इब्रानियो 2 - Halbiमुक्ति के नी मानतोर बिरूद ने जनातोर 1 ऐेई लागुन जरूरी आय कि आमी हुन गोठमन थाने जोन आमीमन सुनलु से, आउर बले मन लगाऊं, असन नी होओ कि भहकुन भाती हुनमन ले लापी जाते जाऊं। 2 कसनबल्लोने जोन बचन सरग दूतमन चो दुआरा बोला जाऊ रये। जिदलदाय हुन थीर रलो आउर हरकोनी अपराध आउर हुकुम नी मानतोर ठीक-ठीक पलटा मिरली, 3 तेबे आमी लोग असन बड़े मुक्ति ले बेफिकर रऊन भाती कसन बाचुक सकु आंव? जेचो चरचा पयले पहल परबु चो दुवारा होली, आउर सुनतो बितामन चो लागुन आमके येचो तय होली। 4 आउर संगे ची माहापुरू बले आपलो इच्छा चो अनुसार चिनामन, आउर भयंकर काममन, आउर नाना परकार चो सामरत चो काममन, आउर पवितर आत्मा चो बरमन के बाटतोर लागुन ऐचो गोहई देते रलो। 5 हुन-हुन ऐतो बिती जगत चो जेचो चरचा आमी करूंसे, सरग दूतमन चो अधीन नी करलो। 6 मान्तर कोनी काहांय ऐ गोहई दिलासे, “माने काय आय कि तुय हुनचो सुद्धि धरू आस? नाहले माने चो बेटा काय आय कि तुय हुनचो चिन्ता करू आस? 7 तुय हुनके सरग दूतमन ले खिन्डिक ची कम करलीस; तुय हुनचो उपरे महिमा आउर ईजीत चो मुकुट संगालीस, आउर हुनके आपलो हाथमन चो काममन थाने अधिकार दिलीस। 8 तुय सपाय काई हुनचो पाँयमन खाले करून दिलीस।” ऐईकाजे जसन कि हुन सपाय काई हुनचो अधीन करून दिलो, तेबे हुन काई बल्ले संगाऊन नी छांडलो जोन हुनचो अधीन नी होये। मान्तर आमी ऐबे ले सपाय काई हुनचो अधीन नी दकुं। 9 मान्तर आमी ईशु के जोन सरग दूतमन ले खिन्डिक ची कम करा जाऊ रलो, मरना चो दुख उठातोर लागुन महिमा आउर ईजीत चो मुकुट पिन्दलोर दकुं से, बल्ले माहापुरू चो अनुग्रह ले हुन हरकोनी माने चो काजे मरना चो सुआद चाको। 10 कसनबल्लोने जेचो काजे सपाय काई आसे आउर जेचो दुवारा सपाय काई आसे, हुनके ऐई अच्छा लागली कि जिदलदाय हुन खुबे असन बेटामन के महिमा ने अमराओ, तेबे हुनमन चो मुक्ति चो करता के दुक उठातोर लागुन सिद्ध करो। 11 कसनबल्लोने पवितर करतो बिता आउर जोन पवितर कराया जाऊ आत, सपाय गोटक ची मुर ले आत; ऐई लागुन हुन हुनमन के भाई बोलतोर ले नी लाज होये। 12 हुन बोलु आय, “मय तुचो नाव आपलो भाईमन के सुनाय दे; सभा चो मंजी ने मय तुचो भजन गायें दे।” 13 आउर फेर ऐ, “मय हुनचो उपरे भरसा संगायें दे।” आउर फेर ऐ, “दक, मय हुन लेकामन संगे जेके माहापुरू मोके दिलो।” 14 ऐईकाजे जसन कि लेकामन मास आउर लऊ चो भागी आत, तेबे हुन खुद बले हुनमन चो असन हुनमन चो शामिल होऊन गेलो, बल्ले मरना चो दुवारा हुनके जेके मरना उपरे शक्ति मिरून रये, बल्लोने शयतान के ठग करून देओ; 15 आउर जितरो मरना चो भय चो मारे जीवभर गुलामी ने फसुन रवत, हुनमन के छंडाओ। 16 कसनबल्लोने हुन तो सरग दूतमन के नाई मान्तर अब्राहाम चो बंश के समालु आय। 17 ऐई कारन हुनके जरूरत रली, कि सपाय गोठमन ने आपलो भाईमन चो असन बनो; जेचो ले हुन-हुन गोठमन ने जोन माहापुरू ले सम्बंध संगाऊ आय, गोटक दयालु आउर बिश्वास लायक माहायाजक बनो बल्ले लोगमन चो पापमन चो काजे पश्ताओ। 18 कसनबल्लोने जिदलदाय हुन परीक्षा चो दसा ने दुख उठालो, तेबे हुन हुनमन चो बले सायता करूक सके जेचो परीक्षा होऊ आय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation