गलातियो 2 - Halbiपौलुस चो गुन चो जाच पड़ताल 1 चवदा बरक चो पाचे मय बरनबास चो संगे फेर यरूशलेम ने गेले, आउर तीतुस के बले संगे निले। 2 मोचो जातोर ईश्पर परकाशन चो अनुसार होली; आउर जोन नगतखबर मय दुसर जातिमन ने परचार करें से, हुनके मय हुनमन के सांगुन दिले, मान्तर एकान्त ने हुनमन के जोन बड़े समजा जाते रवत, बल्ले असन नी होओ कि मोचो ऐ समया चो नाहले पिछला दौड़ धुप फकाहा ठेबो। 3 मान्तर तीतुस के बले जोन मोचो संगे रये आउर जोन यूनानी आय, खतना करातो काजे बेबस नी करा गेलो। 4 ऐ हुन फंदी भाईमन चो लागुन होली जोन खुसराय ओलुन ऐऊ रवत, कि हुन छुटछान्डा चो जोन मसीह ईशु ने आमके मिरली से, भेद धरून आमके दास बना ओ। 5 गोटक घड़ी भर हुनमन चो अधीन होतोर आमी नी मानलु, ऐईकाजे कि नगतखबर चो सत तुमनमन ने बनु रओ। 6 फेर जोन लोग काई समजते जाते रवत (हुनमन भले कसने बले रवत मोके ऐचो ले काई काम निआय; माहापुरू काचीई भेदभाव नी करे) हुनमन ले जोन काई समजा जाते रये, मोके काई बले नी परापत होली। 7 मान्तर ऐचो उलटा जिदलदाय हुनमन दकला कि जसन खतना करलो लोगमन चो काजे नगतखबर चो काम पतरस के सोपा गेली, असने ची खतना नी होलो लोगमन चो काजे मोके नगतखबर सुनातोर सोपा गेली। 8 (कसनबल्लोने जोन पतरस ले खतना करलो बितामन ने पठालोबिता चो काम बड़े असर चो संगे करालो, हुनी ची मोके बले दुसर जातिमन ने असरदार काम करालो), 9 आउर जिदलदाय हुनमन हुन अनुग्रह के जोन मोके मिरू रये जानला, तेबे याकूब, आउर कयफा, आउर यूहन्ना जोन कलीसिया चो खुटा समजा जाते रवत, मोके आउर बरनबास के संगती चो उजा हाथ दिला कि आमी दुसर जातिमन चो लगे जाऊ आउर हुन खतना करलो बितामन चो लगे; 10 मात्र ऐ बल्लो कि आमी कंगालमन चो सुद्धि धरू, आउर ऐई काम के करतोर मय खुद बले कोशिश करते रयें। अन्ताकिया ने पतरस चो बेसंगती 11 मान्तर जिदलदाय मय कयफा अन्ताकिया ने ईले, तेबे मय हुनचो मुंह थाने हुनचो सामना करले, कसनबल्लोने हुन दोषी ठेबु रलो। 12 ऐईकाजे कि याकूब चो बाटले कितलो लोगमन चो ऐतोर पयले हुन दुसर जातिमन चो संगे खाते रलो, मान्तर जिदलदाय हुनमन ईला तेबे खतना करलो बितामन चो डर चो मारे हुन पाटे गुचुन गेलो आउर रेटे होऊक मुरयालो। 13 हुनचो संगे बाकी यहूदीमन बले कपट करला, ऐ थाने ले कि बरनबास बले हुनमन चो कपट ने पडुन गेलो। 14 मान्तर जिदलदाय मय दकले कि हुनमन नगतखबर चो सत उपरे सीदा चाल नी चलोत, तेबे मय सपाय चो पुरे कयफा ले बल्ले, “जिदलदाय तुय यहूदी होऊन भाती दुसर जातिमन चो अनुसार चल सीस आउर यहूदीमन चो असन नाई तेबे तुय दुसर जातिमन के यहूदिमन चो अनुसार चलतो काजे केंव बोल सीस?” बिश्वास आउर काम 15 आमी तो जनम ले यहूदी आव, आउर पापी दुसर जातिमन ले नाई। 16 तेबले बले ऐ जानुन भाती कि माने नियम चो काममन ले नाई, मान्तर मात्र ईशु मसीह चो उपरे बिश्वास करतोर लागुन धरमी ठेबु आय, आमी खुद बले मसीह ईशु उपरे बिश्वास करलु कि आमी नियम चो काममन ले नाई, मान्तर मसीह उपरे बिश्वास करतोर ले धरमी ठेबलु; ऐईकाजे कि नियम चो काममन ले कोनी जीव धरमी नी ठेबे दे। 17 आमी जोन मसीह ने धरमी ठेबतोर चाहाऊं से, अगर खुद ची पापी निकरूं दे तेबे काय मसीह पाप चो सेवक आय? केबीई नाई! 18 कसनबल्लोने जोन काई मय घसराऊन दिले अगर हुनी के फेर बनायें दें, तेबे आपन खुद के अपराधी ठेबाऊ आंय। 19 मय तो नियम चो बाटले नियम चो काजे मरून गेले कि माहापुरू चो काजे जीयें। 20 मय मसीह चो संगे कुरूस उपरे चेगाया गेले से, अदायं मय जीव नी रले, मान्तर मसीह मोचो ने जीव आसे; आउर मय देंह ने अदायं जोन जीव आंसे तो मात्र हुन बिश्वास ले जीव आंसे जोन माहापुरू चो बेटा उपरे आसे, जोन मोके मया करलो आउर मोचो काजे आपन खुद के देउन दिलो। 21 मय माहापुरू चो अनुग्रह के फोकाहा नी ठेबा ये; कसनबल्लोने अगर नियम चो बाटले धारमिकता होती, तेबे मसीह चो मरतोर फोकाहा होती। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation