इब्रानियो 11 - Halbiबिश्वास चो नेता 1 अदायं बिश्वास आशा करलो बिती तीजमन चो तय, आउर नी दकलो बिती तीजमन चो सबुत आय। 2 कसनबल्लोने ऐचीई बारे ने सियानमन चो अच्छा गोहई दिया गेली। 3 बिश्वास ची ले आमी जानु सकु कि सपाय ब्रमांड चो रचना माहापुरू चो बचन चो दुवारा होली से। मान्तर ऐ नुआय कि जोन काई दकतो ने ऐये से, हुन दकलो बिती तीजमन ले बनु रओ। 4 बिश्वास ची ले हाबिल कैन ले बड़ीया बलिदान माहापुरू चो काजे चेगालो, आउर हुनचेई दुवारा हुनचो धरमी होतोर गोहई बले दिया गेली, कसनबल्लोने माहापुरू हुनचो भेटमन चो बारे गोहई दिलो; आउर हुनचेई दुवारा हुन मरलो थानले बले ऐबे ले गोठयाऊ आय। 5 बिश्वास ची ले हनोक उठाया गेलो कि मरना के नी दको, आउर हुनचो पता नी मिरली कसनबल्लोने माहापुरू हुनके उठाऊन नेऊ रये, आउर हुनचो उठाया जातोर ले पयले हुनचो ऐ गोहई दिया जाऊ रली कि हुन माहापुरू के हरिक करलो से। 6 आउर बिश्वास बिना हुनके हरिक करतोर नी होऊक सके; कसनबल्लोने माहापुरू चो लगे ऐतो बितामन के बिश्वास करतोर आय कि हुन आसे, आउर आपलो डगरातो बितामन के करलो फल देऊ आय। 7 बिश्वास ची ले नूह हुन गोठमन चो बारे ने जोन हुन समया दका नी पड़ते रली, धमकी पाऊन भाती भक्ति चो संगे आपलो घरलोगमन चो बचाव काजे जाहाज बनालो, आउर हुनचो दुवारा हुन संवसार के दोषी ठेबालो; आउर हुन धरम चो हकदार होलो जोन बिश्वास ले होऊ आय। 8 बिश्वास ची ले अब्राहाम जिदलदाय हाग दिया गेलो तेबे हुकुम मानुन भाती असन जगा निकरून गेलो जेके हक ने धरू बिता रलो; आउर ऐ नी जानते रलो कि मय कोन बाटे जायें से, तेबले बले निकरून गेलो। 9 बिश्वास ची ले हुन बायदा करलो बिती देश ने, दुसर देश ने परदेशी चो असन, रऊन भाती इसाक आउर याकूब संगे, जोन हुनचो संगे हुनी बायदा चो हकदार रवत, तम्बूमन ने वास करला। 10 कसनबल्लोने हुन थीर पाया बिती नंगर चो बाट टाकते रलो, जेचो बनातो बिता आउर बनातो बिता माहापुरू आय। 11 बिश्वास ले सारा खुद डोकरी होलो थाने बले गरब धारन करतोर सामरत पावली, कसनबल्लोने हुन बायदा करू बिता के सत जानु रये। 12 ऐई लागुन गोटक ची झन ले, जोन मरलो बिती असन रये, बादरी चो तारामन आउर समुन्द चो रेटे चो बारू चो असन गेनती नाहलो बंश उपजास होला। 13 ऐ सपाय बिश्वास ची चो दसा ने मरला; आउर हुन बायदा करलो बिती तीजमन नी पावला, मान्तर हुनमन के दूर ले दकुन भाती हरिक होला आउर मानला कि आमी धरतनी थाने परदेशी आउर बाहरी आंव। 14 जोन असन गोठमन बोलु आत, हुनमन परकट करू आत कि खुद देश चो खोज ने आसोत। 15 आउर जोन देश ले हुनमन निकरून ऐऊ रवत, अगर हुनचो सुद्धि करता तो हुनमन के बाहाडून जातोर मवका रये। 16 मान्तर हुनमन गोटक बड़ीया बल्लोने सरगर देश चो इच्छुक आत; ऐईकाजे माहापुरू हुनमन चो माहापुरू बलाय जातो ने हुनमन ले नी लाज होये, कसनबल्लोने हुन हुनमन चो काजे गोटक नंगर तिआर करलो से। 17 बिश्वास ची ले अब्राहाम परका जातोर समया ने, इसाक के बलिदान चेगालो; आउर जोन बायदामन के सत मानु रये 18 आउर जेचो ले ऐ बोला जाऊ रये, “इसाक ले तुचो बंश बलाय जाय दे,” हुनी आपलो ऐकला बेटा के चेगाऊक मुरयालो। 19 कसनबल्लोने हुन मानलो, कि माहापुरू सामरती आय कि हुनके मरलो बितामन थानले जिआलो; आउर हुनीमन थानले कहनी चो रीति थाने हुन हुनके फेर मिरली। 20 बिश्वास ची ले इसाक याकूब आउर एसाव के ऐतो बिती गोठमन चो बारे ने आशीष दिलो। 21 बिश्वास ची ले याकूब मरतो बेरा यूसुफ चो दुनो बेटामन थानले गोटक-गोटक के आशीष दिलो, आउर आपलो बड़गी चो मुंडी थाने साहारा धरून भाती पाँय पड़लो। 22 बिश्वास ची ले यूसुफ, जिदलदाय हुन मरतो थाने रये, तेबे इस्राएल चो पिलामन चो निकरून जातोर चरचा करलो, आउर आपलो हाड़ामन चो बारे ने हुकुम दिला। 23 बिश्वास ची ले मूसा चो आया बुआ हुनके, उपजास होलोर पाचे तीन मयना ले लुकाऊन संगाला, कसनबल्लोने हुनमन दकला कि लेका सुन्दर आय, आउर हुनमन राजा चो हुकुम ले नी डरला। 24 बिश्वास ची ले मूसा सियान होऊन भाती फिरोन चो बेटी चो बेटा बलाय होतोर ले इन्कार करलो। 25 ऐईकाजे कि हुनके पाप ने खिन्डिक दिन चो सुक भोगतोर ले माहापुरू चो लोगमन चो संगे दुख भोगतोर आउर बले बड़ीया लागली। 26 हुन मसीह चो लागुन निन्दा होतो काजे मिस्र चो भण्डार ले बड़े धन समजलो, कसनबल्लोने हुनचो आँईक फल पावतोर बाटे लागुन रये। 27 बिश्वास ची ले राजा चो रीस ले नी डरून भाती हुन मिस्र के छांडुन दिलो, कसनबल्लोने हुन नी दकलोर माना दकुन भाती मजबूत रलो। 28 बिश्वास ची ले हुन फसह आउर लऊ छिंचतोर बिदी मानलो, कि पयलवातमन चो नाश करतो बिता इस्राएलीमन उपरे हाथ नी डालोत। 29 बिश्वास ची ले हुनमन लाल समुन्द चो पार असन उतरून गेला, जसन सुकलो भूईं थानले; आउर जिदलदाय मिस्रीमन असने ची करूक चाहला तेबे सपाय बुडून मरला। 30 बिश्वास ची ले यरीहो चो बाड़ा, जिदलदाय हुनमन सात दिन ले हुनचो चक्कर लगाऊन चुकला, तेबे हुन घसरुन पढ़ली। 31 बिश्वास ची ले राहाब बेश्या हुकुम नी मानतो बितामन चो संगे नष्ट नी होली, ऐईकाजे कि हुन कुटनमन के हरिक ले संगाऊन रये। 32 अदायं आउर काय बोलु आंय? कसनबल्लोने समया नी रली कि गिदोन चो, आउर बाराक आउर शिमशोन चो, आउर यिफतह चो, आउर दाऊद आउर शमूएल चो, आउर अगम गिआनीमन चो वर्णन करें दें। 33 ऐमन बिश्वास ची चो दुवारा राज जीतला; धरम चो काम करला; बायदा करलो बिती तीज परापत करला; डुरकामन चो मुंह बन्द करला; 34 आईग चो आंच के सितराला; तलवार चो धार ले बाचुन निकरला; कमजोरी ने बलवन्त होला; लड़ीई ने बीर निकरला; परदेशियामन चो पलटनमन के मारून खेदला। 35 बायले लेकीमन आपलो मरलो बितामन के फेर जीव पावला; कितलो तो मार खाते-खाते मरून गेला आउर छुटकारा नी चाहला, ऐईकाजे कि बड़ीया जीव उठतोर चो भागी होओत। 36 कितलो झन मजाक ने उड़ाया जातोर; आउर कोड़ा खातोर मान्तर बान्दा जातोर, आउर कयद ने पड़तोर लागुन परका गेला। 37 पकना मारा गेला; आरा ले चीरा गेला; हुनमन चो परीक्षा करा गेली; तलवार ले मारा गेला; हुनमन कंगाली ने, आउर कलेश ने, आउर दुख भोगते-भोगते मेंडामन आउर बकड़ीमन चो खाला ओडून भाती, ऐ बाटे हुन बाटे गलिन-गलिन फिरला; 38 आउर रानमन, आउर डोंगरीमन, आउर करपनमन ने, आउर धरतनी चो डांगरामन ने भटकते फिरला। संवसार हुनमन चो लायक नी रये। 39 बिश्वास ची चो दुवारा ऐ सपाय जो बारे ने अच्छा गोहई दिया गेली तेबले बले हुनमन के बायदा करलो बिती तीज नी मिरली। 40 कसनबल्लोने माहापुरू आमचो काजे पयले ले गोटक बड़ीया गोठ ठेबालो, कि हुनमन आमचो बिना सिद्धता के नी पहुँचोत। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation