इब्रानियो 1 - Halbi

बेटा चो टकर

¹ पयले जुग ने माहापुरू बुआ दादीमन ले खिन्डिक-खिन्डिक करून आउर किसम-किसम ले अगम गिआनीमन चो दुवारा गोठयाऊन,

² ऐ आखरी दिनमन ने आमचो ले बेटा चो दुवारा गोठयालो, जेके हुन पुईतराय तीजमन चो हकदार ठेबालो आउर हुनचेई दुवारा हुन सपाय ब्रमांड के बनालो।

³ हुन हुनचो महिमा चो उजर आउर हुनचो तत्व चो छाप आय, आउर सपाय तीजमन के आपलो सामरत चो बचन ले समालु आय। हुन पापमन के धोऊन भाती ऊँचा जगा थाने माहापुरू चो उजा जाऊन बसलो;

⁴ आउर सरग दूतमन ले हुतली ची बड़ीया ठेबलो, जितरो हुन हुनमन ले बड़े पद चो हकदार होऊन भाती बड़ीया नाव पावलो।

ईशु सरगदूतमन ले बड़ीया

⁵ कसनबल्लोने सरग दूतमन ले हुन केबे कोचीई ले बल्लो, “तुय मोचो बेटा आस, आजी तुय मोचो ले उपजास होली सीस?” आउर फेर ऐ, “मय हुनचो बुआ होयेंदें, आउर हुन मोचो बेटा होयदे?”

⁶ आउर जिदलदाय पयलवात के जगत ने फेर आने से, तेबे बले से, “माहापुरू चो सपाय सरगदूत हुनके पाँय पड़ोत।”

⁷ आउर सरग दूतमन चो बारे ने ऐ बले से, “हुन आपलो दूतमन के लेहरा, आउर आपलो सेवा करूमन के ढिकढिक तो आईग बनाऊ आय।”

⁸ मान्तर बेटा चो बारे ने बले से, “हे माहापुरू, तुचो सिंघासन जुग-जुग रयदे, तुचो राज चो राजदण्ड नियाय चो राजदण्ड आय।

⁹ तुय धरम ले मया आउर अधरम ले बईर संगालीस; ऐई लागुन माहापुरू, तुचो माहापुरू, तुचो संगवारीमन ले बडुन भाती हरिक रूपी तेल ले तुचो अभिषेक करलो।”

¹⁰ आउर ऐ कि, “हे परबु, मुर ने तुय धरतनी चो पाया डालीस, आउर सरग तुचो हाथमन चो बनावटी आय।

¹¹ हुनमन तो नष्ट होऊन जादे, मान्तर तुय बनुन रसे; आउर हुनमन सपाय फटीई चो असन जुना होऊन जादे,

¹² आउर तुय हुनमन के चदर चो असन घड़या से, आउर हुनमन फटीई चो असन बदलुन जादे: मान्तर तुय हुताय आसीत आउर तुचो बरकमन चो आखरी नी होयदे।”

¹³ आउर सरग दूतमन थानले हुन काचो ले केबे बल्लो, “तुय मोचो उजा बस, जिदलदाय ले कि मय तुचो बयरीमन के तुचो पाँयमन चो खाले चो चौंकी नी करून देयें?”

¹⁴ काय हुनमन सपाय सेवा टहल करतो बिती आत्मामन नुआत, जोन मुक्ति करतो बितामन चो काजे सेवा करतो काजे पटाया जाऊ आय?