इब्रानियो 10 - Halbiपशु चो बलिदान नी पुरे 1 कसनबल्लोने नियम, जोन थाने ऐतो बिती अच्छा तीजमन चो परतिबिम्ब आय मान्तर हुनमन चो असली रूप-रंग नुआय, ऐईकाजे हुन गोटक ची परकार चो बलिदानमन चो बाटले जोन हर बरक अचूक चेगाया जाऊ आय, लगे ऐतो बितामन के केबीई सिद्ध नी करूक सके। 2 नाहले हुनमन चो चढ़ावा बन्द केंव नी होऊन जाति? ऐईकाजे जिदलदाय सेवा करतो बितामन गोटक ची हार शुद्ध होऊन जाता, तेबे फेर हुनमन चो बिबक हुनमन के पापी नी ठेबाती। 3 मान्तर हुनमन चो दुवारा हर बरक पापमन चो सुरता ऐऊ आय। 4 कसनबल्लोने ऐ नी होतो बिती आय कि बयलामन आउर बोकड़ामन चो लऊ पापमन के लापी करो। मसीह चो बलिदान पुरली 5 ऐई लागुन मसीह जगत ने ऐतो समया बले से, “बलिदान आउर भेट तुय नी चाह लीस, मान्तर मोचो काजे गोटक देंह तिआर करलीस। 6 होमबलिमन आउर पाप पुजामन ले तुय हरिक नी होलीस। 7 तेबे मय बल्ले, ‘दक, मय ईले से, पवितर शास्त्र ने मोचो बारे ने लिकलोर आसे, बल्ले हे माहापुरू, तुचो इच्छा पुरा करें दें।’” 8 उपरे तो हुन बले से, “ना तुय बलिदान आउर भेट आउर होमबलिमन आउर पाप पुजामन के चाह लीस, आउर ना हुनमन ले हरिक होलीस,” अगर ऐ बलिदान तो नियम चो अनुसार चेगाया जाऊ आय। 9 फेर ऐ बले बोले से, “दक, मय ईले सें, बल्ले तुचो इच्छा पुरा करें दें,” आउर हुन पयला के उठाऊन देऊ आय, बल्ले दुसर के नियुक्त करो। 10 हुनी इच्छा ले आमी ईशु मसीह चो देंह चो गोटक ची हार-बलिदान चेगाया गेलोर दुवारा पवितर कराया गेलु से। 11 हरकोनी याजक तो उबा होऊन भाती रोजे दिना सेवा करू आय, आउर गोटक ची परकार चो बलिदान के जोन पापमन के केबीई बले लापी नी करूक सके, घन-घन चेगाऊ आय। 12 मान्तर ऐ माने तो पापमन चो पलटा गोटक ची बलिदान हरमेशा चो काजे चेगाऊन भाती माहापुरू चो उजा जाऊन बसलो, 13 आउर हुनी समया ले ऐचो बाट टाके से, कि हुनचो बयरी हुनचो पाँयमन चो खाले चो चौंकी बनोत। 14 कसनबल्लोने हुन गोटक ची चेगावा चो लागुन हुनमन के जोन पवितर करा जाऊ आत, हरमेशा चो काजे सिद्ध करून दिलो से। 15 आउर पवितर आत्मा बले आमके ऐई गोहई देये से; कसनबल्लोने हुन पयले बोलुन रये, 16 “परबु बले से कि जोन बायदा मय हुन दिनमन चो पाचे हुनमन ले बान्दे दें हुन ऐ आय कि मय आपलो नियममन के हुनमन चो कारजा थाने लिकेन्दे आउर मय हुनमन चो समज ने डालें दें।” 17 फेर हुन ऐ बले से, “मय हुनमन चो पापमन के आउर हुनमन चो अधरम चो काममन के फेर केबीई सुरता नी करें दें।” 18 आउर जिदलदाय ऐ मन चो छमा होऊन गेली से, तो फेर पाप चो बलिदान नी रली। साहास चो संगे माहापुरू लगे ओमर 19 ऐईकाजे हे भाईमन, जिदलदाय आमके ईशु चो लऊ चो दुवारा हुन नवा आउर जीवता बाटले पवितर जगा ने ओलतोर हिम्मत होऊन गेली से, 20 जोन हुन परदा बल्लोने आपलो देंह थानले होऊन भाती, आमचो काजे अभिषेक करलो से, 21 आउर ऐईकाजे कि आमचो असन माहान याजक आय, जोन माहापुरू चो घर चो अधिकारी आय, 22 तेबे ईआ, आमी सत मन आउर पुरा बिश्वास चो संगे, आउर बिबक चो दोष लापी करतो काजे कारजा थाने छिड़काव धरून भाती, आउर देंह के शुद्ध पानी ले धुआऊन भाती माहापुरू चो लगे जाऊ। 23 ईआ आमी आपलो आशा चो अंगीकार के हिम्मत ले थामुन रऊ, कसनबल्लोने जोन बायदा करलो से, हुन बिश्वास लायक आय; 24 आउर मया, आउर अच्छा काममन ने हुच हुचातो काजे आमी गोटक दुसर चो चिन्ता करा करूं, 25 आउर गोटक दुसर चो संगे रूंड़ा होऊक नी छांडु, जसन कि कितलोमन चो रीति आय मान्तर गोटक दुसर के समजाते रऊ; आउर जसन-जसन हुन दिन के लगे ऐतोर दका असने-असने आउर बले खुबे ऐ करते रहा। 26 कसनबल्लोने सत चो पयचान परापत करलो पाचे अगर आमी जानुन बुजुन भाती पाप करते रवां, तेबे पापमन चो काजे फेर कोनी बलिदान बाकी निआय। 27 हव, डण्ड चो गोटक भयंकर बाट टाकतोर आउर आईग चो जलन बाकी आसे जोन बिरूदीमन के भसम करून देये दे। 28 जिदलदाय मूसा चो नियम चो नी मानतो बिता, दुय नाहले तीन झान चो गोहई थाने, बिना दया चो मारून दिया जाऊ आय, 29 तेबे बिचारा कि हुन कितलो आउर बले भारी डण्ड चो लायक ठेबे दे, जोन माहापुरू चो बेटा के पाँयमन ले लगड़ लो आउर बायदा चो लऊ के, जेचो दुवारा हुन पवितर ठेबाया जाऊ रये, अपवितर जानला सोत, आउर अनुग्रह चो आत्मा चो बेईजित करला। 30 कसनबल्लोने आमी हुनके जानु, जोन बल्लो, “पलटा धरतोर मोचो काम आय, मय ची पलटा देयें दें।” आउर फेर ऐ, कि “परबु आपलो लोगमन चो नियाय करे दे।” 31 जीवता माहापुरू चो हाथमन थाने पड़तोर भयंकर गोठ आय। 32 मान्तर हुन पाटे चो दिनमन के सुरता करा, जोन थाने तुमी उजर पाऊन भाती दुकमन चो बड़े भुगतोर ने थीर रलास। 33 केबे-केबे तो असन कि तुमी निन्दा आउर कलेश सहुन-सहुन तमाशा बनलास, आउर केबे असन कि तुमी हुनमन चो संगे होलास जोनमन चो दूर दसा करा जाते रली। 34 कसनबल्लोने तुमी कयदीमन चो दुक ने बले दुकी होलास आउर आपलो सम्पत्ति बले हरिक ले जटुक दिलास; ऐ जानुन भाती कि तुमचो लगे गोटक आउर बले बड़ीया आउर हरमेशा ठेबतो बिती सम्पत्ति आसे। 35 ऐईकाजे आपलो साहास नी छांडा कसनबल्लोने हुनचो करलो फल बड़े आय। 36 कसनबल्लोने तुमके धीरज धरतोर जरूरी आय, बल्ले माहापुरू चो इच्छा के पुरा करून तुमी बायदा चो फल पाआ। 37 “कसनबल्लोने अदायं खुबे ची खिन्डिक समया बाचुन गेली से, जसन कि ऐतो बिता ऐये दे आउर बेर नी करे दे। 38 मान्तर मोचो धरमी झन बिश्वास ले जीव रये दे, आउर अगर हुन पाटे गुचुन जाय दे तेबे मोचो मन हुनचो ले-हरिक नी होये दे।” 39 मान्तर आमी गुचतो बिता नुआवं कि नाश होऊन जाऊँ मान्तर बिश्वास करतो बिता आंव कि परानमन के बचाऊं। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation