मत्ती 3 - Halbi

यूहन्ना डूबन देतो बिता चो परचार

¹ कितलो बरकमन चो पाचे यूहन्ना डूबन देतो बिता ऐऊन भाती यहूदिया परदेश चो छिड़ा जगा ने ऐ परचार करूक मुरयालो:

² “मन फिरावा, कसनबल्लोने सरग चो राज लगे ईलीसे।”

³ ऐ हुनी आय जेचो बारे ने यशाया अगम गिआनी बोलु रलो: “छिड़ा जगा ने गोटक हाग देतो बिता चो शब्द सुना देयसे, कि परबु चो बाट तिआर करा, हुनचो बाटमन सीदा करा।”

⁴ ऐ यूहन्ना ऊंट चो रूंआ चो बनलो फटीई पिन्दुन रये, आउर आपलो करांड ने चामड़ा चो पट्टा बान्दी होऊ रये, आउर हुनचो खातो तीज थापामन आउर ओंडार तेल रये।

⁵ तेबे यरूशलेम नंगर चो आउर पुईतराय यहूदिया परदेश चो, आउर यरदन लंदी चो लगे-लगे चो सपाय जगा चो लोगमन हुनचो लगे निकरून ईला।

⁶ आउर आपलो-आपलो पापमन के मानुन भाती यरदन लंदी ने हुनचो ले डूबन धरला।

⁷ जिदलदाय यूहन्ना खुबे असन फरीसीमन आउर सदूकीमन के डूबन धरतो काजे आपलो लगे ऐतोर दकलो, तेबे हुनमन ले बल्लो, “तुमी बिस फुक तो सांप चो असन दुष्ट आहास, तुमके कोन जनालो कि ऐतो बिती रीस ले पराहा?

⁸ मन फिरातोर लायक चो फल आना;

⁹ आउर आपलो-आपलो मन ने ऐ नी बिचारा, कि आमचो बुआ अब्राहाम आय; कसनबल्लोने मय तुमचो ले बलेंसे, कि माहापुरू ऐ पकनामन ले अब्राहाम चो काजे पिला जनमाऊक सके।

¹⁰ आउर अदायं कुड़ार रूक चो जड़ थाने संगालोर आसे, ऐईकाजे जोन-जोन रूक अच्छा फर नी फरे, हुन गोंदुन आउर आईग ने जलाया जाऊ आय।”

¹¹ “मय तो पानी ले तुमके मन फिराव चो डूबन देयेंसे, मान्तर जोन मोचो पाचे ऐतो बिता आय, हुन मोचो ले आगर शक्तिशाली आय; मय हुनचो पनही उठातोर लायक नुआय, हुन तुमके पवितर आत्मा आउर आईग ले डूबन देयदे।

¹² हुनचो सुपा हुनचो हाथ ने आसे, आउर हुन आपलो बेड़ा अच्छा रीति ले साफ करेदे, आउर आपलो गऊँ के तो कोटार ने रूंड़ा करेदे, मान्तर भुसा के हुन आईग ने जलायदे जोन लिबतो बिती नुआय।”

यूहन्ना चो हाथ ले ईशु मसीह चो डूबन

¹³ हुन समया ईशु गलील परदेश ले यरदन लंदी चो कटा यूहन्ना चो लगे हुनचो ले डूबन धरूक ईलो।

¹⁴ मान्तर यूहन्ना ऐ बोलुन भाती ईशु के ठेबाऊक मुरयालो, “मोके तो तुचो हाथ ले डूबन धरतोर जरूरत आसे, आउर तुय मोचो लगे ईली सीस?”

¹⁵ ईशु हुनके ऐ जबाप दिलो, “ऐबे तो असने ची होऊक देस, कसनबल्लोने आमके ऐई रीति ले सपाय धरमकरम के पुरा करतोर नगत आय।” तेबे हुन हुनचो गोठ के मानलो।

¹⁶ आउर ईशु डूबन धरून भाती तुरते पानी थानले बाहरे ईलो, आउर हुनचो काजे बादरी उगाढ़ी होली; आउर हुन माहापुरू चो आत्मा के परेयां चो असन उतरते आउर आपलो उपरे ऐतोर दकलो।

¹⁷ आउर ऐ आकाशबानी होली, “ऐ मोचो लाड़रा बेटा आय, जेचो ले मय खुबे हरिक आंसे।”