याकूब 1 - Halbiशुभकामनामन 1 माहापुरू चो आउर परबु ईशु मसीह चो दास याकूब चो बाटले हुन बारा कुलमन चो जोन जत-खत होऊन भाती रऊ आत जुहार अमरो। परीक्षामन चो मोल 2 ऐ मोचो भाईमन, जिदलदाय तुमी नाना परकार चो परीक्षामन ने पड़ा, तेबे ऐके पुरा हरिक चो गोठ समजा, 3 ऐ जानुन भाती कि तुमचो बिश्वास चो परका गेलो ने धीरज उपजास होऊ आय। 4 मान्तर धीरज के आपलो पुरा काम करूक दिआस कि तुमी पुरा आउर सिद्ध होऊन जाहा, आउर तुमचो थाने कोनी गोठ चो कमी नी रओ। 5 मान्तर अगर तुमनमन ले कोकीई अकल चो कमी आसे जाले तेबे माहापुरू ले मांगा, जोन बिना काई बोलुन सपाय के उदारता ले देऊ आय, आउर हुनके दिया जायदे। 6 मान्तर बिश्वास ले मांगा, आउर काई संका नी करा, कसनबल्लोने संका करतो बिता समुन्द चो हरला चो समान आय जोन लेहरा ले बहुआय आउर उदलु आय। 7 असन माने ऐ नी समजो कि मोके परबु ले काई मिरेदे, 8 हुन माने दुयमनया आय, आउर आपलो पुईतराय गोठमन ने चुल-चुल आय। सवकार आउर गरीब 9 दिन भाई आपलो बड़े पन थाने घमण्ड करो, 10 आउर सवकार आपलो नीच दसा थाने; कसनबल्लोने हुन लाटा चो फुल चो असन जाते रयदे। 11 कसनबल्लोने बेर उदते ची चड़ चड़ा घाम छेकु आय आउर लाटा के सुकान देऊ आय, आउर हुनचो फुल झडुन जाऊ आय आउर हुनचो सुन्दर जाते रऊ आय। असने परकार सवकार बले आपलो बाट थाने हिन्ड़ते-हिन्ड़ते धुरला ले मिलुन जायदे। माहापुरू परीक्षा नी धरे 12 धन्य आय हुन माने जोन परीक्षा ने थीर रऊ आय, कसनबल्लोने हुन खर निकरून भाती जीवना चो हुन मुकुट पायेदे जेचो बायदा परबु आपलो मया करतो बितामन ले करलो से। 13 जिदलदाय काचीई परीक्षा होओ, तेबे हुन ऐ नी बोलो कि मोचो परीक्षा माहापुरू चो बाटले होऊ आय; कसनबल्लोने ना तो खराप गोठमन ले माहापुरू चो परीक्षा होऊक सके, आउर ना हुन काचीई परीक्षा खुद करू आय। 14 मान्तर हरकोनी माने आपलो ची मनमानी ले झिकुन भाती आउर फसुन भाती परीक्षा ने पढुआय। 15 फेर मनमानी देंहबारी होऊन भाती पाप के जनमाऊ आय आउर पाप जिदलदाय बाडु आय तेबे मोरना के उपजास करू आय। 16 हे मोचो लाड़रा भाईमन, धोका नी खाआ। 17 कसनबल्लोने हरकोनी अच्छा बर आउर हरकोनी बड़ीया दान उपर ची ले आय, आउर ज्योतिमन चो बुआ चो बाटले मिरू आय, जोन थाने ना तो कोनी बदलाव होऊक सके, आउर ना अदला बदला चो लागुन हुन थाने छांय पडु आय। 18 हुन आपलो ची इच्छा ले आमके सत चो बचन चो दुवारा उपजास करलो, बल्ले आमी हुनचो बनालो बिती तीजमन थानले गोटक परकार चो पईल फर होऊ। सुनतोर आउर हुन थाने चलतोर 19 ऐ मोचो लाड़रा भाईमन, ऐ गोठ तुमी जाना, हरकोनी माने सुनतो काजे झटके आउर बोलतो ने धीरान आउर रीस ने धीरे हुआ, 20 कसनबल्लोने माने चो रीस माहापुरू चो धरम चो पालन नी करूक सके। 21 ऐईकाजे सपाय घिन-घिना आउर बईरभाव चो बाड़ती के धुर करून, हुन बचन के नम्रता ले गरहन करा जोन कारजा ने बुना गेली आउर जोन तुमचो परानमन चो मुक्ति करूक सके। 22 मान्तर बचन थाने चलतो बिता बना, आउर मात्र सुनतो बिता ची नाई जोन आपन खुद के धोका देऊ आत। 23 कसनबल्लोने जोन कोनी बचन चो सुनतो बिता होओ आउर हुन थाने चलतो बिता नी होओ, तेबे हुन-हुन माने चो असन आय जोन आपलो छांय दरपन ने दकु आय। 24 ऐईकाजे कि हुन आपन खुद के दकुन भाती जाते जाऊ आउर तुरते भुलकुन जाऊ आय कि मय कसन रये। 25 मान्तर जोन माने छुटछाड़ा चो सिद्ध नियम थाने धिआन करते रऊ आय, हुन आपलो काम ने ऐईकाजे आशीष पायेदे कि सुनुन भाती भुलकु नुआय मान्तर असने ची काम करू आय। भक्ति चो सत बाट 26 अगर कोनी आपन खुद के भगत समजो आउर आपलो जीब के आपलो अधीन ने नी करे मान्तर आपलो मन के धोका देओ, तो हुनचो भक्ति फकाहा आय। 27 आमचो माहापुरू आउर बुआ चो लगे शुद्ध आउर निंगल भक्ति ऐ आय कि पोरटामन आउर रान्डीमन चो कलेश ने हुनमन चो सुद्धि धरो, आउर आपन खुद के संवसार ले निसकलंक संगाओ। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation