प्रकाशितवाक्य 12 - Halbiबायले लेकी आउर बड़े देंह बिती बोड़ासाप 1 फेर सरग ने गोटक बड़े चिना दका दिली, बल्लोने गोटक बायले लेकी जोन बेर ओढ़ी होऊन रली, आउर जोन हुनचो पाँय खाले रये, आउर हुनचो मुण्ड थाने बारा तारामन चो मुकुट रये। 2 हुन देंहबारी होली, आउर चिचयाते रली, कसनबल्लोने जनमातोर दुका ने रली। 3 गोटक आउर चिना सरग ने दका दिली; आउर दका, गोटक बड़े लाल बोड़ासाप रये, जेचो सात ठान मुण्ड आउर दस ठान सींग रये, आउर हुनचो मुण्डमन थाने सात ठान राजा चो मुकुट रये। 4 हुनचो लेंगड़ी ने बादरी चो तारामन चो गोटक भाग के झिकुन भाती धरतनी थाने ढ़ारुन दिलो। हुन बोड़ासाप हुन बायले लेकी चो पुरे जोन जनमाते रली, उबा होलो कि जिदलदाय हुन पिला जनमो तेबे हुन पिला के गिरुन जाओ। 5 हुन पिला जनमाली जोन लुआ चो राज बड़गी धरून भाती सपाय जातिमन उपरे राज करतो थाने रलो, आउर हुन पिला उधापड़े माहापुरू चो लगे आउर हुनचो सिंघासन चो लगे उठाऊन भाती पहुँचाऊन दिया गेली; 6 आउर हुन बायले लेकी हुन रान ने पराली जोन थाने माहापुरू चो बाटले हुनचो काजे गोटक जगा तिआर करा जाऊ रली कि हुता हुन एक हजार दुय सव साठ दिन ले पोसा जाओ। बोड़ासाप सरग ले बाहरे पोकाया गेली 7 फेर सरग ने लड़ीई होली, मीकाईल आउर हुनचो सरगदूत बोड़ासांप ले लडुक निकरला; आउर बोड़ासाप आउर हुनचो दूत हुनमन ले लड़ला, 8 मान्तर जितुक नी होला, आउर सरग ने हुनमन चो काजे फेर जगा नी रली। 9 तेबे हुन बड़े बोड़ासाप, बल्लोने हुनी जुना सांप जोन इबलीस आउर शयतान बोला जाऊ आय आउर पुईतराय संवसार चो भरमातो बिता आय, धरतनी थाने घसराऊन दिया गेलो, आउर हुनचो दूत हुनचो संगे घसराऊन दिया गेला। 10 फेर मय सरग ले ऐ बड़े शब्द ऐतोर सुनले, “अदायं आमचो माहापुरू चो मुक्ति आउर सामरत आउर राज आउर हुनचो मसीह चो अधिकार परकट होलीसे, कसनबल्लोने आमचो भाईमन उपरे दोष लगातो बिता, जोन रात दिन आमचो माहापुरू चो पुरे हुनमन उपरे दोष लगाया करते रलो, घसराऊन दिया गेलोसे। 11 “हुनमन मेमना चो लऊ चो लागुन आउर आपलो गोहई चो बचन चो लागुन हुनचो उपरे जयवन्त होला, आउर हुनमन आपलो जीवमन के लाड़ नी जानला, ऐथाले कि मरना बले सहला।” 12 “ऐई लागुन हे सरगमन आउर हुन थाने रतो बितामन, उदुम हुआ; हे धरतनी, आउर समुन्द, तुमचो उपरे हाय! कसनबल्लोने शयतान बड़े रिस चो संगे तुमचो लगे उतरून ईलोसे, कसनबल्लोने जाने कि हुनचो खिन्डिक ची समया आउर बाकी आसे।” बायले लेकी कन्दराया गेली 13 जिदलदाय बोड़ासाप दकलो कि मय धरतनी थाने घसराऊन दिया गेलेसे, तेबे हुन बायले लेकी के जोन पिला जनमाऊ रली, कन्दरालो। 14 मान्तर हुन बायले लेकी के बड़े उकाब चो दुय पाकटी दिया गेली कि सांप चो पुरे ले उडुन भाती रान ने हुन जगा पोंहचुन जाओ, जोन थाने हुन गोटक समया आउर समयामन, आउर आधा समया ले पोसा जाओ। 15 आउर सांप हुन बायले लेकी चो पाटे आपलो मुंह ले लंदी चो असन पानी बोहड़ालो कि हुनके ऐ लंदी ले बोहड़ाऊन देओ। 16 मान्तर धरतनी हुन बायले लेकी चो सायता करली, आउर आपलो मुंह खोलुन भाती हुन लंदी के जोन बोड़ासाप आपलो मुंह ले बोहड़ाऊन रये पिवली। 17 तेबे बोड़ासाप बायले लेकी उपरे रीस होलो, आउर हुनचो बाकी पिलामन ले, जोन माहापुरू चो हुकुममन के मानतोर आउर ईशु चो गोहई देतोर थाने थीर आसोत, लडुक लाय गेलो। 18 आउर हुन समुन्द चो बारू उपरे जाऊन उबा होलो। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation