इफिसीयो 6 - Halbiआया-बुआ आउर पिलामन 1 हे लेकामन, परबु ने आपलो आया-बुआ चो हुकुम मानतो बिता बना, कसनबल्लोने ऐ ठीक आय। 2 “आपलो आया आउर बुआ चो ईजीत कर (ऐ पयला हुकुम आय जेचो संगे बायदा बले आसे) 3 कि तुचो भला होओ, आउर तुय धरतनी उपरे खुबे दिन जीव रा।” 4 हे पिला बितामन, आपलो पिलामन के रीस नी दिलाआ, मान्तर परबु चो सिक्या आउर चेतावनी देते-देते हुनमन चो पालन-पोषन करा। मालिक आउर दास 5 हे दासमन, जोन लोग ऐ संवसार ने तुमचो मालिक आत, आपलो मन चो सीदा ले डरते आउर थरथरते, जसन मसीह चो असने ची हुनमन चो बले हुकुम माना। 6 मानेमन के हरिक करतो बितामन चो असन दकातो काजे सेवा नी करा, मान्तर मसीह चो दासमन चो असन मन ले माहापुरू चो इच्छा थाने चला, 7 आउर हुन सेवा के मानेमन चो नाई मान्तर परबु चो जानुन भाती सत मन ले करा। 8 कसनबल्लोने तुमी जानेसास कि जोन कोनी जसन अच्छा काम करेदे, भले दास होओ भले छुटछाड़ा, परबु ले असने ची पायेदे। 9 हे मालिकमन, तुमी बले धाकामन देऊक छांडुन भाती हुनमन चो संगे असने ची बेवहार करा; कसनबल्लोने तुमी जानेसास कि हुनमन चो आउर तुमचो दुनो चो मालिक सरग ने आसे, आउर हुन काचीई पक्ष नी करे। आत्मिक लड़ीई चो हत्यार 10 ऐईकाजे परबु ने आउर हुनचो ताकत चो असर ने बलवान बना। 11 माहापुरू चो पूईतराय हत्यार बान्दा कि तुमी शयतान चो चालमन चो पुरे उबा रऊक सका। 12 कसनबल्लोने आमचो ऐ लड़ीई लऊ आउर मास ले नुआय मान्तर परधानमन ले, आउर अधिकारीमन ले, आउर ऐ संवसार चो अंधार चो हाकिममन ले आउर हुन दुष्टता चो आत्मिक पलटनमन ले आय जोन बादरी ने आसोत। 13 ऐईकाजे माहापुरू चो पूईतराय हत्यार बान्दा कि तुमी खराप दिन ने सामना करूक सका, आउर सपाय काई पुरा करून थीर रऊक सका। 14 ऐईकाजे सत ले आपलो करांड जमखम करून, आउर धारमिकता चो कवच पिन्दुन भाती, 15 आउर पाँयमन ने मेल चो नगतखबर चो तिआरी चो बूटमन पिन्दुन भाती; 16 आउर ऐ सपाय चो संगे बिश्वास चो ढाल धरून भाती थीर राआ जेचो ले तुमी हुन दुष्ट चो सपाय जरतो बिती काण्डमन के लिबाऊक सका। 17 आउर मुक्ति चो टोपी, आउर आत्मा चो तलवार, जोन माहापुरू चो बचन आय धरा। 18 हर समया आउर सपाय परकार चो आत्मा ने पारथना, आउर गुहार करते राहा, आउर ऐईकाजे चेता राहा कि सपाय पवितर लोगमन चो काजे सरलगा गुहार करते राहा, 19 आउर मोचो काजे बले कि मोके बोलतोर समया असन परबल बचन दिया जाओ कि मय साआस चो संगे नगतखबर चो भेद सांगुक सकें, 20 जेचो काजे मय सिकरा ले बान्दलो बिती राजदूत आंय; आउर ऐ बले कि मय हुनचो बारे ने जसन मोके जरूरत आसे साआस ले बलेंदें। आखरी जुहार 21 तुखिकुस, जोन लाडरा भाई आउर परबु ने बिश्वास लायक सेवक आय, तुमके सपाय गोठमन सांगे दे कि तुमी बले मोचो हाल जाना कि मय कसन रऊँ आंय। 22 हुनके मय तुमचो लगे ऐईकाजे पठाले से कि तुमी आमचो हाल के जाना, आउर हुन तुमचो मन-मन के शान्ति देओ। 23 माहापुरू बुआ आउर परबु ईशु मसीह चो बाटले भाईमन के शान्ति आउर बिश्वास संगे मया मिरो। 24 जोन आमचो परबु ईशु मसीह ले सत मया संगाऊ आत, हुन सपाय उपरे अनुग्रह होते रओ। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation