मरकुस 11 - Halbiईशु चो यरूशलेम ने ओलतोर 1 जिदलदाय हुन यरूशलेम चो लगे, जैतून डोंगरी उपरे बैतफगे आउर बैतनिय्याह चो लगे ईला तेबे हुन आपलो चेलामन थानले दुय झान के ऐ बोलुन भाती पठालो, 2 “पुरे चो गाँव ने जाआ, आउर हुन थाने अमरते ची गोटक गदही चो पिला, जेचो थाने कोनी केबीई नी चेगला से, बान्दलोर तुमके मिरेदे। हुनके ढ़िलुन आना। 3 अगर तुमके कोनी पचारदे, ‘ऐ केंव करेसास?’ तेबे बोला, ‘परबु के ऐचो जरूरत आसे,’ आउर हुन झटके हुनके ऐथा पटाऊन देयेदे।” 4 हुनमन जाऊन भाती हुन गदही चो पिला के बाहरे बाट लगे खोरी ने बान्दलोर मिराला, आउर ढिलुक मुरयाला। 5 हुनमन थानले जोन हुता उबा रवत, कोनी-कोनी बोलुक मुरयाला, “ऐ काय करसास, गदही चो पिला के केंव ढ़िलेसास?” 6 जसन ईशु बोलु रलो, असने ची हुनमन-हुनमन ले बोलुन दिला; तेबे लोगमन हुनमन के जाऊक दिला। 7 हुनमन गदही चो पिला के ईशु चो लगे आनुन भाती हुनचो उपरे आपलो फटीईमन के लतला आउर हुन हुनचो उपरे बसलो। 8 तेबे खुबे लोगमन आपलो फटीई के बाट ने ओचाला आउर दुसर लोगमन बेड़ा थानले खेंदामन के गोंदुन-गोंदुन भाती फयलाऊन दिला। 9 जोन हुनचो पुरे-पुरे जाओत आउर पाट-पाट हिन्ड़ते ऐते रवत, चिचयाऊन-चिचयाऊन भाती बोलते जाते रवत, “होशाना! धन्य आय हुन जोन परबु चो नाव ले ऐऊ आय! 10 आमचो बुआ दाऊद चो राज जोन ऐये से; धन्य आय! बादरी ने होशाना!” 11 हुन यरूशलेम अमरून भाती मंदिर ने ईलो, आउर भोंवरक सपाय तीजमन के दकुन भाती बारा झान चो संगे बैतनिय्याह गेलो, कसनबल्लोने संझ होऊ रली। अंजीर चो रूक के शराप देतोर 12 दुसर दिन जिदलदाय हुनमन बैतनिय्याह ले निकरला तेबे हुनके भुक लागली। 13 हुन लापी ले अंजीर चो गोटक कचा रूक दकुन भाती लगे गेलो कि काय जाने हुन थाने काई भेटो: मान्तर पानमन के छांडुन काई नी भेटलो; कसनबल्लोने फर चो समया नी रली। 14 ऐ थाने हुन हुनचो ले बल्लो, “आजी ले कोनी तुचो फर केबीई नी खाओत!” आउर हुनचो चेलामन सुनते रवत। मंदिर ले बेबारीमन के निकरातोर 15 फेर हुनमन यरूशलेम ने ईला, आउर हुन मंदिर ने गेलो; आउर हुता जोन लेन-देन करते रवत हुनमन के बाहरे निकराऊक मुरयालो, आउर सराफमन चो माची आउर परेयां बिकतो बितामन चो ठेलामन के उलटाऊन दिलो, 16 आउर मंदिर थानले कोनी के बरतन धरून ऐऊक जाऊक नी दिलो। 17 आउर उपदेश करून हुनमन ले बल्लो, “काय ऐ नी लिकलोर आसे कि मोचो घर सपाय-जातिमन काजे पारथना चो घर बलाय जाये दे? मान्तर तुमी ऐके डाकुमन चो गढ़ बनान दिलासास।” 18 ऐ सुनुन भाती परधान याजक आउर शास्तरीमन हुनके मारतोर मवका डगराला; कसनबल्लोने हुनमन हुनचो ले डरते रवत, ऐईकाजे कि सपाय लोग हुनचो उपदेश ले भक्याते रवत। 19 संझ होते ची हुनमन नंगर ले बाहरे जाते गेला। बिश्वास चो सामरत 20 फेर बड़े बिहाने जिदलदाय हुनमन हुन बाट ले ऐते रवत तेबे हुनमन हुन अंजीर चो रूक के चेर लगले सुकलोर दकला। 21 पतरस के हुन गोठ सुरता ईली, आउर हुन हुनचो ले बल्लो, “हे रब्बी, दक! ऐ अंजीर चो रूक जोन के तुय सराप देऊ रईस, सुकली से।” 22 ईशु हुनके जबाप दिलो, “माहापुरू उपरे बिश्वास संगाआ। 23 मय तुमचो ले सते बलें सें कि जोन कोनी ऐ डोंगरी ले बले दे, ‘तुय उकनी हो, आउर समुन्द ने जाऊन घसर,’ आउर आपलो मन ने संका नी कर, मान्तर बिश्वास कर कि जोन बलेंसें हुन होयेदे, तेबे हुनचो काजे हुनी होये दे। 24 ऐईकाजे मय तुमचो ले बलें सें कि जोन काई तुमी पारथना करून मांगा, तेबे बिश्वास करा कि तुमके मिरून गेली, आउर तुमचो काजे होये दे। 25 आउर जिदलदाय केबीई तुमी उबा होऊन पारथना करू आस तो अगर तुमचो मन ने कोचीई काजे काई बिरूद आसे, तो छमा करा: ऐईकाजे कि तुमचो सरग चो बुआ बले तुमचो अपराध छमा करो। 26 मान्तर अगर तुमी छमा नी करा से तेबे तुमचो बुआ बले जोन सरग ने आसे, तुमचो अपराध छमा नी करेदे।” अधिकार थाने सवाल 27 हुनमन फेर यरूशलेम ने ईला, आउर जिदलदाय हुन मंदिर ने बुलते रलो तेबे परधान याजक आउर शास्तरीमन आउर पुरनिमन हुनचो लगे ऐऊन भाती पचारूक मुरयाला, 28 “‘तुय ऐ काम कोन अधिकार ले कर सीस? आउर ऐ अधिकार तुके कोन दिलो से कि तुय ऐ काम कर?’ 29 ईशु हुनमन ले बल्लो, ‘मय बले तुमचो ले गोटक गोठ पचारें सें; मोके जबाप दिआस तेबे मय तुमके सांगेंदें कि ऐ काम कोन हक ले करूं आंय। 30 यूहन्ना चो डूबन काय सरग चो बाटले रली नाहले मानेमन चो बाटले रली। मोके जबाप दिआस।’ 31 तेबे हुनमन आपस ने बहस करूक मुरयाला कि अगर आमी बोलुन्दे ‘सरग चो बाटले,’ तेबे हुन बले दे, ‘फेर तुमी हुनचो बिश्वास केंव नी करलास?’ 32 आउर अगर आमी बोलुन्दे, ‘मानेमन चो बाटले,’ तेबे लोगमन चो डर आसे, कसनबल्लोने सपाय जानोत कि यूहन्ना सते अगम गिआनी रलो। 33 तेबे हुनमन ईशु के जबाप दिला, ‘आमी नी जानु।’ ईशु हुनमन ले बल्लो, ‘मय बले तुमके नी सांगे कि ऐ काम काय हक ले करें से।’” |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation