याकूब 3 - Halbi

जीब गोटक आईग

¹ हे मोचो भाईमन, तुमनमन ले खुबे उपदेशक नी बना, कसनबल्लोने जानेसास कि आमी उपदेशक आउर बले दोषी ठेबवां।

² ऐईकाजे कि आमी सपाय खुबे हार चुकुन जाऊ आंव; जोन कोनी बचन ने नी चुके हुनी तो सिद्ध माने आय आउर पुईतराय देंह के बले आपलो अधीन ने करूक सके।

³ जिदलदाय आमी आपलो अधीन ने करतो काजे घोड़ामन चो मुंह ने लगाम लगाऊ आंव, तेबे आमी हुनमन चो पुईतराय देंह के बले किन्दराऊक सकु।

⁴ दका, जाहाज बले, अगर असन बड़े होऊ आय आउर अनदाधुन्द लेहरा ले चलाया जाऊ आय, तेबे बले गोटक नानी असन चाटु चो दुवारा घटवारी चो इच्छा चो अनुसार किन्दराया जाऊ आय।

⁵ असने ची जीब बले गोटक नानी असन अंग आय आउर हुन बड़े-बड़े डींगमन मारू आय। दका, खिन्डिक असन आईग ले कितलो बड़े रान ने आईग धरून जाऊ आय

⁶ जीब बले गोटक आईग आय; जीब आमचो धड़मन ने अधरम चो गोटक लोग आय, आउर पुईतराय देंह थाने कलंक लगाऊ आय, आउर जीवना जीवतो ने आईग लगाऊन देऊ आय, आउर नरक कुण्ड चो आईग ले जरते रऊ आय।

⁷ कसनबल्लोने हर परकार चो रान-पशु, चड़ीई, आउर रेंगतो बिती जन्तु आउर पानीजीव तो माने जाति चो वश ने होऊक सकु आत आउर होऊन बले गेलासे,

⁸ मान्तर जीब के मानेमन थानले कोनी वश ने नी करूक सके; हुन गोटक असन बाधा आय जोन केबे ठेबे ची नाई, हुन जीव धरतो बिती बिश ले भरलोर आसे।

⁹ ऐचीई ले आमी परबु आउर बुआ चो स्तुति करू आंव, आउर ऐचीई ले मानेमन के जोन माहापुरू चो रंगरूप ने उपजास होला से सराप देऊ आत।

¹⁰ गोटक ची मुंह ले धन्यबाद आउर सराप दुनो निकरू आय। हे मोचो भाईमन, असन नी होतोर आसे।

¹¹ काय सतान चो गोटक ची मुंह ले सुआद आउर खर पानी दुनो निकरू आय?

¹² हे मोचो भाईमन, काय अंजीर चो रूक ने जैतून, नाहले अंगुर चो लाहा ने अंजीर धरूक सकु आय? असने ची खर सतान ने सुआद पानी नी निकरूक सके।

सत बिबक

¹³ तुमनमन ने गिआनी आउर समजदार कोन आय? जोन असन होओ हुन आपलो काममन के अच्छा चाल-चलन ले हुन नम्रता संगे परकट करो जोन गिआन ले उपजास होऊ आय।

¹⁴ मान्तर अगर तुमी आपलो-आपलो मन ने पीता कुचर आउर बिरूद संगायसास, तेबे सत चो बिरूद ने घमण्ड नी करा, आउर ना तो झूठ बोला।

¹⁵ ऐ गिआन हुन नुआय जोन उपर ले उतरू आय, मान्तर संवसारिक, आउर शारीरिक, आउर शयतानी आय।

¹⁶ कसनबल्लोने जोन थाने कुचर आउर बिरूद होऊ आय, हुता झगड़ा आउर हर परकार चो दुषकरम बले होऊ आय।

¹⁷ मान्तर जोन गिआन उपर ले ऐऊ आय हुन पयले तो पवितर होऊ आय फेर मिलनसार, कोमल आउर सीदा-सादा आउर दया आउर अच्छा फरमन ले लाती होलोर आउर भेद-भाव आउर कपट ले लापी रऊ आय।

¹⁸ मिलाप करातो बितामन चो काजे धारमिकता चो फल शान्ति चो संगे बुना जाऊ आय।