प्रकाशितवाक्य 15 - Halbiरीस ले भरलोर सात सोना चो बटकामन 1 फेर मय सरग ने गोटक आउर बड़े आउर भयंकर चिना दकले, बल्लोने सात सरगदूत जेचो लगे सातो आखरी बिपत्तिमन रये, कसनबल्लोने हुनमन चो आखरी होऊन जातो के माहापुरू चो रीस चो आखरी होली। 2 तेबे मय आईग मिललो बिती कांच चो असन गोटक समुन्द दकले; आउर जोन लोग हुन पशु थाने आउर हुनचो मुरती थाने आउर हुनचो नाव चो नम्बर थाने जयवन्त होऊ रवत, हुनमन के हुन कांच चो समुन्द चो लगे माहापुरू चो बीणामन के धरून भाती उबा दकले। 3 हुनमन माहापुरू चो दास मूसा चो गीत, आउर मेमना चो गीत गाऊन-गाऊन भाती बोलते रवत, “हे सर्वशक्तिमान परबु माहापुरू, तुचो काम माहान आउर भयंकर आय; हे जुग-जुग चो राजा, तुचो चाल ठीक आउर सत आय।” 4 “हे परबु, कोन तुचो ले नी डरे दे आउर तुचो नाव चो महिमा नी कर दे? कसनबल्लोने मात्र तुय ची पवितर आस। पुईतराय जातिमन ऐऊन भाती तुचो पुरे पाँय पड़दे, कसनबल्लोने तुचो नियाय चो काम परकट होऊन गेली से।” 5 ऐचो पाचे मय दकले कि सरग ने गोहई चो तम्बू चो मंदिर खोला गेली; 6 आउर हुनमन सातो सरगदूत जेचो लगे सातो बिपत्तिमन रये, मल-मल चो शुद्ध आउर चमकदार फटीई पिन्दुन आउर छाती थाने सोना चो पट्टामन बान्दुन भाती मंदिर ले निकरला। 7 तेबे हुन चारो परानीमन थानले गोटक हुन सात सरग दूतमन के माहापुरू, जोन जुग-जुग जीव आसे, रीस ले भरलो बिती सोना चो सात बटकामन दिला; 8 आउर माहापुरू चो महिमा आउर हुनचो सामरत चो लागुन मंदिर कुमरा ले भरून गेली, आउर जिदलदाय ले हुन सातो सरग दूतमन चो सातो बिपत्तिमन आखरी नी होली हुदलदाय ले कोनी मंदिर ने नी जाऊक सकला। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation