गलातियो 6 - Halbi

सपाय चो संगे अच्छा करा

¹ हे भाईमन, अगर कोनी माने कोनी अपराध ने धरा बले जाये दे तेबे तुमी जोन आत्मिक आसास, सोज चो संगे असन के सम्भाला, आउर आपलो बले चलाकी संगाआ कि तुमी बले परीक्षा ने नी पड़ा।

² तुमी गोटक दुसर चो बोजा उठाआ, आउर ऐ परकार मसीह चो नियम के पुरा करा।

³ कसनबल्लोने अगर कोनी काई नी होलो थाने बले आपन खुद के काई समजु आय, तो आपन खुद के धोका देऊ आय।

⁴ मान्तर हरकोनी आपली ची काम के जाचो, आउर तेबे दुसर चो बारे ने नाई मान्तर आपली ची बारे ने हुनके घमण्ड करतोर मवका होये दे।

⁵ कसनबल्लोने हरकोनी माने आपनी ची बोज उठाये दे।

जीवना बेड़ा पेरलो असन आय

⁶ जोन बचन चो सिक्या पाऊ आय, हुन सपाय अच्छा तीजमन ने सिकतो बितामन के शामिल करो।

⁷ धोका नी खाआ; माहापुरू मजाकमन ने नी उड़ाया जाये, कसनबल्लोने माने जोन काई बुनु आय हुनी काटे दे।

⁸ कसनबल्लोने जोन आपलो देंह चो काजे बुनु आय, हुन देंह चो बाटले बिनाश चो कटनी काटे दे; आउर जोन आत्मा चो काजे बुनु आय, हुन आत्मा चो बाटले अमर जीवना चो कटनी काटे दे।

⁹ आमी नुकु काम करतो ने साहास नी छांडु, कसनबल्लोने अगर आमी ढीला नी होऊ तेबे ठीक समया थाने कटनी काटवां।

¹⁰ ऐईकाजे जोन लगले मवका मिरे दे आमी सपाय चो संगे भलाई करूं, खास करून बिश्वासी भाईमन चो संगे।

आखरी जनातोर आउर शुभकामनामन

¹¹ दका, मय कसन बड़े-बड़े अखरमन ने तुमके आपलो हाथ ले लिकले से।

¹² जोन लोग देंह ने दकावा चाहाऊं आत हुनमन ची तुमचो खतना करवातो काजे दबाव डालु आत, मात्र ऐईकाजे कि हुनमन मसीह चो कुरूस चो लागुन कन्दराया नी जाओत।

¹³ कसनबल्लोने खतना करतो बितामन खुद तो नियम थाने नी चलोत, मान्तर तुमचो खतना ऐईकाजे कराऊक चाहाय सोत कि तुमचो देंह चो दसा थाने घमण्ड करोत।

¹⁴ मान्तर असन नी होओ कि मय दुसर कोनी गोठ चो घमण्ड करें दे, मात्र आमचो परबु ईशु मसीह चो कुरूस चो, जेचो बाटले संवसार मोचो नजर ने आउर मय संवसार चो नजर ने कुरूस थाने चेगाया गेले से।

¹⁵ कसनबल्लोने ना खतना आउर ना खतना नी करलो काई आत, मान्तर नवा ब्रमांड।

¹⁶ जितरो ये नियम थाने चल दे हुनमन उपरे, आउर माहापुरू चो इस्राएल उपरे शान्ति आउर दया होते रओ।

¹⁷ पयले ले कोनी मोके दुख नी दिआस, कसनबल्लोने मय ईशु चो दागमन के आपलो देंह ने धरून फिरें से।

¹⁸ हे भाईमन, आमचो परबु ईशु मसीह चो अनुग्रह तुमचो आत्मा चो संगे रओ। आमीन।