इब्रानियो 5 - Halbiमाहायाजक काजे लायक 1 कसनबल्लोने हरकोनी माहायाजक मानेमन थानले धरा जाऊ आय आउर मानेमन चो ची काजे, हुन गोठमन चो बारे ने जोन माहापुरू ले सम्बंध संगाऊ आय, ठेबाया जाऊ आय कि भेट आउर पाप पुजा चेगाया करोत। 2 हुन अगिआनीमन आउर भुलक भटक बितामन चो संगे नरमी ले बेवहार करूक सके, ऐईकाजे कि हुन खुद बले कमजोरी ले घिरलो से। 3 ऐईकाजे हुनके जरूरी आय कि जसन लोगमन चो काजे असने ची आपलो काजे बले पाप पुजा चेगा ओत। 4 ऐ ईजीत चो पन कोनी आपन खुद ले नी धरे, जिदलदाय ले कि हारून चो असन माहापुरू चो बाटले ठेबाया नी जाये। सदा काजे माहायाजक 5 असने ची मसीह बले माहायाजक बनतोर बड़ाई आपन खुद ले नी धरलो, मान्तर हुनके हुनी दिलो, जोन हुनके बोलु रलो, “तुय मोचो बेटा आस, आजी मय तुके जनमा ले से।” 6 ऐई परकार हुन दुसर जगा ने बले बोलु आय, “तुय मलिकिसिदक चो रीति थाने अमरता काजे याजक आस।” 7 ईशु आपलो देंह ने रतोर दिनमन ने बड़े जोर ले हाग देऊन हाग देऊन भाती आउर आँसु बहान-बहान भाती हुनचो ले जोन हुनके मरना ले बचाऊक सकते रये, पारथनामन आउर गुहार करलो, आउर भक्ति चो लागुन हुनचो सुना गेली। 8 बेटा होलो थानले बले हुन दुख उठाऊन-उठाऊन भाती हुकुम मानुक सिकलो, 9 आउर सिद्ध बनुन भाती, आपलो सपाय हुकुम मानतो बितामन चो काजे हरमेशा चो मुक्ति चो कारन होऊन गेलो, 10 आउर हुनके माहापुरू चो बाटले मलिकिसिदक चो रीति थाने माहायाजक चो पन मिरली। आत्मिक कमजोरी 11 ऐचो बारे ने आमके खुबे असन गोठमन बोलतोर आसे, जोनमन के समजातोर बले मशकिल आय, ऐईकाजे कि तुमी खुबे सुनुक मुरयालासास। 12 समया चो बिचार ले तो तुमके गुरू होतोर रली, तेबले बले ऐ जरूरी होऊन गेली से कि कोनी तुमके माहापुरू चो बचनमन चो मुर सिक्या फेर ले सिकाओ। तुमी तो असन होऊन गेलासास कि तुमके अरन चो पलटा ऐबे ले गोरस ची जरूरत आसे। 13 कसनबल्लोने गोरस पिवतो बिता पिला के तो धरम चो बचन चो पयचान नी होये, कसनबल्लोने हुन लेका आसे। 14 मान्तर अरन सियानमन जो काजे आय, जेचो गिआन ईन्द्रिमन सुरता करता-करता अच्छा-खराप ने परक करतो ने निपुन होऊन गेलीसे। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation