गलातियो 5 - Halbiमसीह ने छुटछाड़ा 1 मसीह छुटछाड़ा चो काजे आमके छुट छंडालो से; आउर ऐई थाने थीर राआ, आउर गुलामी चो जुआंड़ी ने फेर ले नी जपा। 2 दका, मय पौलुस तुमके बलें सें कि अगर खतना कराआ से, तेबे मसीह ले तुमके काई लाब नी होये दे। 3 फेर बले मय हरकोनी खतना करतो बितामन के जनाऊन देयें से कि हुनके पुईतराय नियम मानुक पढ़े दे। 4 तुमी जोन नियम चो बाटले धरमी ठेबुक चाहायसास, मसीह ले अलग आउर अनुग्रह ले घसरुन गेलासास। 5 कसनबल्लोने आत्मा चो लागुन आमी बिश्वास ले, आशा करलो बिती धारमिकता चो बाट टाकुं से। 6 मसीह ईशु ने ना खतना आउर ना खतना नी करलो काई काम चो आय, मान्तर मात्र बिश्वास, जोन मया चो बाटले असर डालु आय। मया लागुन नियम चो पुरा होतोर 7 तुमी तो नुकु-नुकु पराते राआस। अदायं कोन तुमके ठेबाऊन दिलो कि सत के नी माना। 8 असन सिक्या तुमचो हाग दिलो बिता चो बाटले नुआय। 9 खिन्डिक असन खमीर पूईतराय चटकलो बिती आंटा के खमीर करून देऊ आय। 10 मय परबु थाने तुमचो बारे ने भरसा संगाऊ आय कि तुमचो कोनी दुसर बिचार नी होये दे; मान्तर जोन तुमके घबराऊन देऊ आय, हुन कोनी केंव नी होओ डण्ड पाये दे। 11 मान्तर हे भाईमन, अगर मय ऐबले खतना चो परचार करूं आंय, तेबे केंव ऐबले कन्दराय जाऊँ आंय? फेर तो कुरूस चो ठोकर जाते रली। 12 अच्छा होती कि जोन तुमके ऐ बाटे हुन बाटे करू आत हुनमन आपलो धड़ ची काटून देता। 13 हे भाईमन, तुमी छुटछाड़ाया होतो काजे हाग दिया गेलासास; मान्तर असन नी होओ कि ये छुटछाड़ा देंह चो काममन काजे मवका बनो, मान्तर मया ले गोटक दुसर चो दास बना। 14 कसनबल्लोने पुईतराय नियम ऐ गोटक ची गोठ ने पुरा होऊन जाऊ आय, “तुय आपलो पड़ोसी ले आपलो असन मया संगाव।” 15 मान्तर अगर तुमी गोटक दुसर के दात ले कतरते आउर चिरून खाऊ आस, तो चलाक राहा कि गोटक दुसर चो सत्यानाश नी करून दिआस। आत्मा आउर माने-स्वभाव 16 मान्तर मय बलें सें, आत्मा चो अनुसार चला तेबे तुमी देंह चो लालच कोनी रीति ले पुरा नी करा से। 17 कसनबल्लोने देंह आत्मा चो बिरूद ने आउर आत्मा देंह चो बिरूद ने लालच करू आय, आउर ऐ गोटक दुसर चो बिरूदी आत, ऐईकाजे कि जोन तुमी करूक चाहायसास हुन नी करूक पाआ। 18 आउर अगर तुमी आत्मा चो चला लो ने चलु आस तो नियम चो अधीन नी रलास। 19 देंह चो काम तो परकट आसे, बल्लोने बेबीचार, घिन-घिना काम ढीला-ढाला, 20 मुरती सेवा, टोनहा, बईर, झगड़ा, डाह, रीस, बिरूद, फूट, बिधरम, 21 डाहा, मतवारपन, खेल-कुद आउर ऐ मन चो असन दुसर-दुसर काम आसे, ऐ मन चो बारे ने मय तुमचो ले पयले ले बोलुन देयें से जसन पयले बोलुन बले चुकले से, कि असन-असन काम करतो बितामन माहापुरू चो राज चो हकदार नी होओत। 22 मान्तर आत्मा चो फल मया, हरिक, शान्ति, धीरज, किरपा, भलाई, बिश्वास, 23 सोज, आउर सहन आय, असन-असन काममन चो बिरूद ने काई बले नियम निआय। 24 आउर जोन मसीह ईशु चो आत, हुनमन देंह के हुनचो लालचमन आउर मनमानीमन चो संगे कुरूस उपरे चेगाऊन दिला सोत। 25 अगर आमी आत्मा चो बाटले जीव आंसु, तो आत्मा चो अनुसार चलु बले। 26 आमी घमण्डी होऊन भाती ना गोटक दुसर के उड़साऊ, आउर ने गोटक दुसर ले डाह करूं। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation