याकूब 4 - Halbiसंवसार ले मीत बान्दतोर 1 तुमचो थाने लड़ीईमन आउर झगड़ामन काहां ले ईली? काय हुन सुक-सुबिदामन ले नुआय जोन तुमचो धड़मन ने लडु आत आउर भिडू आत। 2 तुमी इच्छा संगाऊ आस, आउर तुमके मिरे नाई; ऐईकाजे तुमी झगडू आस। तुमी कुचर करू आस, आउर काई पाऊक नी सकास; तेबे तुमी झगडु आउर लडु आस। तुमके ऐईकाजे नी मिरे कि मांगु नुआस। 3 तुमी मांगु आस आउर पाऊ नुआस, ऐईकाजे कि खराप इच्छा ले मांगु आस, बल्ले आपलो खातो-पिवतो ने उड़ान दिआस 4 हे बेबीचारीनमन, काय तुमी नी जानास कि संवसार ले मीत करतोर माहापुरू ले बईर करतोर आय? ऐईकाजे जोन कोनी संवसार चो मीत होऊक चाहायें से, हुन आपन खुद के माहापुरू चो बयरी बनाऊ आय। 5 काय तुमी ऐ समजु आस कि पवितर शास्त्र फकाहा बोलु आय, “जोन आत्मा के हुन आमचो भीतरे बसालो से, काय हुन असने लालच करू आय जेचो करलो फल कुचर होओ”? 6 हुन तो आउर बले अनुग्रह देऊ आय; ऐई लागुन ऐ लिकलोर आसे, “माहापुरू घमण्डाहामन चो बिरूद करू आय, मान्तर सोजमन उपरे अनुग्रह करू आय।” 7 ऐईकाजे माहापुरू चो आधीन होऊन जाहा; आउर शयतान चो सामना करा, तेबे हुन तुमचो लगले निकरून परायदे। 8 माहापुरू चो लगे ईआ तेबे हुन बले तुमचो लगे ऐयेदे। हे पापीमन, आपलो हाथ शुद्ध करा; आउर हे दुयमन लोगमन, आपलो मन के पवितर करा। 9 दुकी हुआ, आउर दुक करा, आउर गागा। तुमचो हांसतोर दुक ने आउर तुमचो हरिक मुरमुरा ने बदलुन जाओ। 10 परबु चो पुरे सोज बना तेबे हुन तुमके शिरोमणि बनायेदे। 11 हे भाईमन, गोटक दुसर चो बदनामी नी करा। जोन आपलो भाई चो बदनामी करू आय नाहले भाई उपरे दोष लगाऊ आय; हुन नियम चो बदनामी करू आय आउर नियम थाने दोष लगाऊ आय; आउर अगर तुय नियम थाने दोष लगाऊ आस, तो तुय नियम थाने चलतो बिता नुआस मान्तर हुन थाने हाकिम ठेबलीस। 12 नियम देतो बिता आउर हाकिम तो गोटक ची आत, जोन बचातो आउर नाश करतो ने सामरती आय। मान्तर तुय कोन आस, जोन आपलो पड़ोसी उपरे दोष लगाऊ आस? अगम चो चिन्ता 13 तुमी जोन ऐ बोलु आस, “आजी नाहले काली के आमी कोनी आउर नंगर ने जाऊन भाती हुता गोटक बरक बितावां, आउर बेबार करून लाब कमावां।” 14 आउर ऐ नी जानोत कि काली के काय होयदे। सुना तो, तुमचो जीवना आय ची काय? तुमी तो कुमरा चो असन आस, जोन डण्डिक दका देऊ आय फेर मेटुन जाऊ आय। 15 ऐचो उलटा तुमके ऐ बोलतोर आसे, “अगर परबु चाहाय दे तो आमी जीव रवां, आउर ऐ नाहले हुन काम बले करवां।” 16 मान्तर अदायं तुमी आपलो ढ़ोंग मारतो थाने घमण्ड करू आस; असन सपाय घमण्ड खराप होऊ आय। 17 ऐईकाजे जोन कोनी भलाई करूक जानु आय आउर नी करे, हुनचो काजे ऐ पाप आय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation