गलातियो 3 - Halbiबिश्वास चो लागुन धारमीक 1 हे निरबुद्धि गलातिमन, कोन तुमके मोहीत करलो से? तुमचो तो माना आँईक चो पुरे ईशु मसीह कुरूस उपरे दकाया गेलो! 2 मय तुमचो ले मात्र ऐ जानुक चाहायें से कि तुमी आत्मा के, काय नियम चो काममन ले नाहले बिश्वास चो खबर ले पावलास? 3 काय तुमी असन निरबुद्धि आहास कि आत्मा चो रीति थाने मुरयाऊन भाती अदायं देंह चो रीति थाने आखरी करा से? 4 काय तुमी इतलो दुख फकाहा ची उठालास? मान्तर केबीई फकाहा नुआय। 5 जोन तुमके आत्मा दान करे से आउर तुमनमन ने सामरत चो काम करे से, हुन काय नियम चो काममन ले नाहले नगतखबर थाने बिश्वास ले असन करे से? 6 “अब्राहाम तो माहापुरू उपरे बिश्वास करलो आउर ऐ हुनचो काजे धारमिकता गेना गेली।” 7 आउर ऐ जाना कि जोन बिश्वास करतो बितामन आत, हुनमन ची अब्राहाम चो पिला आत। 8 आउर पवितर शास्त्र पयले ची ले ऐ जानुन भाती कि माहापुरू दुसर जातिन के बिश्वास ले धरमी ठेबा ये दे। पयले ची ले अब्राहाम के ऐ नगतखबर सुनान दिलो कि “तुचो ने सपाय जातिमन आशीष पावदे।” 9 ऐईकाजे जोन बिश्वास करतो बितामन आत, हुनमन बिश्वासी अब्राहाम चो संगे आशीष पाऊ आत। नियम बाटले सराप 10 ऐईकाजे जितरो लोग नियम चो काममन थाने भरसा संगाऊ आत, हुनमन सपाय शराप चो अधीन आत, कसनबल्लोने लिकलोर आसे, “जोन कोनी नियम चो किताब ने लिकलो बिती सपाय गोठमन चो करतोर ने थीर नी रये, हुन शरापित आय।” 11 मान्तर ऐ गोठ परकट आसे कि नियम चो लागुन माहापुरू चो थाने कोनी धरमी नी ठेबे, कसनबल्लोने धरमी जन बिश्वास ले जीव रये दे। 12 मान्तर नियम चो बिश्वास ले काई नाता निआय; कसनबल्लोने “जोन हुनमन के माने दे, हुन हुनचो लागुन जीव रये दे।” 13 मसीह जोन आमचो काजे शरापित बनलो, आमके घेनुन भाती नियम चो शराप ले छंडालो, कसनबल्लोने लिकलोर आसे, “जोन कोनी काठ उपरे लटकाया जाऊ आय हुन शरापित आय।” 14 ऐ ऐईकाजे होली कि अब्राहाम चो आशीष मसीह ईशु ने दुसर जातिमन लगले पहुँचो, आउर आमी बिश्वास चो लागुन हुन आत्मा के परापत करवां जेचो बायदा होली से। थीर बायदा 15 हे भाईमन, मय माने चो रीति थाने बलें सें; माने चो बायदा बले जोन पक्का होऊन जाऊ आय, तेबे ना कोनी हुनके नी टालु आय आउर ना हुन थाने काई बड़ाऊ आय। 16 आउर बायदामन अब्राहाम के आउर हुनचो बंश के दिया गेली। हुन ऐ नी बले, “बंशमन के,” जसन खुबेमन चो बारे ने बल्लो; मान्तर जसन गोटक चो बारे ने कि “तुचो बंश के” आउर हुन मसीह आय। 17 मान्तर मय ऐ बलें सें जोन बायदा माहापुरू पयले ले पक्का करू रलो, हुनके नियम चार सव तीस बरक चो पाचे ऐऊन भाती नी टालुक सके कि बायदा फकाहा ठेबो। 18 कसनबल्लोने अगर हक नियम ले मिलली से तेबे फेर बायदा ले नाई, मान्तर माहापुरू अब्राहाम के बायदा चो बाटले देउन दिलो से। नियम चो उद्देश्य 19 तेबे फेर नियम केंव दिया गेली? हुन तो अपराध चो कारन पाचे दिया गेली कि हुन बंश चो ऐ ओत ले रओ, जोन के बायदा दिया जाऊ रये; आउर हुन सरग दूतमन चो बाटले गोटक मंजार चो हाथ ठेबाया गेली। 20 मंजार तो गोटक चो नी होये, मान्तर माहापुरू गोटक ची आय। 21 तेबे काय नियम माहापुरू चो बायदामन चो बिरूद ने आसे? केबीई नाई! कसनबल्लोने अगर असन नियम दिया जाति जोन जीव देऊक सकती, तेबे सत-सत धारमिकता नियम ले होती। 22 मान्तर पवितर शास्त्र सपाय के पाप चो अधीन करून दिलो, बल्ले हुन बायदा जेचो आधार ईशु मसीह उपरे बिश्वास करतोर आय, बिश्वास करतो बितामन चो काजे पुरा होऊन जाओं। 23 मान्तर बिश्वास चो ऐतोर ले पयले नियम चो अधीन ने आमचो राका होते रली, आउर हुन बिश्वास चो ऐ ओत ले जोन परकट होतो बिती रये, आमी हुनचो गांट ने रलु। 24 ऐईकाजे नियम मसीह लगले पहुँचातो काजे आमचो गुरजी होलो से कि आमी बिश्वास ले धरमी ठेबु। 25 मान्तर जिदलदाय बिश्वास ऐऊन चुकली, तेबे आमी गुरजी चो अधीन नी रलु। बेटा आउर हकदार 26 कसनबल्लोने तुमी सपाय हुन बिश्वास चो लागुन जोन मसीह ईशु थाने आसे, माहापुरू चो पिला आहास। 27 आउर तुमनमन ले जितरो लोग मसीह ने डूबन धरला सोत हुनमन मसीह के पींदला सोत। 28 अदायं ना कोनी यहूदी रला आउर ना यूनानी, ना कोनी दास ना छुटछाड़ा, ना कोनी नर ना नारी, कसनबल्लोने तुमी सपाय मसीह ईशु ने गोटक आहास। 29 आउर अगर तुमी मसीह चो आहास तो अब्राहाम चो बंश आउर बायदा चो अनुसार हकदार बले आहास। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation