प्रकाशितवाक्य 18 - Halbiबेबीलोन चो नाश 1 ऐचो पाचे मय गोटक सरगदूत के सरग ले उतरतोर दकले, जेके बड़े अधिकार मिरू रये; आउर धरतनी हुनचो तेज ले चमकुन उठली। 2 हुन बड़े जोर ले चिचयाऊन भाती बल्लो, “घसरलो बड़े बेबीलोन घसरलो से! हुन दुष्टआत्मामन चो निवास, आउर हरकोनी अशुद्ध आत्मा चो अड्डा, आउर हरकोनी अशुद्ध आउर घिन-घिना चड़ीई चो अड्डा होली। 3 कसनबल्लोने हुनचो बेबीचार चो भयंकर मन्द चो लागुन सपाय जातिमन घसरला से, आउर धरतनी चो राजामन हुनचो संगे बेबीचार करला से, आउर धरतनी चो बेबारी हुनचो सुक-सुबिदा चो खुबे आगर चो लागुन सवकार होला से।” 4 फेर मय सरग ले गोटक आउर शब्द सुनले, “हे मोचो लोगमन, हुन थानले निकरून ईआ कि तुमी हुनचो पापमन ने शामिल नी हुआ, आउर हुनचो बिपत्तिमन थानले कोनी तुमचो उपरे ऐऊन नी पड़ो। 5 कसनबल्लोने हुनचो पापमन चो कूड़ा सरग ले पहुँचुन गेली से, आउर हुनचो अधरम माहापुरू के सुरता ईली से। 6 जसन हुन तुमके दिलो से असने ची हुनके दिआस, आउर हुनचो काममन चो अनुसार हुनके दुय गुना पलटा दिआस; जोन बोटका ने हुन भरून देऊ रलो हुनी थाने हुनचो काजे दुय गुना भरून दिआस। 7 जितरो हुन आपलो बड़ाई करलो आउर सुक भोगलो हुतलीई हुनके दुका आउर दुक दिआस; कसनबल्लोने हुन आपलो मन ने बोलु आय, ‘मय रानी होऊन बस ले से रान्डी नाई; आउर दुक ने केबीई नी पडे़दें।’ 8 ऐई लागुन गोटक ची दिन ने हुनचो उपरे बिपत्तिमन ऐऊन पढ़े दे, बल्लोने मरना, आउर दुक, आउर अकाल; आउर हुन आईग ने भसम करा दिआ जाय दे, कसनबल्लोने हुनचो नियायी परबु माहापुरू शक्तिमान आय।” बेबीलोन काजे दुक 9 “धरतनी चो राजा जोनमन हुनचो संगे बेबीचार आउर सुक भोगला, जिदलदाय हुनचो जरतोर कुमरा दक दे, तेबे हुनचो काजे गागदे आउर छाती पेटदे।” 10 हुनचो दुख चो डर चो मारे हुनमन खुबे लापी उबा होऊन भाती बोल दे, “हे बड़े नंगर, बेबीलोन! ‘हे मजबूत नंगर, हाय! हाय! घड़ी भर ने ची तुके डण्ड मिरली से।’ 11 “धरतनी चो बेबारी हुनचो काजे गागदे आउर कलप दे, कसनबल्लोने अदायं कोनी हुनमन चो माल नी धरोत;” 12 बल्लोने सोना, चाँदी, रत्न, मोती, आउर मलमल, आउर बयंजनी फटीई, रेशमी, आउर लाल रंग चो फटीई, आउर हर परकार चो बास देतो बिती काट आउर हाथी दात चो हर परकार चो तीजमन, आउर बड़े मोल काट आउर पीतल आउर लुआ आउर संगमरमर चो सपाय बरन चो तीजमन, 13 आउर दालचीनी छाली, मसाला, धुप, इतर, लोबान, मन्द, तेल, मयदा, गऊँ, गाय-बैला, मेंडा-बकड़ीमन, घोड़ामन, रत आउर दास, आउर मानेमन चो परान। 14 अदायं तुचो मन भावतो बिती फल तुचो लगले जाते रओ, आउर सुआद बिती आउर सुख-सुबिदा चो तीजमन तुचो ले लापी होली से, आउर हुन फेर केबीई नी मिरे दे। 15 “ऐ तीजमन चो बेबारी जोन हुनचो दुवारा सवकार होऊन जाऊ रओत, हुनचो दुका चो डर चो मारे लापी उबा हो दे, आउर गागते आउर कलपते-कलपते बोल दे, 16 ‘हाय! हाय! ऐ बड़े नंगर जोन मलमल, आउर बैंगनी आउर लाल रंग चो फटीई पिन्दुन रये, आउर सोना आउर रत्नमन आउर मोतीमन ले सजुन रये; 17 घड़ी भर ने ची हुनचो असन भारी धन नष्ट होऊन गेली।’ हरकोनी घटवार आउर यातरी आउर घटवारी, आउर जितरो समुन्द ले कमाऊ आत, सपाय लापी उबा होला,” 18 “आउर हुनचो जरतोर कुमरा दकुन भाती हाग देऊन भाती बोल दे, ‘कोन बिती नंगर ऐ बड़े नंगर चो असन आय?’” 19 “आउर आपलो-आपलो मुण्डमन थाने धुरला पका दे, आउर गागुन-गागुन आउर कलपुन-कलपुन चिचयाऊन-चिचयाऊन भाती बोल दे, ‘हाय! हाय! ऐ बड़े नंगर जेचो सम्पत्ति चो दुवारा समुन्द चो सपाय जाहाज बितामन धनी होऊन जाऊ रवत, घड़ी भर ने ची उजरुन गेली।’ 20 हे सरग, आउर हे पवितर लोगमन, आउर पठालोबितामन, आउर अगम गिआनीमन, हुनचो उपरे हरिक करा, कसनबल्लोने माहापुरू नियाय करून हुनचो ले तुमचो पलटा धरलो से!” बेबीलोन चो बिनाश चो आखरी हाल 21 फेर गोटक बलवान सरगदूत बड़े जता चो पाट चो असन गोटक पकना उठालो, आउर ऐ बोलुन भाती समुन्द ने पकान दिलो, “बड़े नंगर बेबीलोन असने ची बड़े बल ले घसराया जाय दे, आउर फेर केबीई हुनचो पता नी चले दे। 22 बीणा बजातो बितामन आउर गीतगाऊमन आउर बांवसी बजातो बितामन, आउर तुरी फुकतो बितामन चो शब्द फेर केबीई तुचो थाने सुना नी देये दे; आउर कोनी उदम चो कोनी कारीगर बले फेर केबीई तुचो थाने नी मिर दे; आउर जता चो चलतोर शब्द फेर केबीई तुचो थाने सुना नी देये दे; 23 आउर दीया चो उजर फेर केबीई तुचो थाने नी बरे दे, आउर दुला आउर दुली चो शब्द फेर केबीई तुचो थाने सुना नी देये दे; कसनबल्लोने तुचो बेबारी धरतनी चो सियान रवत, आउर तुचो पांगनमन ने सपाय जातिमन भरमाया जाऊ रवत। 24 अगम गिआनीमन आउर पवितर लोगमन, आउर धरतनी थानो सपाय घात करलो बितामन चो लऊ हुनी थाने पाया गेली।” |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation