प्रकाशितवाक्य 14 - Halbi

मेमना आउर 1, 44,000 लोग

¹ फेर मय नंजरा ले, आउर दका, हुन मेमना सिय्योन डोंगरी थाने उबा आसे, आउर हुनचो संगे एक लाख चवालीस हजार झन आसोत, जेचो कपार थाने हुनचो आउर हुनचो बुआ चो नाव लिकलोर आसे।

² आउर सरग ले मोके गोटक असन शब्द सुना दिली जोन पानी चो खुबे धारमन आउर बड़े गरजन चो असन शब्द रये, आउर जोन शब्द मय सुनले हुन असन रये माना बीणा बजातो बितामन बीणा बजाय सोत।

³ हुनमन सिंघासन चो पुरे आउर चारो परानीमन आउर सियानमन चो पुरे गोटक नवा गीत गावते रवत। हुनमन एक लाख चवालीस हजार जनमन के छांडुन, जोन धरतनी थानले घेना जाऊ रवत, कोनी हुन गीत नी सिकुक सकते रवत।

⁴ ऐ हुनमन आत जोन बायले लेकीमन चो संगे अशुद्ध नी होला, मान्तर कुंआरा आसोत; ऐ हुनीमन आत कि जोन कोनी थाने मेमना जाऊ आय, हुनमन हुनचो पाटे होऊ आत; ऐ तो माहापुरू चो लागुन पयला फल होतो काजे मानेमन थानले घेना गेला से।

⁵ हुनमन चो मुंह ले केबीई फंद नी निकरू रये, हुनमन बेकसूर आत।

तीन सरग दूतमन चो सांगतोर

⁶ फेर मय गोटक आउर सरगदूत के बादरी चो मंजी ने उड़तोर दकले, जेचो लगे धरतनी थानचो रतो बितामन चो हरकोनी जाति, आउर कुल, आउर भाषा, आउर लोगमन के सुनातो काजे जुग-जुग नगतखबर रये।

⁷ हुन बड़े शब्द ले बल्लो, “माहापुरू ले डरा, आउर हुनचो महिमा करा, कसनबल्लोने हुनचो नियाय करतोर समया ऐऊन पहुँचली से; आउर हुनचो आराधना करा, जोन सरग आउर धरतनी आउर समुन्द आउर पानी चो सतान बनाला।”

⁸ फेर ऐचो पाचे गोटक आउर, दुसर, सरगदूत ऐ बलते ईलो, “घसरलो, हुन बड़े बेबीलोन घसरलो, जोन आपलो बेबीचार चो कोपमय मन्द सपाय जातिमन के पिआलो से।”

⁹ फेर ऐचो पाचे गोटक आउर, तीसर, सरगदूत बड़े जोर ले ऐ बोलते-बोलते ईलो, “जोन कोनी हुन पशु आउर हुनचो मुरती चो पुजा कर दे, आउर आपलो कपार नाहले आपलो हाथ थाने हुनचो छाप धरो”

¹⁰ हुन माहापुरू चो परकोप चो निरवा मन्द, जोन हुनचो रीस चो बोटका ने रकाय गेली से, पिये दे आउर पवितर सरग दूतमन चो पुरे आउर मेमना चो पुरे आईग आउर गन्धक चो दुखा ने पड़े दे।

¹¹ “हुनमन चो दुखा चो कुमरा जुग-जुग उठते रये दे, आउर जोन हुन पशु आउर हुनचो मुरती चो पुजा करू आत, आउर जोन हुनचो नाव चो छाप धरू आत, हुनमन के रात दिन असतीर नी मिरे दे।”

¹² पवितर लोगमन चो धीरज ऐई थाने आसे, जोन माहापुरू चो हुकुममन के मानु आत आउर ईशु उपरे बिश्वास संगाऊ आत।

¹³ फेर मय सरग ले ऐ शब्द सुनले, “लिक: जोन मरू परबु ने मरू आत, हुनमन आजी ले धन्य आत।” आत्मा बले से, “हव, कसनबल्लोने हुनमन आपलो सपाय मसागत ले अराम पावदे, आउर हुनमन चो काम हुनमन चो संगे होऊ आत।”

धरतनी चो फसल चो कटीई

¹⁴ मय नंजरा ले, आउर दका, गोटक उजर बादरी आसे, आउर हुन बादरी थाने माने चो बेटा असन कोनी बसलो से, जेचो मुण्ड थाने सोना चो मुकुट आउर हाथ ने चोखा हिरा आसे।

¹⁵ फेर गोटक आउर सरगदूत मंदिर थानले निकरून भाती हुनचो ले, जोन बादरी थाने बसुन रये, बड़े जोर ले हाग देऊन भाती बल्लो, “आपलो हिरा लगाऊन भाती काट, कसनबल्लोने काटतोर समया ऐऊन पहुँचली से, ऐईकाजे कि धरतनी चो खेती पाकुन चुकली से।”

¹⁶ आउर जोन बादरी थाने बसुन रये हुन धरतनी थाने आपलो हिरा लगालो, आउर धरतनी चो कटीई करा गेली।

¹⁷ फेर गोटक आउर सरगदूत हुन मंदिर थानले निकरलो जोन सरग ने आसे, आउर हुनचो लगे बले चोखा हिरा रये।

¹⁸ फेर गोटक आउर सरगदूत, जेके आईग थाने अधिकार रये, हुन बेदी थानले निकरलो, आउर जेचो लगे चोखा हिरा रये हुनचो ले ऊँचा जोर ले बल्लो, “आपलो चोखा हिरा लगाऊन भाती धरतनी थानो अंगुर खेंदामन चो झोपा काटून धर, कसनबल्लोने हुनचो दाख पाकली से।”

¹⁹ तेबे हुन सरगदूत धरतनी थाने आपलो हिरा लगालो आउर धरतनी चो अंगुर खेंदामन चो फर काटून भाती आपलो माहापुरू चो परकोप चो बड़े रसकुण्ड ने डालुन दिलो;

²⁰ आउर नंगर चो बाहरे हुन रसकुण्ड ने दाख लगड़ाय गेली, आउर रसकुण्ड थानले इतलो लऊ निकरली कि घोड़ामन चो लगाममन ले पहुँचली, आउर सव कोस तक बोहडून गेली।