फिलिप्पियो 1 - Halbiजुहार 1 मसीह ईशु चो दास पौलुस आउर तीमुथियुस चो बाटले, सपाय पवितर लोगमन चो नाव जोन मसीह ईशु ने होऊन भाती फिलिप्पी ने रऊ आत, अध्यक्षमन आउर सेवकमन संगे। 2 आमचो बुआ माहापुरू आउर परबु ईशु मसीह चो बाटले तुमके अनुग्रह आउर शान्ति मिरते रओ। धन्यबाद आउर कलीसिया चो काजे पारथना 3 मय जिल-जिलदाय तुमके सुरता करूं आंय, तेबे-तेबे आपलो माहापुरू चो धन्यबाद करूं आंय; 4 आउर जसन केबीई तुमी सपाय चो काजे गुहार करूं आंय, तेबे हरमेशा हरिक संगे गुहार करूं आंय। 5 ऐईकाजे कि तुमी पयला दिन ले धरून भाती आजी ले नगतखबर के फयलातो ने मोचो शामिल रलासास। 6 मोके ऐ गोठ चो भरसा आसे कि जोन तुमचो ने अच्छा काम मुरयालो से, हुनी हुनके ईशु मसीह चो दिन ले पुरा करे दे। 7 ठीक आय कि मय तुमी सपाय चो काजे असने ची बिचार करेंदे, कसनबल्लोने तुमी मोचो मन ने ऐऊन बसलासास, आउर मोचो बन्दी ने आउर नगतखबर चो काजे जबाप आउर सबुत देतो ने तुमी सपाय मोचो संगे अनुग्रह ने शामिल आसास। 8 ऐ थाने माहापुरू मोचो गोहई आसे कि मय मसीह ईशु चो लाड़ करून तुमी सपाय चो आशा करें से। 9 मय ऐ पारथना करें से कि तुमचो मया गिआन आउर सपाय परकार चो बिबक संगे आउर बले बड़ते जाओ, 10 ऐथा ले कि तुमी अच्छा ले अच्छा गोठमन के लाडरा जाना, आउर मसीह चो दिन तक सत बनुन राआ, आउर ठोकर नी खाआ; 11 आउर हुन धारमिकता चो फल ले जोन ईशु मसीह चो दुआरा होऊ आय, भरपूर होते जाआ जेचो ले माहापुरू चो महिमा आउर स्तुति होते रओ। कयदी चो रूप ने सेवा 12 हे भाईमन, मय चाहाऊं आंय कि तुमी ऐ जाना कि मोचो उपरे जोन गुजरली से, हुनचो ले नगतखबर चो बाड़ती होली से। 13 ऐथा ले कि राजा चो राज महल चो पुईतराय पलटन आउर बाकी सपाय लोगमन ने ऐ परकट होऊन गेली से कि मय मसीह चो काजे बन्दी आसे; 14 आउर परबु ने जोन भाई आत, हुनमन थानले खुबे मोचो कयद होतोर कारन, हिम्मत बान्दुन भाती माहापुरू चो बचन बेधड़क सुनातोर आउर बले साआस करू आत। 15 कितलो तो डाह आउर झगड़ामन चो लागुन मसीह चो परचार करू आत आउर कितलो अच्छा इच्छा ले। 16 कितलो तो ऐ जानुन भाती कि मय नगतखबर चो काजे जबाप देतो काजे ठेबाया गेले से, मया ले परचार करू आत। 17 आउर कितलो तो सीदा ले नाई मान्तर बिरूद ले मसीह चो कथा सुनाऊ आत, ऐ सोचुन भाती कि मोचो बन्दी ने मोचो काजे कलेश पयदा करोत। 18 तेबे काय होली? मात्र ऐ कि हर परकार ले, भले बाहाना ले भले सत ले, मसीह चो कथा सुनाया जाऊ आय, आउर मय ऐचो ले हरिक आंसे आउर हरिक रयेंदे बले। 19 कसनबल्लोने मय जाने से कि तुमचो गुहार चो लागुन, आउर ईशु मसीह चो आत्मा चो दान बाटले, ऐचो करलो फल मोचो मुक्ति होयेदे। जीव रतोर मसीह आय 20 मय तो ऐई हारदिक लालच आउर आशा संगायें से कि मय कोनी गोठ ने लाज नी होयें, मान्तर जसन मोचो परबल साआस चो कारन मसीह चो बड़ाई मोचो देंह चो बाटले सदा होते रली से, असने ची ऐबे बले होओ, भले मय जीव रयें नाहले मरून जायें। 21 कसनबल्लोने मोचो काजे जीव रतोर मसीह आय, आउर मरून जातोर फायदा आय। 22 मान्तर अगर देंह ने जीव रतोर ची मोचो काम काजे फायदा देऊ आय तेबे मय नी जाने कि कोन के चुनेंदें। 23 कसनबल्लोने मय दुनो चो मंजी ओट ने लटकले से; जीव तो चाहाय से कि देंह के छांडुन मसीह चो लगे जाऊन रयेंदे, कसनबल्लोने ऐ खुबे ची नुकु आय, 24 मान्तर देंह ने रतोर तुमचो लागुन आउर बले जरूरी आय। 25 ऐईकाजे कि मोके ऐचो भरसा आसे आउर मय जानें से कि मय जीव रयें दे, मान्तर तुमी सपाय चो संगे रयेंदे जेचो ले तुमी बिश्वास ने जमखम होते जाआ आउर हुन थाने हरिक ने राआ; 26 आउर जोन घमण्ड तुमी मोचो बारे ने करू आस, हुन मोचो फेर तुमचो लगे ईलो ने मसीह ईशु ने खुबे बडुन जाओ। कोशिश आउर मसीह चो दुक उठातोर 27 मात्र ईतलो करा कि तुमचो चाल-चलन मसीह चो नगतखबर चो लायक होओ कि भले मय ऐऊन भाती तुमके दकेंदें, भले नी बले ऐयें, तुमचो बारे ने ऐई सुनेंदे कि तुमी गोटक ची आत्मा ने थीर आसास, आउर गोटक मन होऊन भाती नगतखबर चो बिश्वास चो काजे मसागत करते रऊ आस, 28 आउर कोनी गोठ ने बिरूदीमन ले भय नी खाहास। ऐ हुनमन चो बिनाश चो छुकछुका चिना आय, मान्तर तुमचो काजे मुक्ति चो आउर ऐ माहापुरू चो बाटले आय। 29 कसनबल्लोने मसीह चो लागुन तुमचो उपरे ऐ अनुग्रह होली कि ना मात्र हुनचो उपरे बिश्वास करा मान्तर हुनचो काजे दुख बले उठाआ; 30 आउर तुमके असने ची मसागत करतोर आय, जसन तुमी मोके करते दकलासास, आउर ऐबे बले सुनु आस कि मय असने ची करूं आंय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation