इब्रानियो 12 - Halbiधीरज चो बुलाहट 1 ऐई लागुन जसन कि गोहईमन चो असन बड़े बादरी आमके गोंडरा मारली से, तेबे ईआ, हरकोनी ठेबातो बिती तीज आउर गुपातो बिती पाप के लापी करून, हुन परानी जोन थाने आमके परातोर आय धीरज ले पराऊँ, 2 आउर बिश्वास करू आउर सिद्ध करू बिता ईशु चो बाटे दकते रवां, जोन हुन हरिक चो काजे जोन हुनचो पुरे धरून रये, लाज चो काई चिन्ता नी करून कुरूस चो दुख सहलो, आउर माहापुरू चो सिंघासन चो उजा बाटे जाऊन बसलो। माहापुरू चो बाटले ताड़ना 3 ऐईकाजे हुनचो उपरे धिआन करा, जोन आपलो बिरूद ने पापीमन चो ईतलो गोठ-बात सहलो कि तुमी मुरमुरा होऊन भाती साहास नी छांडुन दिआस। 4 तुमनमन पाप ले लड़ते-लड़ते हुनचो ले असन लड़ीई नी करलो कि तुमचो लऊ बोहड़ली; 5 आउर तुमी हुन उपदेश के, जोन तुमके बेटामन चो असन दिया जाये से, भुलकुन गेलासास “हे मोचो बेटा, परबु चो ताड़ना के उसास गोठ नी जान, आउर जिदलदाय हुन तुके धमकाय दे तेबे साहास नी छांड़। 6 कसनबल्लोने परबु जेचो ले मया करू आय, हुनचो ताड़ना बले करू आय, आउर जोन के बेटा बनाऊ आय, हुनके कोड़ा बले लगाऊ आय।” 7 तुमी दुख के ताड़ना समजुन भाती सहन करा; माहापुरू तुमके बेटा जानुन भाती तुमचो संगे बरताव करू आय। हुन कोन बेटा आय जेचो ताड़ना बुआ नी करे? 8 अगर हुन ताड़ना जेचो शामिल सपाय होऊ आत, तुमचो नी होली तेबे तुमी बेटा नुआहास, मान्तर बेबीचार चो पिला ठेबलास। 9 फेर जिदलदाय कि आमचो शारीरिक बुआ बले आमचो ताड़ना करते रये आउर आमी हुनचो ईजीत करलु, तेबे काय आत्मामन चो बुआ चो आउर बले अधीन नी रओत जेचो ले आमी जीव रवां। 10 हुनमन तो आपलो-आपलो समज चो अनुसार खिन्डिक दिनमन चो काजे ताड़ना करते रओत, मान्तर हुन तो आमचो लाब चो काजे करू आय, कि आमी बले हुनचो पवितरता चो भागी होऊन जाऊँ। आत्मिक जीवना शक्ति चो नवा होतोर 11 हाल ने हर परकार चो ताड़ना हरिक चो नुआय, मान्तर दुख ची चो गोठ दका पड़े से; तेबे बले जोन हुनके सहते-सहते पक्का होऊन गेला सोत, पाचे हुनमन के असतीर चो संगे धरम चो करलो फल मिरू आय। 12 ऐईकाजे ढ़िलंग हाथमन आउर कमजोर मांडीमन के सलक करा, 13 आउर आपलो पाँयमन चो काजे सलक बाट बनाहा कि खोड़ीया भटकुन नी जाओत मान्तर भला चेंगा होऊन जाओत। 14 सपाय ले मेल मिलाप संगाहा, आउर हुन पवितरता चो खोजी हुआ जेचो बिना कोनी परबु के केबे नी दक दे। 15 धिआन ले दकते राहा, असन नी होओ कि कोनी माहापुरू चो अनुग्रह ले लापी रऊन जाओ, नाहले कोनी पीता चेर फुटुन भाती दुख देओ, आउर हुनचो लागुन खुबे असन लोग अशुद्ध होऊन जाओत। 16 असन नी होओ कि कोनी जन बेबीचारी, नाहले एसाव चो असन अधरमी होओ जोन गोटक हार चो भात चो पलटा आपलो पयलवात होतोर पन बिकुन दिलो। 17 तुमी जानेसास कि पाचे जिदलदाय हुन आशिष पाऊक चाह लो तेबे बेकार गेना गेलो, आउर आँसु बोहड़ाऊन-बोहड़ाऊन भाती डगरातो थाने बले मन फिराव चो मवका हुनके नी मिरली। 18 तुमी तो हुन डोंगरी चो लगे, जोन छिंऊक होते रये, आउर आईग ले बरते रली, आउर करया बादरी, आउर अंधार, आउर लेहरा धुका चो लगे, 19 आउर तुरी चो शब्द, आउर बोलतो बितामन चो असन शब्द चो लगे नी ईला, जेके सुनतो बितामन बिनती करला कि अदायं आमचो ले आउर गोठमन नी करा जाओ। 20 कसनबल्लोने हुनमन हुन हुकुम के नी सऊक सकला “अगर कोनी पशु बले डोंगरी के छिंये तो हुनचो उपरे पकना मारा जाओ।” 21 मान्तर हुन दरशन असन डरतो असन रये कि मूसा बल्लो, “मय खुबे डरू आंय आउर थरथरु आंय।” 22 मान्तर तुमी सिय्योन चो डोंगरी चो लगे, आउर जीवता माहापुरू चो नंगर, सरग चो यरूशलेम, चो लगे आउर लाखो सरग दूतमन 23 आउर हुन पयलवातमन चो सादा सभा आउर कलीसिया, जोनमन चो नाव सरग ने लिकलोर आसे, आउर सपाय चो नियाय करू माहापुरू चो लगे, आउर सिद्ध करलो बिती धरमीमन चो आत्मामन, 24 आउर नवा बायदा चो मंजारे ईशु आउर छिंचलोर हुन लऊ चो लगे ईलासास, जोन हाबिल चो लऊ ले बड़ीया गोठमन बोलु आय। 25 खबड़दार रहा, आउर हुन बोलतो बितामन ले मुंह नी मोड़ा, कसनबल्लोने हुन लोगमन जिदलदाय धरतनी थानो चो धमकी देतो बितामन ले मुंह मोडुन भाती नी बाचुक सकला, तेबे आमी सरग थानले धमकी देतो बिता ले मुंह मोडुन भाती कसन बाचुक सकवां? 26 हुन समया तो हुनचो शब्द धरतनी के हलान दिली, मान्तर अदायं हुन ऐ बायदा करलो से, “गोटक हार फेर मय ना मात्र धरतनी के बले मान्तर बादरी के बले हलान देयें दे।” 27 आउर ऐ पद “गोटक हार फेर” ऐ गोठ के परकट करू आय कि जोन तीजमन हलाया जाऊ आय, हुनमन बनालो बिती तीजमन होतोर लागुन गुचुन जाये दे; बल्ले जोन तीजमन हलाया नी जाये, हुनमन अटल बनुन रओ। 28 ऐई लागुन आमी ऐ राज के पाऊन भाती जोन हलु नुआय बनालोर होओ, आउर भक्ति आउर भय संगे माहापुरू चो असन आराधनाकरू जेचो ले हुन हरिक होऊ आय; 29 कसनबल्लोने आमचो माहापुरू भसम करतो बिती आईग आय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation