गलातियो 4 - Halbiमसीह ने माहापुरू चो छुटछाड़ा बेटा 1 मय ऐ बलें सें कि हकदार जिदलदाय ले लेका आसे, अगर सपाय तीजमन चो मालिक आय, तेबले बले हुनचो ने आउर दास ने काई भेद निआय। 2 मान्तर बुआ चो ठेबालो बिती समया ले बचाऊ बितामन आउर जुगाड़करू मन चो बस ने रऊ आय। 3 असने ची आमी बले, जिदलदाय लेका रऊ, तेबे संवसार चो मुर सिक्या चो बस ने होऊन भाती दास बनुन रलु। 4 मान्तर जिदलदाय समया पुरा होली, तेबे माहापुरू आपलो बेटा के पठालो जोन बायले लेकी ले जनम लो आउर नियम चो अधीन पयदा होलो, 5 बल्ले नियम चो अधीनमन के घेनुन भाती छंड़ाओ, आउर आमके हकदार होतोर पन मिरो। 6 आउर तुमी जोन बेटा आस, ऐईकाजे माहापुरू आपलो बेटा चो आत्मा के, जोन “हे अब्बा, हे बुआ” बोलुन भाती हाग देऊ आय, आमचो मन-मन ने पठालो से। 7 ऐईकाजे तुय अदायं दास नुआस मान्तर बेटा आस; आउर जिदलदाय बेटा होलीस, तेबे माहापुरू चो बाटले हकदार बले होलीस। कलीसिया काजे पौलुस चो चिन्ता 8 पयले तो तुमी माहापुरू के नी जानुन भाती हुनमन चो दास रलास जोन चाल चलन ले माहापुरू नाई, 9 मान्तर अदायं जोन तुमीमन माहापुरू के चितालास मान्तर माहापुरू तुमके चितालो, तेबे हुन कमजोर आउर ठग मुर सिक्या चो गोठमन चो बाटे केंव फिरेसास, जेचो तुमी दुबारा दास होऊक चाहायसास? 10 तुमी दिनमन आउर मयनामन आउर निईत समयामन आउर बरकमन के मानु आस। 11 मय तुमचो बारे ने डरू आंय, काहांय असन नी होओ कि जोन मसागत मय तुमचो काजे करले से हुन फकाहा ठेबो। 12 हे भाईमन, मय तुमचो ले बिनती करें से, तुमी मोचो असन होऊन जाआ; कसनबल्लोने मय बले तुमचो असन होऊन गेले से; तुमी मोचो काई नशालास नाई। 13 मान्तर तुमी जानेसास कि मुयला मय देंह चो कमजोरी चो लागुन तुमके नगतखबर सुना ले। 14 आउर तुमी मोचो देंह दसा के जोन तुमचो परीक्षा चो कारन रली, तुच्छ नी जानलास; ना हुनचो ले घिन्यालास; आउर माहापुरू चो दूत मान्तर खुद मसीह चो असन मोके गरहन करलास। 15 तेबे हुन तुमचो हरिक बनातोर काहां गेली? मय तुमचो गोहई आंय कि अगर होऊक सकती तो तुमी आपलो आँईकमन बले निकराऊन भाती मोके देउन देतास। 16 तेबे काय तुमचो ले सत बोलतोर लागुन मय तुमचो बयरी बनुन गेले से? 17 हुनमन तुमके मित बनाऊक तो चाहाय सोत, मान्तर अच्छा बिचार ले नाई; मान्तर तुमके अलग करूक चाहास सोत कि तुमी हुनीमन के मित बनाआ। 18 मान्तर ऐ बले अच्छा आय कि अच्छा गोठ ने हरमेशा मित बनातोर कोशिश करा जाओं, ना मात्र हुनी समया कि जिदलदाय मय तुमचो संगे रऊँ आंय। 19 हे मोचो लेकामन, जिदलदाय ले तुमचो ने मसीह चो रूप नी बनुन जाये, हुदलदाय ले मय तुमचो काजे फेर जनमा लो असन दुकामन सहु आंय। 20 इच्छा तो ऐ होऊ आय कि अदायं तुमचो लगे ऐऊन भाती आउर ची परकार ले बलें दें, कसनबल्लोने तुमचो बारे ने मय उलझन ने आंसे। दुय बायदामन सारा आउर हाजिरा 21 तुमी जोन नियम चो अधीन होऊक चाहायसास, मोके सांगा, काय तुमी नियम चो नी सुनास? 22 ऐ लिकलोर आसे कि अब्राहाम चो दुय बेटा होला; गोटक दासी ले आउर गोटक छुटछाड़ा बायले लेकी ले। 23 मान्तर जोन दासी ले होलो, हुन देंह चो रीति ले जनम लो; आउर जोन छुटछाड़ा बायले लेकी के होलो, हुन बायदा चो अनुसार जनम लो। 24 ऐ गोठमन ने कहनी आसे, ऐ बायले लेकीमन माना दुय बायदामन आसे, गोटक तो सीनै डोंगरी चो जेचो ले दास ची पयदा होऊ आत; आउर हुन हाजिरा आय। 25 आउर हाजिरा माना अरब चो सीनै डोंगरी आय, आउर ऐ जुग चो यरूशलेम हुनचो बराबर आय, कसनबल्लोने हुन आपलो लेकामन संगे गुलामी ने आसे। 26 मान्तर उपर चो यरूशलेम छुटछाड़ा आसे, आउर हुन आमचो आया आय। 27 कसनबल्लोने लिकलोर आसे, “हे बांजीन, तुय जोन नी जनमाईस हरिक कर; तुय जेके दुकामन नी उठे गल्ला फाडुन जय-जय कार कर; कसनबल्लोने छांडलो बिती चो पिला मुनुक रलो बिती चो पिला ले बले आगर आय।” 28 हे भाईमन, आमी इसाक चो असन बायदा चो पिला आंव। 29 आउर जसन हुन समया देंह चो अनुसार जनम होलोर आत्मा चो अनुसार जनम होलोर के कन्दराते रलो, असने ची ऐबे बले होऊ आय। 30 मान्तर पवितर शास्त्र काय बलें सें? “दासी आउर हुनचो बेटा के निकराऊन देस, कसनबल्लोने दासी चो बेटा छुटछाड़ा बायले लेकी चो बेटा चो संगे हकदार नी होये दे।” 31 ऐईकाजे हे भाईमन, आमी दासी चो नुआवं मान्तर छुटछाड़ा बायले लेकी चो पिला आंव। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation