इब्रानियो 13 - Halbiगरहन लायक सेवा 1 भाईचारा चो मया बनु रओ। 2 आवभगत करतोर नी भुलका, कसनबल्लोने ऐचो लागुन कितरो लोगमन नी जानुन सरग दूतमन चो ईजीत मान करला सोत। 3 कयदीमन चो असन सुद्धि धरा कि माना हुनमन चो संगे तुमी बले कयदी आस, आउर जोनमन चो संगे खराप बेवहार करा जाऊ आय, हुनमन चो बले ऐ समजुन भाती सुद्धि धरा करा कि आमचो बले देंह आय। 4 बिआ सपाय ने ईजीत चो गोठ समजा जाओ, आउर बिहा ओचना निसकलंक रओ, कसनबल्लोने माहापुरू बेबीचारीमन, आउर दुसर चो बायले नेतो बितामन चो नियाय करेदे। 5 तुमचो स्वभाव ने लालच नी रओ, आउर जोन तुमचो लगे आसे हुनी थाने सन्तोष करा; कसनबल्लोने हुन खुद ची बल्लो से, “मय तुके केबीई नी छांडेदे, आउर ना केबीई तुके ठुकरायेंदे।” 6 ऐईकाजे आमी निडर होऊन भाती बोलु आंव, “परबु मोचो सायक आय, मय नी डरें दे; माने मोचो काय करूक सके।” 7 जोन तुमचो अगुवामन रवत, आउर जोनमन तुमके माहापुरू चो बचन सुनाला, हुनमन के सुरता संगाहा; आउर धिआन ले हुनमन चो चाल-चलन चो आखरी दकुन भाती हुनमन चो बिश्वास चो नकल करा। 8 ईशु मसीह काली आउर आजी आउर जुग-जुग गोटक समान आय। 9 नाना परकार चो भयंकर उपदेशमन ले नी भरमाया जाआ, कसनबल्लोने मन चो अनुग्रह ले जमखम रतोर अच्छा आय, ना कि हुन खातोर तीजमन ले जेचो ले काम संगातो बितामन के काई लाब नी होली। 10 आमचो गोटक असन बेदी आसे जोन थानले खातोर अधिकार हुन लोगमन के निआय, जोन तम्बू चो सेवा करू आत। 11 कसनबल्लोने जोन पशुमन चो लऊ माहायाजक पाप-पुजा चो काजे पवितर जगा ने धरून जाऊ आय, हुनमन चो देंह छांवनी चो बाहरे जलाया जाऊ आय। 12 ऐई लागुन, ईशु बले लोगमन के आपलो ची लऊ चो दुवारा पवितर करतो काजे कपाट चो बहारे दुख उठालो। 13 ऐईकाजे ईआ, हुनचो निन्दा आपलो उपरे धरून भाती, छांवनी चो बाहरे हुनचो लगे निकरून जो। 14 कसनबल्लोने ऐथा आमचो कोनी थीर नंगर निआय, मान्तर आमी गोटक ऐतो बिती नंगर चो खोज ने आंसु। 15 ऐईकाजे आमी हुनचो दुवारा स्तुति रूपी बलिदान, बल्लोने हुन होटमन चो फल जोन हुनचो नाव चो अंगीकार करू आत, माहापुरू के हरमेशा चेगाया करोत। 16 भलाई करतोर आउर उदारता दकातोर नी भुलका, कसनबल्लोने माहापुरू असन बलिदानमन ले हरिक होऊ आय। पारथना चो गुहार 17 आपलो अगुवामन चो हुकुम माना आउर हुनमन चो अधीन राहा, कसनबल्लोने हुनमन-हुनमन चो असन तुमचो जीवमन चो काजे चेता रऊ आत जोनमन के लेखा देऊक पड़ेदे; हुनमन ऐ काम हरिक ले करोत, ना सितर फुंडा धरून-धरून भाती, कसनबल्लोने ऐ दसा ने तुमके काई लाब निआय। 18 आमचो काजे पारथना करते राहा, कसनबल्लोने आमके भरसा आसे कि आमचो बिबक शुद्ध आय आउर आमी सपाय गोठमन ने अच्छा चाल चलुक चाहाऊं से। 19 पारथना करतो काजे मय तुमके आउर बले समजायें से कि मय झटके तुमचो लगे फेर ऐऊक सकें। आशिर्बाद 20 अदायं शान्ति देऊ माहापुरू, जोन आमचो परबु ईशु के जोन मेंडामन चो बड़े राका करू आय हरमेशा बायदा चो लऊ चो गुन ले मरलो बितामन थानले जियाऊन भाती धरून ईलो, 21 तुमके हरकोनी अच्छा गोठ ने सिद्ध करोत, जेचो ले तुमी हुनचो इच्छा पुरा करा, आउर जोन काई हुनके भाऊ आय हुनके ईशु मसीह चो लागुन आमचो ने उपजास करोत। हुनचेई महिमा जुग-जुग होते रओ। आमीन। 22 हे भाईमन, मय तुमचो ले बिनती करेंसे कि ऐ उपदेश चो गोठमन के साहा, कसनबल्लोने मय तुमके खुबे नगत ले लिकले से। 23 तुमके ऐ मालुम होओ कि तीमुथियुस, आमचो भाई छुटुन गेलो से आउर अगर हुन झटके ऐयेदे तो मय हुनचो संगे तुमचो ले भेट करेंदे। 24 आपलो सपाय अगुवामन आउर सपाय पवितर लोगमन के जुहार बोला। इटली बितामन तुमके जुहार बले सोत। 25 तुमी सपाय उपरे अनुग्रह होते रओ। आमीन। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation