इब्रानियो 8 - Halbi

सरग चो माहायाजक

¹ अदायं जोन गोठमन आमी बोलु से हुनमन थानले सपाय ले बड़े गोठ ऐ आय कि आमचो असन माहायाजक आसे, जोन सरग थाने माहापुरू चो सिंघासन चो उजा जाऊन बसलो से,

² आउर पवितर जगा आउर हुन सत तम्बू चो सेवाकरू होलो जेके कोनी मानेमन नाई, मान्तर परबु उबा करलो से।

³ कसनबल्लोने हरकोनी माहायाजक भेट आउर बलिदान चेगातो काजे ठेबाया जाऊ आय, ऐई कारन जरूर आय कि ऐ याजक चो लगे बले काई चेगातो काजे होओ।

⁴ अगर हुन धरतनी थाने होतो तेबे केबीई याजक नी होतो, ऐईकाजे कि नियम चो अनुसार भेट चेगातो बिता तो आसोत।

⁵ हुनमन सरग थानचो तीजमन चो असनरूप आउर छापामन चो सेवा करू आत; जसन जिदलदाय मूसा तम्बू बनातो थाने रलो, तेबे हुनके ऐ धमकी मिरली, “दक, जोन नमूना तुके डोंगरी थाने दकाया जाऊ रये, हुनचो अनुसार सपाय तीज बनाव।”

⁶ मान्तर हुन याजकमन ले बडुन भाती सेवा ईशु मसीह के मिरली कसनबल्लोने हुन आउर बले बड़ीया बायदा चो मंजी चो ठेबलो, जोन आउर बड़ीया बायदामन चो साहारा बान्दा गेली से।

नवा बायदा

⁷ कसनबल्लोने अगर हुन पयला बायदा बेकसूर होती, तेबे दुसर चो काजे मवका नी डगराया जाति।

⁸ मान्तर हुन हुनमन उपरे दोष लगाऊन भाती बले से, “परबु बले से, दका, हुन दिन ऐये से कि मय इस्राएल चो घरलोगमन चो संगे, आउर यहूदा चो घरलोगमन संगे नवा बायदा बान्दे दे।

⁹ ऐ हुन बायदा चो असन नी होये, जोन मय हुनमन चो पुरखामन चो संगे हुन समया बान्दुन रये, जिदलदाय मय हुनमन चो हाथ धरून भाती हुनमन के मिस्र देश से निकराऊन आनले; कसनबल्लोने हुनमन मोचो बायदा थाने थीर नी रला, ऐईकाजे मय हुनमन चो सुद्धि नी धरले, परबु ऐ बले से।

¹⁰ फेर परबु बले से, कि जोन बायदा मय हुन दिनमन चो पाचे इस्राएल चो घरलोगमन संगे बान्दे दे, हुन ऐ आय कि मय आपलो नियम के हुनमन चो मन ने भरें दे, आउर हुनके हुनमन चो कारजा थाने लिकेन्दे, आउर मय हुनमन चो माहापुरू ठेबें दे आउर हुनमन मोचो लोग ठेबदे।

¹¹ आउर हरकोनी आपलो देश बितामन के आउर आपलो भाई के ऐ सिक्या नी देये, कि तुय परबु के चिताव, कसनबल्लोने नानी ले बड़े सपाय मोके जान दे।

¹² कसनबल्लोने मय हुनमन चो अधरम चो बारे ने दयावन्त होयें दे, आउर हुनमन चो पापमन के फेर सुरता नी करें दें।”

¹³ नवा बायदा चो बनातोर ले हुन पयला बायदा के जुना ठेबाऊन दिलो; आउर जोन तीज जुना आउर टूटा-फुटा होऊन जाऊ आय हुनचो मेटुन जातोर जरूरी आय।