इब्रानियो 3 - Halbi

मूसा बिश्वास लायक दास: मसीह बिश्वास लायक बेटा

¹ ऐईकाजे हे पवितर भाईमन, तुमी जोन सरग चो बुलाहट ने भागी आसास, हुन पठालोबिता आउर माहायाजक ईशु थाने जेके आमी अंगीकार करूं आंव, धिआन करा।

² हुन आपलो नियुक्त करू बितामन चो काजे बिश्वास लायक रलो, जसन मूसा बले माहापुरू चो पुईतराय घर ने रये।

³ कसनबल्लोने ईशु मूसा ले ईतलो बडुन भाती महिमा चो लायक समजा गेलो से, जितरो कि घर चो बनातो बिता घर ले बडुन भाती ईजीत संगाऊ आय।

⁴ कसनबल्लोने हरकोनी घर चो कोनी ना कोनी बनाऊ बिता होऊ आय, मान्तर जोन सपाय काई के बनालो हुन माहापुरू आय।

⁵ मूसा तो माहापुरू चो पुईतराय घर ने सेवक चो असन बिश्वास लायक रलो कि जोन गोठमन चो वर्णन होतो बिती रये, हुनचो गोहई देओ।

⁶ मान्तर मसीह बेटा चो असन माहापुरू चो घर चो अधिकारी आय; आउर हुनचो घर आमी आव, अगर आमी साहास थाने आउर आपलो आशा चो घमण्ड थाने आखरी ले मजबूत ले थीर रवां।

अबिश्वास काजे जनातोर

⁷ आउर जसन पवितर आत्मा बोलु आय, “अगर आजी तुमी हुनचो शब्द सुना,

⁸ तो आपलो मन के कठोर नी करा, जसन कि रीस दिआतोर समया आउर परीक्षा चो दिने रान ने करू रला।

⁹ जोन थाने तुमचो पुरखामन मोके जांचुन भाती परकला आउर-चालीस बरक ले मोचो काम दकला।

¹⁰ ऐई लागुन मय हुन समया चो लोगमन ले रीस रले, आउर बल्लो, ‘ऐमन चो मन हरमेशा भटकते रऊ आय, आउर ऐमन मोचो बाटमन के नी चिताला।’

¹¹ तेबे मय रीस होऊन भाती किरिया खादले, ‘हुनमन मोचो विश्राम ने ओलुक नी सकदे।’”

¹² हे भाईमन, चेत करून रहा कि तुमनमन ने असन खराप आउर अबिश्वासीमन नी होओत, जोन तुमी के जीवता माहापुरू ले लापी गुचाऊन नेओत।

¹³ मान्तर जोन दिन ले आजी चो दिन बल्ला जाऊ आय, हरदिन गोटक दुसर के समजाते राहा, असन नी होओ कि तुमनमन ले कोनी जन पाप चो छंद ने ऐऊन भाती कठोर होऊन जाओत।

¹⁴ कसनबल्लोने आमी मसीह चो शामिल होलु से, अगर आमी आपलो पयला भरसा थाने आखरी ले मजबूत ले थीर रवां।

¹⁵ जसन बोला जाऊ आय, “अगर आजी तुमी हुनचो शब्द सुना, तो आपलो मन-मन के कठोर नी करा, जसन कि रीस दिआतोर समया करू रला।”

¹⁶ अच्छा कोन लोगमन सुनुन भाती बले रीस दियाला? काय हुन सपाय नुआत, जोन मूसा चो दुवारा मिस्र ले निकरून रवत?

¹⁷ आउर हुन चालीस बरक ले कोन लोगमन ले रिसे रलो? काय हुनीमन ले नुआय जोनमन पाप करला, आउर हुनमन चो लाश रान ने पडुन रये?

¹⁸ आउर हुन कोनमन ले किरिया खादलो कि तुमी मोचो विश्राम ने ओलुक नी सकासे? काय मात्र हुनमन ले नुआय जोनमन हुकुम नी मानला?

¹⁹ आउर आमी दकु से कि हुनमन अबिश्वास चो लागुन ओलुक नी सकला।