गलातियो 1 - Halbiपौलुस चो बाटले जुहार 1 पौलुस चो जोन ना मानेमन चो बाटले आउर ना माने चो बाटले, मान्तर ईशु मसीह आउर माहापुरू बुआ चो बाटले, जोन हुनके मरलो बितामन थानले जिआ लो, पठालोबिता आय। 2 आउर सपाय भाईमन चो बाटले आउर जोन मचो संगे आसोत, गलातिया चो कलीसियामन चो नाव। 3 माहापुरू बुआ आउर आमचो परबु ईशु मसीह चो बाटले तुमके अनुग्रह आउर शान्ति मिरते रओ। 4 हुन आपन खुद के आमचो पापमन चो काजे देउन दिलो, बल्ले आमचो माहापुरू आउर बुआ चो इच्छा चो अनुसार आमके ऐई समया खराप संवसार ले छंड़ाओ। 5 हुनचो स्तुति बड़ाई जुग-जुग होते रओ। आमीन। मात्र गोटक ची नगतखबर 6 मोके चकित होऊ आय कि जोन तुमके मसीह चो अनुग्रह ने हाग दिलो हुनचो ले तुमी ईतलो झटके फिरून भाती दुसर ची परकार चो नगतखबर चो बाटे लोऊँक मुरयालास। 7 मान्तर हुन दुसर नगतखबर आसे ची नाई मान्तर गोठ ऐ आय, कि कितलो असन आत, जोन तुमके घबराऊन देऊ आत, आउर मसीह चो नगतखबर के नशाऊक चाहाऊं आत। 8 मान्तर अगर आमी, नाहले सरग चो कोनी दूत बले हुन नगतखबर के छांडुन जोन आमी तुमके सुनालु से, कोनी आउर नगतखबर तुमके सुना ओत, तेबे शरापित होओत। 9 जसन आमी पहले सांगुन चुकलु से, हुसने ची मय अदायं फेर सांगे से कि हुन नगतखबर के छांडुन जोन के तुमी गरहन करलासास, अगर कोनी आउर नगतखबर सुनाऊ आय, तो शरापित होओ, 10 अदायं मय काय मानेमन के मानु आंय नाहले माहापुरू के? काय मय मानेमन के हरिक करूक चाहा ये से? अगर मय ऐबे तक मानेमन के ची हरिक करते रते तो मसीह चो दास नी होते। प्रेरिताई चो काजे हाग देतोर 11 हे भाईमन, मय तुमके सांगुन देयें से कि जोन नगतखबर मय सुना ले से, हुन माने चो नाई। 12 कसनबल्लोने हुन मोके माने चो बाटले नी पोंहचली, आउर ना मोके सिकाय गेली, मान्तर ईशु मसीह चो परकाशन ले मिरली। 13 यहूदीमत ने जोन पयले मचो चाल-चलन रये हुनचो बारे ने तुमी सुनुन चुकलासास कि मय माहापुरू चो कलीसिया के खुबे ची कन्दराते आउर नष्ट करते रले। 14 आपलो खुबे असन जाति बितामन ले जोन मचो हाल चो रवत, यहूदीमत ने खुबे ची बाड़ते जाते रये आउर आपलो बुआ दादीमन चो रीति रिवाजमन चो काजे खुबे ची हरिक रले। 15 मान्तर माहापुरू चो, जोन मोचो आया चो पेट ले ची मोके ठेबालो आउर आपलो अनुग्रह ले हाग दिलो, 16 जिदलदाय मन होली कि मोचो थाने आपलो बेटा के परकट करो कि मय दुसर जातिमन ने हुनचो नगतखबर सुनायें दे, तेबे ना मय मास आउर लऊ ले सलाह धरले, 17 आउर ना यरूशलेम ने हुनचो लगे गेले जोन मोचो ले पयले पठालोबिता रवत, मान्तर तुरते अरब बाटे जाते गेले, आउर फेर हुता ले दमिश्क ने फिरून ईले। 18 फेर तीन बरक चो पाचे मय कयफा ले भेट करतो काजे यरूशलेम गेले, आउर हुनचो लगे पन्दरा दिन तक रले। 19 मान्तर परबु चो भाई याकूब के छांडुन आउर पठालोबितामन थानले कोनी के नी भेटले। 20 जोन गोठमन मय तुमके लिके से, दका, माहापुरू चो हाजिर जानुन भाती बलें सें कि हुनमन झूठा नुआय। 21 ऐचो पाचे मय सीरिया आउर किलिकिया चो परगनमन ने ईले। 22 मान्तर यहूदिया चो कलीसियामन जोन मसीह ने रला, मचो मुंह केबीई नी दकु रला; 23 मान्तर ऐई सुना करते रवत कि जोन आमके पयले कन्दराते रये, हुन अदायं हुनी बिश्वास चो नगतखबर सुनाऊ आय जोन के पयले नष्ट करते रये। 24 आउर हुन मोचो बारे ने माहापुरू चो महिमा करते रली। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation