प्रकाशितवाक्य 17 - Halbi

बायले लेकी आउर लाल रंग चो पशु

¹ जोन सात सरग दूतमन चो लगे हुन सात बटकामन रये, हुनमन थानले गोटक ऐऊन भाती मचो ले ऐ बल्लो, “ऐ बाटे आव, मय तुके हुन बड़े बेश्या चो डण्ड दकायें दें, जोन खुबे असन पानी थाने बसली से,”

² जेचो संगे धरतनी चो राजामन बेबीचार करला; आउर धरतनी चो रतो बितामन हुनचो बेबीचार चो मन्द ले मतभुल होऊन जाऊ रवत।

³ तेबे हुन मोके आत्मा ने रान ने निलो, आउर मय लाल रंग चो पशु थाने, जोन निन्दा चो नावमन ले भरून रये आउर जेचो सात मुण्ड आउर दस सींग रये, गोटक बायले लेकी के बसलोर दकले।

⁴ ऐ बायले लेकी बयंजनी आउर लाल रंग चो फटीई पिन्दुन रली, आउर सोना आउर बड़े मोल मणिमन आउर मोतीमन ले सजाय होऊ रली, आउर हुनचो हाथ ने गोटक सोना चो बोटका रये जोन घिन-घिना तीजमन ले आउर हुनचो बेबीचार चो अशुद्ध तीजमन ले भरून रये।

⁵ हुनचो कपार थाने ऐ नाव लिकलोर रये, “भेद बड़े बेबीलोन धरतनी चो बेश्यामन आउर घिन-घिना तीजमन चो आया।”

⁶ मय हुन बायले लेकी के पवितर लोगमन चो लऊ आउर ईशु चो गोहईमन चो लऊ पिवलोर मातलोर दकले; हुनके दकुन भाती मय चकित होऊन गेले।

बायले लेकी आउर पशु चो अरत

⁷ तेबे हुन सरगदूत मोचो ले बल्लो, “तुय केंव चकित होलीस? मय ऐ बायले लेकी आउर हुन पशु चो, जेचो उपरे हुन चेगलो से आउर जेचो सात मुण्ड आउर दस सींग आसे, तुके भेद सांगे दे।”

⁸ जोन पशु तुय दकली सीस हुन पयले तो रये मान्तर अदायं निआय, आउर अन्दकुप खोदरा ले निकरून भाती बिनाश ने पढ़े दे; आउर धरतनी चो रतो बितामन जेचो नाव जगत चो उपजास चो समया ले जीवन चो किताब ने लिका नी गेली, ऐ पशु चो ऐ दसा दकुन भाती कि पयले रये आउर अदायं निआय आउर फेर ऐये दे, घबरादे।

⁹ हुन अकल चो काजे जोन थाने गिआन आसे, ऐई मवका आय: हुन सातो मुण्ड सात डोंगरी आत जोन थाने हुन बायले लेकी बसली से।

¹⁰ हुन सात राजा बले आत, पांच तो होऊन चुकला से, आउर गोटक ऐबे आसे, आउर गोटक ऐबे ले ईलो से नाजुन, आउर जिदलदाय ऐये दे तो खिन्डिक समया ले हुनचो रतोर बले जरूरी आय।

¹¹ जोन पशु पयले रये, आउर अदायं निआय, हुन खुद आंटवा आय आउर हुन सातो झान थाने ले उपजास होली, आउर बिनाश ने पढ़े दे।

¹² जोन दस सींग तुय दकलीस हुनमन दस राजा आत जोनमन ऐबे ले राज नी पावला, मान्तर हुन पशु चो संगे घड़ी भर चो काजे राजामन चो असन अधिकार पावदे।

¹³ ऐ सपाय गोटक मन हो दे, आउर हुनमन आपलो-आपलो सामरत आउर अधिकार हुन पशु के देदे।

मेमना काजे जय

¹⁴ “हुनमन मेमना संगे लड़ दे, आउर मेमना हुनमन उपरे जय पाये दे, कसनबल्लोने हुन परबुमन चो परबु आउर राजामन चो राजा आय, आउर जोन हाग दिलोर आउर चुनलो आउर बिश्वासी आत हुनमन हुनचो संगे आसोत; हुनमन बले जय पावदे।”

¹⁵ फेर हुन मोचो ले बल्लो, “जोन पानी तुय दकलीस, जोन थाने बेश्या बसली से, हुनमन तो लोग आउर भीड़ आउर जातिमन आउर भाषामन आत।”

¹⁶ जोन दस सींग तुय दकलीस, हुनमन आउर पशु हुन बेश्या ले बईर संगा दे, आउर हुनके ओसाहारा आउर बिन फटीई करून देदे, आउर हुनचो मास खाऊन जादे, आउर हुनके आईग ने जराऊन देदे।

¹⁷ कसनबल्लोने माहापुरू हुनमन चो मन ने ऐ डाले दे कि हुनमन हुनचो इच्छा पुरा करोत, आउर जिदलदाय ले माहापुरू चो बचन पुरा नी होये हुदलदाय ले गोटक मन होऊन भाती आपलो-आपलो राज पशु के देउन दे ओत।

¹⁸ “हुन बायले लेकी, जेके तुय दकली सीस, हुन बड़े नंगर आय जोन धरतनी चो राजामन थाने राज करू आय।”