोचो ले बल्लो, “ऐ लिक, कि धन्य हुनमन आत, जोन मेमना चो बिहा चो भोज ने हाग दिलोर आसोत।” फेर हुन मोचो ले बल्लो, “ऐ बचन माहापुरू चो सत बचन आय।” 10 तेबे मय हुनके पाँय पढ़तो काजे हुनचो पाँयमन थाने घसरुन पड़ले। हुन मोचो ले बल्लो, “दक, असन नी कर, मय तुचो आउर तुचो भाईमन चो संगवारी दास आय जोन ईशु चो गोहई देतो थाने थीर आसे। माहापुरू के ची पाँय पड़।” कसनबल्लोने ईशु चो गोहई अगम गोठ चो आत्मा आय। पंडरा घोड़ा उपरे चेगलो बिता 11 फेर मय सरग के उगाड़ी होलोर दकले, आउर दकें से कि गोटक पंडरा घोड़ा आसे; आउर हुन थाने गोटक चेगलो से, जोन बिश्वास लायक आउर सत बलाय जाऊ आय; आउर हुन धरम चो संगे नियाय आउर जुद करू आय। 12 हुनचो आँईकमन आईग चो तरास आय, आउर हुनचो मुण्ड थाने खुबे असन राज मुकुट आसे। हुनचो उपरे गोटक नाव लिकलोर आसे, जेके हुनके छांडुन आउर कोनी नी जानोत। 13 हुन लऊ छिंचलोर फटीई पिन्दलो से, आउर हुनचो नाव माहापुरू चो बचन आय। 14 सरग चो पलटन पंडरा घोड़ामन थाने चेगुन आउर पंडरा आउर शुद्ध मलमल पिन्दुन भाती हुनचो पाट-पाट आसोत। 15 जाति-जाति के मारतो काजे हुनचो मुंह ले गोटक चोखा तलवार निकरू आय। हुन लुआ चो राज बड़गी धरून भाती हुनमन उपरे राज करे दे, आउर सर्वशक्तिमान माहापुरू चो भयंकर रिस चो जलजलाहट चो मन्द चो खोदरा ने दाख लगडे़ दे। 16 हुनचो फटीई आउर जांघ थाने ऐ नाव लिकलोर आसे: “राजामन चो राजा आउर परबुमन चो परबु।” पशु आउर हुनचो सेना चो हारतोर 17 फेर मय गोटक सरगदूत के बेर थाने उबा होलोर दकले। हुन बड़े जोर ले हाग देऊन भाती बादरी चो मंजी ले उड़तो बिती सपाय चड़ीईमन ले बल्लो, “ईआ, माहापुरू चो बड़े भोज चो काजे रूंड़ा होऊन जाआ,” 18 “जेचो ले तुमी राजामन चो मास, आउर सरदारमन चो मास, आउर शक्तिमान मानेमन चो मास, आउर घोड़ामन चो आउर हुनचो चेगलो बितामन चो मास, आउर काय छुटछाड़ा काय दास, काय नानी काय बड़े, सपाय लोगमन चो मास खाआ।” 19 फेर मय हुन पशु, आउर धरतनी चो राजामन आउर हुनचो पलटनमन के हुन घोड़ा चो चेगलो आउर हुनचो सेना ले लड़तो काजे रूंड़ा दकले। 20 हुन पशु, आउर हुनचो संगे हुन फंदी अगम गिआनी धरा पड़लो जोन हुनचो पुरे असन चिना दकाऊ रलो जेचो दुवारा हुन हुनमन के भरमालो जोन थाने हुन पशु चो छाप रये आउर जोन हुनचो मुरती चो पुजा करते रवत। ऐ दुनो जीवता-जीवता हुन आईग चो झील ने, जोन गन्धक ले जरू आय डाला गेला। 21 बाकी लोग हुन घोड़ा चो चेगु चो तलवार ले, जोन हुनचो मुंह ले निकरते रली, मारून दिया गेला; आउर सपाय चड़ीई हुनमन चो मास ले संतुष्ट होऊन गेला। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation