यहूदा 1 - Halbiशुभकामनामन 1 यहूदा चो बाटले जोन ईशु मसीह चो दास आउर याकूब चो भाई आय, हुन हाग दिलो बितामन चो नाव जोन माहापुरू बुआ ने लाडरा आउर ईशु मसीह चो काजे अच्छा आसे। बिश्वास काजे खटतोर 2 दया आउर शान्ति आउर मया तुमके खुबे-खुबे मिरते रओ। 3 हे लाडरामन, जिदलदाय मय तुमके हुन मुक्ति चो बारे ने लिकतो ने खुबे मसागत ले तिआर करते रले जोन थाने आमी सपाय शामिल आंसु, तेबे मय तुमके ऐ समजातोर जरूरी जानले कि हुन बिश्वास चो काजे पुरा तिआर करा जोन पवितर लोगमन के गोटक ची हार सोपा जाऊ रली। 4 कसनबल्लोने कितलो असन माने खुसराय आमचो ने ऐऊन मिसला से, जोनमन ले ऐ डण्ड चो चरचा जुना समया ने पयले ची ले लिका जाऊ रये: ऐ भक्तिहीन आत, आउर आमचो माहापुरू चो अनुग्रह के ढीला-ढाला ने पलटून देऊ आत, आउर आमचो गोटक मात्र मालिक आउर परबु ईशु मसीह चो इन्कार करू आत। 5 मान्तर अगर तुमी सपाय गोठ गोटक हार जानलासास, तेबे बले मय तुमके ऐ गोठ चो सुरता दियातोर चाहाय से कि परबु गोटक कुल मिस्र देश ले बचालोर पाचे बिश्वास नी आनतो बितामन के नष्ट करून दिलो। 6 फेर जोन सरग दूतमन आपलो पन के गोटक जगा ने थीर नी संगाला मान्तर आपलो खुद चो जगा के छांडुन दिला, हुन हुनमन के बले हुन भयंकर दिन चो नियाय चो काजे अंधार ने, जोन जुग-जुग चो काजे आय, बान्दनमन ने संगालो से। 7 जोन रीति ले सदोम आउर अमोरा आउर हुनचो लगे-लगे चो नंगर, जोन ऐ मन चो असन बेबीचारी होऊन जाऊ रओत आउर पराया देंह चो पाटे लगुन जाऊ रओत, आईग चो अमर डण्ड ने पडुन भाती कहनी ठेबला से। 8 असने रीति ले ऐ सपना दकु बले आपलो-आपलो देंह के अशुद्ध करते, आउर परभुता के तुच्छ जानु आत, आउर बड़े पन बितामन के अच्छा-खराप बोलु आत। 9 मान्तर परधान सरगदूत मीकाईल, जिदलदाय शयतान ले मूसा चो लाश चो बारे ने गोठ-बात करलो, तेबे हुनके अच्छा-खराप बोलुन दोष लगातोर साआस नी करलो मान्तर ऐ बल्लो, “परबु तुके खिजो।” 10 मान्तर ऐ लोग जोन गोठमन के नी जानोत हुनमन के अच्छा खराप बोलु आत, आउर जोन गोठमन के अचेत पशुमन चो असन आदत ची ले जानु आत, हुनमन ने आपन खुद के नष्ट करू आत। 11 हुनमन उपरे हाय! कसनबल्लोने हुनमन कैन चो असन चाल चलला, आउर भुती चो काजे बिलाम चो असन नसुन गेला से, आउर कोरह चो असन बिरूद करून नशला सोत। 12 ऐ तुमचो मया चो सभामन ने तुमचो संगे खाते-पिवते, समुन्द ने लुकलो बिती पकना असन आत, आउर बेधड़क आपलो ची पेट भरतो बिता जगवार आत; हुनमन पानी नी रलो बादरी आत, जेके लेहरा उड़ाऊन धरून जाऊ आय; पानी गरमी चो नी फरतो रूक आत, जोन दुयहार मरला से, आउर चेर संगे उकनी होलासे; 13 ऐ समुन्द चो प्रचंड हरला आत, जोन आपलो लाज चो फेनी उठाऊ आत; ऐ हलतो तारामन आत, जोनमन काजे जुग-जुग ले घोर अन्धार संगाया गेलीसे। 14 हनोक बले जोन आदम ले सातवां पीढ़ी ने रये, ऐमन चो बारे ने ऐ अगम गोठ करलो, दका, परबु आपलो लाखो पवितरमन चो संगे ईलो 15 कि सपाय चो नियाय करो, आउर सपाय भक्तिहीनमन चो हुनमन चो अभक्ति चो सपाय काममन चो बारे ने जोन हुनमन भक्तिहीन होऊन भाती करला से, आउर हुन सपाय कठोर गोठमन चो बारे ने जोन भक्तिहीन पापीमन हुनचो बिरूद ने बल्ला से, दोषी ठेबाओ। 16 ऐमन तो असंतुष्ट, गुरमुरतो बितामन, आउर आपलो मनमानी चो अनुसार चलु बितामन आत, आउर आपलो मुंह ले घमण्ड चो गोठमन बोलु आत, आउर हुनमन लाब चो काजे मुंह दका बड़ाई करू आत। कोशिश करू बनु राहा 17 मान्तर हे लाडरामन, तुमी हुन गोठमन के सुरता संगाहा जोन आमचो परबु ईशु मसीह चो पठालोबितामन पयले ची बोलुन चुकला से। 18 हुनमन तुमके बोलते रवत, “पाचे चो दिनमन ने असन मजाक करतो बितामन होदे जोन आपलो अभक्ति चो मनमानीमन चो अनुसार चलदे।” 19 ऐ हुनमन आत जोन लड़ा-जुजा करू आत; ऐमन शारीरिक लोग आत, जोनमन ने आत्मा निआय। 20 मान्तर हे लाडरामन, तुमी आपलो खुबे पवितर बिश्वास ने उन्नती करते-करते आउर पवितर आत्मा ने पारथना करते-करते, 21 आपन खुद के माहापुरू चो मया ने बनान संगाहा; आउर अमर जीवना चो काजे आमचो परबु ईशु मसीह चो दया चो बाट टाकते राहा। 22 हुनमन उपरे जोन संका ने आसोत दया करा; 23 आउर खुबे के आईग थानले झिकुन भाती निकराहा; आउर खुबेमन उपरे भय चो संगे दया करा, मान्तर हुन कुड़ता ले बले घिन्याहा जोन देंह चो दुवारा कलंकीत होऊन गेली से। माहापुरू चो स्तुति 24 अदायं जोन तुमके ठोकरना खातो ले बचाऊक सके, आउर आपलो महिमा चो भरपूरी चो पुरे उदुम आउर बेकसूर करून उबा करूक सकु आय, 25 हुनी गोटक मात्र माहापुरू आमचो मुक्तिकरू चो महिमा आउर मान-समान आउर बल आउर अधिकार, आमचो परबु ईशु मसीह चो दुवारा जसन पिढ़ी-पिढ़ी ले आसे, ऐबे बले होओ आउर जुग-जुग रओ। आमीन। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation