प्रकाशितवाक्य 16 - Halbiपयला बटका 1 फेर मय मंदिर ने काकीई बड़े जोर ले हुन सातो सरग दूतमन ले ऐ बोलतोर सुनलो, “जाआ माहापुरू चो रीस चो सातो बटकामन के धरतनी थाने रिकाऊन दिआस।” 2 आउर पयला सरगदूत जाऊन भाती आपलो बटका धरतनी थाने रिकाऊन दिलो। तेबे हुन मानेमन चो, जोनमन थाने पशु चो छाप रये आउर जोन हुनचो मुरती चो पुजा करते रवत, गोटक परकार चो खराप आउर दुक देतो बिती पोका निकरली। दुसरा बटका 3 दुसर सरगदूत आपलो बटका समुन्द थाने रिकाऊन दिलो, आउर हुन मरलो बिता माने चो लऊ असन बनुन गेली, आउर समुन्द थानो हरकोनी जीवधारी मरून गेला। तीसरा बटका 4 तीसर सरगदूत आपलो बटका लंदीमन आउर पानी चो सतानमन थाने रिकाऊन दिलो, आउर हुन लऊ बनुन गेली। 5 तेबे मय पानी चो सरगदूत के ऐ बोलतोर सुनले, “हे पवितर, जोन आय जोन रये, तुय नियायी आस आउर तुय ऐ नियाय करलीस। 6 कसनबल्लोने हुनमन पवितर लोगमन आउर अगम गिआनीमन चो लऊ बोहड़ाऊन रवत, आउर तुय हुनमन के लऊ पिआलीस; कसनबल्लोने हुनमन ऐई लायक आत।” 7 फेर मय बेदी ले ऐ शब्द सुनले, “हव, हे सर्वशक्तिमान परबु माहापुरू तुचो निरनय ठीक आउर सत आय।” चवथा बटका 8 चवथा सरगदूत आपलो बटका बेर थाने रिकाऊन दिलो, आउर हुनके मानेमन के आईग ले झुलसान देतोर अधिकार दिया गेली। 9 माने बड़े तोपा ले झुलसुन गेला, आउर माहापुरू चो नाव चो जेके ऐ बिपत्तिमन थाने अधिकार आसे, निन्दा करला मान्तर हुनचो महिमा करतो काजे मन नी फिरला। पांचवां बटका 10 पांचवां सरगदूत आपलो बटका हुन पशु चो सिंघासन थाने रिकाऊन दिलो, आउर हुनचो राज थाने अंधार छाऊन गेली। लोग दुखा चो मारे आपलो-आपलो जीब चाबुक मुरयाला, 11 आउर आपलो दुकामन आउर पोकामन चो लागुन सरग चो माहापुरू चो निन्दा करला; मान्तर आपलो-आपलो काममन ले मन नी फिराला। छठवां बटका 12 छठवां सरगदूत आपलो बटका बड़े लंदी फरात थाने रिकाऊन दिलो, आउर हुनचो पानी सुकुन गेली कि पूरब दिशा चो राजामन चो काजे बाट तिआर होऊन जाओं। 13 फेर मय हुन बोड़ासाप चो मुंह ले, आउर हुन पशु चो मुंह ले, आउर हुन फंदी अगम गिआनी चो मुंह ले तीन अशुद्ध आत्मामन के मेंढ़कामन चो रूप ने निकरतोर दकले। 14 ऐ चिना दकातो बिती दुष्टआत्मामन आत, जोन पुईतराय संवसार चो राजामन चो लगे निकरून भाती ऐईकाजे जाऊ आय कि हुनमन के सर्वशक्तिमान माहापुरू चो हुन बड़े दिन चो लड़ीई चो काजे रूंड़ा करो 15 “दक, मय चोर चो असन ऐऊ आय; धन्य हुन आय जोन चेता रऊ आय, आउर आपलो फटीई चो राका करू आय कि बिन फटीई नी फिरो, आउर लोग हुनचो ढुमढ़ापन नी दकोत।” 16 आउर हुनमन राजामन के हुन जगा रूंड़ा करला जोन इब्रानी ने हर-मगिदोन बोला जाऊ आय। सातवां बटका 17 सातवां सरगदूत आपलो बटका लेहरा थाने रिकाऊन दिलो, आउर मंदिर चो सिंघासन ले ऐ बड़े शब्द होली, “होऊन चुकली!” 18 फेर बिजलीमन बरली, आउर शब्द आउर गरजन होली, आउर गोटक असन बड़े भूकम ईली कि जिदलदाय ले माने चो उपजास धरतनी थाने होली, तेबे ले असन बड़े भूकम केबीई नी ऐऊ रली। 19 ऐचो ले हुन बड़े नंगर चो तीन गोंदा होऊन गेली, आउर जाति-जाति चो नंगर घसरुन पढ़ली; आउर बड़े बेबीलोन चो सुरता माहापुरू चो थाने होली कि हुन आपलो रीस चो चिड़चिड़ा चो मन्द हुनके पिआओ। 20 आउर हरकोनी ढ़िपका आपलो जगा ले हलुन गेली, आउर डोंगरीमन चो पता नी चलली। 21 बादरी ले मानेमन चो उपरे मन-मन भर चो बड़े गोला घसरली, आउर ऐईकाजे कि ऐ बिपत्ति खुबे ची भारी रली, लोगमन गोलामन चो बिपत्ति चो लागुन माहापुरू चो निन्दा करला। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation