इब्रानियो 7 - Halbiमलिकिसिदक याजक 1 ऐ मलिकिसिदक शालेम चो राजा, आउर परमपरधान माहापुरू चो याजक, हरमेशा याजक बनुन रऊ आय। जिदलदाय अब्राहाम राजामन के मारून भाती फिरून जाते रये, तेबे ऐई हुनके भेट करून हुनके आशीष दिलो। 2 ऐकेई अब्राहाम सपाय तीजमन चो दसवां अंश बले दिलो। ऐ पयले आपलो नाव चो अरत चो अनुसार, धरम चो राजा, आउर फेर शालेम बल्लोने शान्ति चो राजा आय। 3 जेचो ना बुआ, ना आया, ना बंसावली आसे, जेचो दिनमन चो ना मुर आसे आउर ना जीवना चो आखरी आसे; मान्तर माहापुरू चो बेटा चो रूपरंग ठेबुन भाती हुन सदा चो काजे याजक बनुन रऊ आय। 4 अदायं ऐचो थाने धिआन करा कि हुन कसन माहान रलो जेके कुलपती अब्राहाम जटुन अच्छा ले अच्छा माल चो दसवां अंश दिलो। 5 लेवी चो पिलामन थानले जोन याजक चो पन पाऊ आत, हुनमन के हुकुम मिरली से कि लोगमन, बल्लोने आपलो भाईमन ले, भले हुनमन अब्राहाम ची चो देंह ले केंव ना जनमला से, नियम चो अनुसार दसवां अंश धर। 6 मान्तर ऐ, जोन हुनमन चो बंसावलीमन थानो बले नी रलो, अब्राहाम ले दसवां अंश धरलो, आउर जोन के बायदा मिरू रली हुनके आशीष दिलो। 7 ऐ थाने संका निआय कि नानी बड़े ले आशीष पाऊ आय। 8 आउर ऐ तो मरनहार माने दसवां अंश धरू आत, मान्तर हुता हुनी धरू आय जेचो गोहई दीया जाऊ आय कि हुन जीव आसे। 9 तेबे आमी बले बोलुक सकु कि लेवी बले, जोन दसवां अंश धरू आय, अब्राहाम चो दुवारा दसवां अंश दिलो। 10 कसनबल्लोने जोन समया मलिकिसिदक हुनचो बुआ ले भेट करलो, हुन समया हुन आपलो बुआ चो देंह ने रलो। गोटक नवा याजक चो जरूरत 11 अगर लेवी याजक पन चो दुवारा सिद मिरूक सके (जेचो साहारा ले लोगमन के नियम मिरू रली) तेबे फेर काय जरूरत रये कि दुसर याजक मलिकिसिदक चो रीति थाने उबा होओ, आउर हारून चो रीति चो नी बलाय होओ? 12 कसनबल्लोने जिदलदाय याजक पन बदला जाऊ आय, तेबे नियम चो बदलतोर जरूरी आय। 13 कसनबल्लोने जेचो बारे ने ऐ गोठमन बल्ला जाऊ आय कि हुन दुसर गोत्र चो आय, जोन थानले कोनी बले बेदी चो सेवा नी करला, 14 तो परकट आसे कि आमचो परबु यहूदा चो गोत्र थानले उदय होलो से, आउर ऐ गोत्र चो बारे ने मूसा याजक पन चो काई चरचा नी करलो। 15 आमचो दावा आउर बले साफ-साफ ले परकट होऊन जाऊ आय, जिदलदाय मलिकिसिदक चो असन गोटक आउर याजक उपजास होऊन जाऊ आय, 16 जोन शारीरिक हुकुम चो नियम चो अनुसार नुआय, मान्तर अमर जीवना चो सामरत चो अनुसार नियुक्त होलोर रओ। 17 कसनबल्लोने हुनचो बारे ने ऐ गोहई दिया गेली से, “तुय मलिकिसिदक चो रीति थाने जुग-जुग याजक आस।” 18 ऐ परकार, पयला हुकुम कमजोर आउर निसफल होतोर लागुन मेटुन गेली 19 (ऐईकाजे कि नियम कोनी गोठ चो सिद्ध नी करला), आउर हुनचो जगा थाने गोटक असन बड़ीया आशा संगाया गेली से जेचो दुवारा आमी माहापुरू चो लगे जाऊक सकु। नवा माहायाजक चो बड़पन 20 मसीह चो नियुक्ति बिन किरिया नी होली, 21 कसनबल्लोने हुनमन तो बिन किरिया याजक ठेबाया गेला मान्तर ऐ किरिया चो संगे हुनचो बाटले नियुक्त करा गेलो जोन हुनचो बारे ने बल्लो, “परबु किरिया खादलो, आउर हुन हुनचो ले फेर नी पश्ताय दे कि तुय जुग-जुग याजक आस।” 22 ऐ परकार ईशु गोटक बड़ीया बायदा चो जबाबदार ठेबलो। 23 हुनमन तो खुबे बड़े गेनती ने याजक बनते ईला, ऐचो कारन ऐ रये कि मरना हुनमन के रऊक नी देते रली; 24 मान्तर ऐ जुग-जुग रऊ आय, ऐई कारन हुनचो याजक पन अटल आसे। 25 ऐईकाजे जोन हुनचो दुवारा माहापुरू चो लगे ऐऊ आत, हुन हुनमन चो पुरा-पुरा मुक्ति करूक सके, कसनबल्लोने हुन हुनमन चो काजे गुहार करतो काजे हरमेशा जीव आसे। 26 आउर असने ची माहायाजक आमचो लायक रलो जोन पवितर, आउर निष्कपट, आउर निंगल, आउर पापीमन ले अलग, आउर सरग ले बल्ले ऊँचा करलो बिती होओ। 27 हुन माहायाजक मन चो असन हुनके जरूरी नुआय कि रोजे दिना पयले आपलो पापमन आउर फेर लोगमन चो पापमन चो काजे बलिदान चेगा ओ; कसनबल्लोने हुन आपन खुद के बलिदान चेगाऊन भाती हुनके गोटक ची हार ने पुरा करून दिलो। 28 कसनबल्लोने नियम तो कमजोर मानेमन के माहायाजक नियुक्त करू आय, मान्तर हुन किरिया चो बचन, जोन नियम चो पाचे खाया गेली, हुन बेटा के नियुक्त करू आय जोन जुग-जुग चो काजे सिद्ध कराय गेलो से। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation