फिलेमोन 1 - Halbiशुभकामनामन 1 पौलुस चो बाटले जोन मसीह ईशु चो कयदी आय, आउर भाई तीमुथियुस चो बाटले आमचो लाड़रा सकरमी फिलेमोन, 2 आउर भईन अफफिया, आउर आमचो संगी लड़ीई करू अर्खिप्पुस आउर फिलेमोन चो घर चो कलीसिया चो नाव। 3 आमचो बुआ माहापुरू आउर परबु ईशु मसीह चो बाटले अनुग्रह आउर शान्ति तुमके मिरते रओ। धन्यबाद आउर पारथना 4 मय हरमेशा माहापुरू चो धन्यबाद करूं आंय, आउर आपलो पारथनामन ने बले तुके सुरता करूं आंय, 5 कसनबल्लोने मय तुचो हुन मया आउर बिश्वास चो गोठ सुनु आंय, जोन सपाय पवितर लोगमन चो संगे आउर परबु ईशु उपरे आसे। 6 मय पारथना करूं आंय कि बिश्वास ने तुचो सामिल होतोर, तुमचो सपाय भलाई चो पयचान ने, मसीह चो काजे असरदार होओ। 7 कसनबल्लोने हे भाई, मोके तुचो मया ले खुबे हरिक आउर शान्ति मिरू आय, ऐईकाजे कि तुचो लागुन पवितर लोगमन चो मन हरा-भरा होऊन गेलीसे। उनेसिमुस चो काजे गुहार 8 ऐईकाजे अगर मोके मसीह ने बड़े साहास आसे कि जोन गोठ अच्छा आय, हुनचो हुकुम तुके देयें। 9 तेबे बले मय डोकरा पौलुस के जोन अदायं मसीह ईशु चो काजे कयदी आंय, ऐ आउर बले अच्छा जान पढ़ली कि मया ले बिनती करें। 10 मय आपलो पिला उनेसिमुस चो काजे, जोन मोचो ले मोचो कयद ने जनमलो से, तुके गुहार करेंसे। 11 हुन तो पयले तुचो काई काम चो नी रलो, मान्तर अदायं तुचो आउर मोचो दुनो चो बड़े काम चो आय। 12 हुनी के बल्लोने जोन मोचो कारजा चो गोंदा आय, मय तुचो लगे फिरान दिलेसे। 13 हुनके मय आपलो ची लगे संगातोर मन करते रले कि हुन तुचो बाटले ऐ कयद ने जोन नगतखबर चो लागुन आय, मोचो सेवा करो। 14 मान्तर मय तुचो इच्छा बिना काई बले करतोर नी चाहाले, कि तुचो ऐ किरपा दबाव ले नाई मान्तर हरिक ले होओ। 15 कसनबल्लोने काय जाने हुन तुचो ले खिन्डिक दिन तक चो काजे ऐई कारन अलग होलो कि हरमेशा तुचो लगे रवो। 16 मान्तर अदायं ले दास चो असन नाई मान्तर दास ले बले बड़ीया, बल्ले भाई चो असन रओ, जोन मोचो तो खास लाडरा आय ची, मान्तर अदायं देंह ने आउर परबु ने बले, तुचो बले खास लाडरा होओ। फिलेमोन चो गोठ मानतोर ले हरिक 17 आउर अगर तुय मोके आपलो शामिल समज सीस, तो हुनके ऐ परकार गरहन कर जसन मोके। 18 अगर हुन तुचो काई घाटा करलो से, नाहले हुनचो उपरे तुचो काई ऐऊ आय, तो मोचो नाव थाने लिकुन संगाव। 19 मय पौलुस आपलो हाथ ले लिकेंसे कि मय खुद भरून देयेंदे; आउर ऐचो बोलतोर काई जरूरत निआय कि मोचो लागा जोन तुचो उपरे आसे हुन तुय ची आस। 20 हे भाई, ऐ हरिक मोके परबु ने तुचो बाटले मिरो। मसीह ने मोचो जीव के हरा-भरा करून देस। 21 मय तुचो हुकुम मानु होतोर भरसा संगाऊन भाती तुके लिकेंसे, आउर ऐ जाने कि जोन काई मय बोलु आंय, तुय हुनचो ले कईं बडुन भाती करसे। 22 आउर ऐ बले कि मोचो काजे ठेबतो ठान तिआर संगाव। मोके आशा आसे कि तुमचो पारथनामन चो लागुन मय तुमके देऊन दिआय जायें दें। आखरी शुभकामनामन 23 इपफ्रास, जोन मसीह ईशु ने मोचो संगे कयदी आसे, 24 आउर मरकुस आउर अरिस्तर्खुस आउर देमास आउर लूका जोन मोचो सकरमी आय, ऐ मन चो तुके जुहार। 25 आमचो परबु ईशु मसीह चो अनुग्रह तुमचो आत्मा उपरे होते रओ। आमीन। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation