प्रकाशितवाक्य 10 - Halbi

सरगदूत आउर नानी किताब

¹ फेर मय गोटक आउर शक्तिशाली सरगदूत के बादरी ओड़ी होऊन सरग ले उतरतोर दकले। हुनचो मुण्ड थाने मेंगधनु रये। हुनचो मुंह बेर चो असन आउर हुनचो पाँय आईग चो खुटा असन रये।

² हुनचो हाथ ने गोटक नानी असन खोललो बिती किताब रली। हुन आपलो उजा पाँय समुन्द थाने आउर डेबरी धरतनी थाने संगालो,

³ आउर असन जोर ले चिचयालो, जसन डुरका गरजु आय; आउर जिदलदाय हुन चिचयालो तेबे गरजन चो संगे शब्द सुना दिली।

⁴ जिदलदाय सातो गरजन चो शब्द सुना दिली, तेबे मय लिकतो थाने रये, मान्तर मय सरग ले ऐ शब्द सुनले, “जोन गोठमन गरजन चो हुन सात शब्दमन ले सुनली सीस हुनमन के गुपत ने संगाव, आउर नी लिक।”

⁵ जोन सरगदूत के मय समुन्द आउर धरतनी थाने उबा दकुन रये, हुन आपलो उजा हाथ सरग चो बाटे उठालो,

⁶ आउर जोन जुग-जुग जीव आसे, आउर जोन सरग के आउर जोन काई हुन थाने आसे, आउर धरतनी के आउर जोन काई हुन थाने आसे, आउर समुन्द के आउर जोन काई हुन थाने आसे बनालो, हुनचेई किरिया खाऊन भाती बल्लो, “अदायं तो आउर बेर नी होये।”

⁷ मान्तर सातवां सरगदूत चो तुरी फुकलो ने होतो बिती सब्त चो दिनमन ने माहापुरू चो गुपत इच्छा पुरा होऊन जायदे हुन नगतखबर चो अनुसार जोन हुन आपलो दास अगम गिआनीमन के दिलो, पुरा होयेदे।

⁸ जोन शब्द के मय सरग ले बोलतोर सुनुन रये, हुन फेर मोचो संगे गोठयाऊक मुरयालो, “जा, जोन सरगदूत समुन्द आउर धरतनी थाने उबा आसे, हुनचो हाथ थानो खोललो बिती किताब धर।”

⁹ मय सरगदूत चो लगे जाऊन भाती बल्ले, “ऐ नानी किताब मोके देस।” हुन मोचो ले बल्लो, “धर, ऐके खाऊन देस; ऐ तुचो पेट पीता तो करेदे, मान्तर तुचो मुंह ने ओन्डार असन सुआद लागेदे।”

¹⁰ आउर मय हुन नानी किताब हुन सरगदूत चो हाथ ले धरून भाती खाऊन दिले। हुन मोचो मुंह ने ओन्डार असन सुआद तो लागली, मान्तर जिदलदाय मय हुनके खादले तो मोचो पेट पीता होऊन गेली।

¹¹ तेबे मोचो ले ऐ बोला गेली, “तुके खुबे लोगमन, आउर जातिमन, आउर भाषामन आउर राजामन चो बारे ने फेर अगम गोठ करतोर होयेदे।”