इब्रानियो 4 - Halbi

आराम ने ओलतोर

¹ ऐईकाजे जिदलदाय कि हुनचो विश्राम ने ओलतोर बायदा ऐबले आसे, तो आमके डरतोर जरूरी आय असन नी होओ कि तुमनमन ले कोनी जन लापी रऊन जाओत।

² कसनबल्लोने आमके हुनीमन चो असन नगतखबर सुनाया गेली से, मान्तर सुनलो बिती बचन ले हुनमन के काई लाब नी होली; कसनबल्लोने सुनतो बितामन चो मन ने बिश्वास चो संगे नी बसली।

³ मान्तर आमी जोनमन बिश्वास करलु से, हुन विश्राम ने ओलुं से; जसन हुन बल्लो, “मय आपलो रीस ने किरिया खादले कि हुनमन मोचो विश्राम ने ओलुक नी सकदे।” अगर जगत चो उपजास चो समया ले हुनचो काम पुरा होऊन रये।

⁴ कसनबल्लोने सातवां दिन चो बारे ने हुन काहांय असन बल्लो से, “माहापुरू सातवां दिन आपलो सपाय काममन के निपटाऊन भाती विश्राम करलो।”

⁵ आउर ऐ जगा फेर ये बले से, “हुनमन मोचो विश्राम ने ओलुक नी सकदे।”

⁶ तेबे जसन ऐ गोठ बाकी आसे कि कितलो आउर आसोत जोन हुन विश्राम ने परवेश करो, आउर जेके हुनचो नगतखबर पयले सुनाया गेली हुनमन हुकुम नी मानतोर लागुन हुन थाने ओलला,

⁷ ऐईकाजे हुन कोनी खास दिन के ठेबाऊन भाती ईतलो दिन चो पाचे दाऊद चो किताब ने हुनके “आजी चो दिन” बले से। जसन पयले बोला गेली, “अगर आजी तुमी हुनचो शब्द सुना, तो आपलो मन-मन के कठोर नी करा।”

⁸ कसनबल्लोने अगर यहोशु हुनमन के विश्राम ने ओलाऊन देतो, तेबे हुनचो पाचे दुसर दिन चो चरचा नी होती।

⁹ आउर जाना कि माहापुरू चो लोगमन चो काजे सब्त चो विश्राम बाकी आसे;

¹⁰ कसनबल्लोने जोनमन हुनचो विश्राम ने ओलला से, हुन बले माहापुरू चो असन आपलो काममन के पुरा करून विश्राम करलो से।

¹¹ आउर आमी हुन विश्राम ने ओलतोर कोशिश करूं, असन नी होओ कि कोनी झन हुनमन चो असन हुकुम नी मानुन भाती घसरुन पड़ोत।

¹² कसनबल्लोने माहापुरू चो बचन जीव, आउर परबल, आउर हरकोनी दुयधारी तलवार ले बले खुबे तेज आय; आउर परान आउर आत्मा के, आउर गट-गट आउर गुदा-गुदा के अलग करून ऐ पाट-हुनपाट भेदु आय आउर मन चो खियाल मन के आउर बिचारमन के जांचु आय।

¹³ ब्रमांड चो कोनी तीज हुनचो ले लुकली से नाजुन मान्तर जेचो ले आमके काम आसे, हुनचो आँईकमन चो पुरे सपाय तीजमन खुललोर आउर परकट आसे।

आमचो बड़े माहायाजक

¹⁴ ऐईकाजे जसन आमचो असन बड़े माहायाजक आसे, जोन सरगमन ले होऊन भाती गेलोसे, बल्लोने माहापुरू चो बेटा ईशु, तो ईआ, आमी आपलो अंगीकार के मजबूत ले थामुन रऊं।

¹⁵ कसनबल्लोने आमचो असन माहायाजक नुआय जोन आमचो कमजोरीमन ने आमचो संगे दुकी नी होऊक सको; मान्तर हुन सपाय गोठमन ने आमचो असन परका तो गेलो, तेबे बले पाप नी निकरली।

¹⁶ ऐईकाजे ईआ, आमी अनुग्रह चो सिंघासन चो लगे हिम्मत बान्दुन भाती चलुं कि आमचो उपरे दया होओ, आउर हुन अनुग्रह पाऊं जोन जरूरत चो समया आमचो सहायता करो।