प्रकाशितवाक्य 13 - Halbiसमुन्द थानले निकरला दुय ठान पशु 1 तेबे मय गोटक पशु के समुन्द थानले निकरतोर दकले, जेचो दस सींग आउर सात मुण्ड रये। हुनचो सींगमन थाने दस राज मुकुट, आउर हुनचो मुण्डमन थाने माहापुरू चो निन्दा चो नाव लिकलोर रये। 2 जोन पशु मय दकले हुन डुरकी चो समान रये; आउर हुनचो पाँय भालु चो असन, आउर मुंह डुरका चो असन रये। हुन बोड़ासाप आपलो सामरत आउर आपलो सिंघासन आउर बड़े अधिकार हुनके देउन दिलो। 3 मय हुनचो मुण्डमन थानले गोटक थाने असन भारी घाव होलोर दकले माना हुन मरतो थाने आसे, फेर हुनचो परान घातक घाव अच्छा होऊन गेली, आउर सपाय धरतनी चो लोग हुन पशु चो पाट-पाट भक्यान भाती गेला। 4 लोगमन बोड़ासाप चो पुजा करला, कसनबल्लोने हुन पशु के आपलो अधिकार देउन रये, आउर ऐ बोलुन भाती पशु चो पुजा करला, “ऐ पशु चो असन कोन आय? कोन ऐचो ले लडुक सके?” 5 बड़े गोठ बोलतोर आउर निन्दा करतोर काजे हुनके गोटक मुंह दिया गेली, आउर हुनके बियालीस मयना ले काम करतोर अधिकार दिया गेली। 6 हुन माहापुरू चो निन्दा करतो काजे मुंह खोललो कि हुनचो नाव आउर हुनचो तम्बू बल्लोने सरग चो रतो लोगमन चो निन्दा करो। 7 हुनके ऐ बले अधिकार दिया गेली कि पवितर लोगमन ले लड़ो आउर हुनमन उपरे जय पाओ, आउर हुनके हरकोनी कुल आउर लोग आउर भाषा आउर जाति थाने अधिकार दिआ गेली। 8 धरतनी चो हुन सपाय रतो बितामन, जोनमन चो नाव हुन मेमना चो जीवना चो किताब ने लिका नी गेली जोन जगत चो उपजास चो समया ले घात होलो से हुन पशु चो पुजा कर दे। 9 जेचो कान आसे हुन सुनो। 10 जेके कयद ने पड़तोर आय हुन कयद ने पड़े दे; जोन तलवार ले मारे दे, जरूरी आय कि हुन तलवार ले मारा जाय दे। पवितर लोगमन चो धीरज आउर बिश्वास ऐई थाने आसे। धरतनी थानले निकरलो पशु 11 फेर मय गोटक आउर पशु के धरतनी थानले निकरतोर दकले, हुनचो मेमना चो असन दुय सींग रये, आउर हुन बोड़ासाप चो असन बोलते रये। 12 हुन-हुन पयला पशु चो पुईतराय अधिकार हुनचो पुरे काम ने आनते रलो; आउर धरतनी आउर हुनचो रतो बितामन ले हुन पयला पशु चो, जेचो परान घातक घाव अच्छा होऊन जाऊ रये, पुजा कराते रये। 13 हुन बड़े-बड़े चिना दकाते रये, ऐथा ले कि मानेमन चो पुरे सरग ले धरतनी थाने आईग बरसाऊन देते रये। 14 हुन चिनामन चो लागुन, जोनमन के हुन पशु चो पुरे दकातोर अधिकार हुनके दिया जाऊ रली, हुन धरतनी चो रतो लोगमन के भरमाते रये आउर धरतनी चो रतो बितामन ले बोलते रये कि जोन पशु चो तलवार पाऊ रये हुन जीवलो से, हुनचो मुरती बनाहा। 15 हुनके हुन पशु चो मुरती ने परान भरतोर अधिकार दिया गेली कि पशु चो मुरती बोलुक मुरयाओ, आउर जितरो लोग हुन पशु चो मुरती के पुजा नी करोत हुनमन के मराऊन देओ। 16 हुन नानी बड़े, धनी कंगाल, छुटछाड़ा दास सपाय चो उजा हाथ नाहले हुनमन चो कपार थाने गोटक-गोटक छाप कराऊन दिलो, 17 कि हुनके छांडुन जोन थाने छाप बल्लोने हुन पशु चो नाव नाहले हुनचो नाव चो नम्बर होओ, दुसर कोनी लेन-देन नी करूक सकोत। 18 गिआन ऐई थाने आसे जेके अकल आसे हुन ऐ पशु चो नम्बर जोड़ो, कसनबल्लोने हुन माने चो नम्बर आय, आउर हुनचो नम्बर छय सव छिंयासठ आय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation