याकूब 5 - Halbiसवकारमन के सला 1 हे सवकारमन सुना तो, तुमी आपलो ऐतो बिती कलेशमन थाने चिचयाऊन-चिचयाऊन भाती गागा। 2 तुमचो धन नसुन गेलीसे आउर तुमचो फटीईमन के कीड़ा खाऊन गेलासे 3 तुमचो सोना-चाँदी ने खय धरलीसे; आउर हुन खय तुमचो उपरे गोहई देयेदे, आउर आईग चो असन तुमचो मास खाऊन जायदे। तुमनमन सरासरी जुग ने धन रून्डालासास। 4 दका जोन भुतियारमन तुमचो बेड़ा काटला, हुनमन चो हुन भुती जोन तुमी धोका देऊन भाती संगालासास चिचयायसे, आउर काटतो बितामन चो गुहार सेनामन चो परबु चो कानमन लगे पहुँचुन गेलीसे। 5 तुमी धरतनी थाने खातो-पिव तो ने लगुन रलास आउर बड़े ची सुक भोगलाश; तुमी ऐ मरना चो दिन चो काजे आपलो मन चो पालन पोषन करून हुनके ठोसर करलास। 6 तुमी धरमी के दोषी थेबाऊन भाती मारून दिलास, हुन तुमचो सामना नी करतो धीरज संगातोर 7 ऐईकाजे हे भाईमन, परबु चो ऐओत ले धीरज धरा। दका, किसान धरतनी चो बड़े मोल फसल चो आशा संगाते-संगाते मुयला आउर आखरी बरसा होओत ले धीरज धरू आय। 8 तुमी बले धीरज धरा; आउर आपलो मन के बरसक करा, कसनबल्लोने परबु चो ऐतो बेरा लगे आसे। 9 हे भाईमन, गोटक दुसर उपरे दोष नी लगाहा, बल्ले तुमी दोषी नी ठेबा; दका, हाकिम दुआर थाने उबा आसे। 10 हे भाईमन जोन अगम गिआनीमन परबु चो नाव ले गोठयाला, हुनमन के दुक उठातो आउर धीरज धरतोर गोठ के नमूना समजा। 11 दका, आमी धीरज धरतो बितामन के धन्य बोलु आंव। तुमी तो अय्युब चो धीरज चो बारे ने तो सुनलासास ची, आउर परबु चो बाटले जोन हुनचो करलो फल होली हुनके बले जानला से, जेचो ले परबु चो खुबे करूना आउर दया परकट होऊ आय। 12 मान्तर हे मोचो भाईमन, सपाय ले बड़े गोठ ऐ आय कि किरिया नी खाआ, ना सरग चो ना धरतनी चो ना कोनी आउर तीज चो; मान्तर तुमचो गोठ बात हव चो हव, आउर नाई चो नाई होओ, कि तुमी डण्ड चो लायक नी ठेबा। बिश्वास लायक पारथना चो शक्ति 13 अगर तुमनमन ने कोनी दुखी आसोत, तो हुन पारथना करो। अगर हरिक आसे, तेबे हुन स्तुति चो भजन गाओ। 14 अगर तुमनमन ने कोनी रोगी आसे, तो कलीसिया चो सियानमन के हाग देओत, आउर हुनमन परबु चो नाव ले हुनचो उपरे तेल लगडून भाती हुनचो काजे पारथना करोत, 15 आउर बिश्वास चो पारथना चो दुवारा रोगी बाचुन जायदे आउर परबु हुनके उठाऊन भाती उबा करेदे; आउर अगर हुन पाप बले करलो से, तो हुनमन चो बले छमा होयदे। 16 ऐईकाजे तुमी आपस ने गोटक दुसर चो पुरे आपलो-आपलो पाप के माना, आउर गोटक दुसर चो काजे पारथना करा, जेचो ले चेंगा होऊन जाआ; धरमी जन चो पारथना चो असर ले खुबे काई होऊक सके। 17 एलिया बले तो आमचो असन दुक-सुक भोगी माने रलो; आउर हुन गाग-गागानी. होऊन भाती पारथना करलो कि पानी नी घसरो; आउर साढ़े तीन बरक ले धरतनी थाने पानी नी घसरली। 18 फेर हुन पारथना करलो, तेबे बादरी ले बरसा होली, आउर धरतनी फुल्ली फरली। 19 हे मोचो भाईमन, अगर तुमचो ने कोनी सत चो बाट ले भटकुन जायदे आउर कोनी हुनके फिरान आनो, 20 तेबे हुन ऐ जानो कि जोन कोनी-कोनी भुलकलो पापी के फिरान आनेदे, हुन गोटक परान के मरना ले बचाएदे आउर कितली पापमन उपरे परदा डाले दे। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation