इफिसीयो 5 - Halbiमया ने चला 1 ऐईकाजे लाड़रा लेकामन चो असन माहापुरू चो ईजीत करा, 2 आउर मया ने चला जसन मसीह बले तुमचो ले मया करलो, आउर आमचो काजे आपन खुद के सुखदाई बास चो काजे माहापुरू चो पुरे भेट करून बलिदान करून दिलो। 3 जसन पवितर लोगमन चो लायक आय, असने ची तुमी बले बेबीचार आउर कोनी परकार चो अशुद्ध काम नाहले लोभ चो गोठ बात तक नी होओ; 4 आउर ना निरलजता, ना मुड़ता चो गोठ बात करलो, ना मजाक चो; कसनबल्लोने ऐ गोठ सोभा नी देये, मान्तर धन्यबाद ची सुना जाओं। 5 कसनबल्लोने तुमी ऐ जानास कि कोनी बेबीचारी, नाहले अशुद्ध लोग, नाहले लोभीई माने चो, जोन मुरती पुजा चो बराबर आय, मसीह आउर माहापुरू चो राज ने हक निआय। 6 कोनी तुमके फकाहा गोठमन ले धोका नी दे ओत, कसनबल्लोने ऐई काममन चो लागुन माहापुरू चो रीस हुकुम नी मानतो बितामन चो उपरे भड़कु आय। 7 ऐईकाजे तुमी हुनमन चो शामिल नी हुआ। उजर ने हिन्ड़ा 8 कसनबल्लोने तुमी तो पयले अंधार राआस मान्तर अदायं परबु ने उजर आहास, मान्तर उजर चो पिलामन चो असन चला। 9 (कसनबल्लोने उजर चो फल सपाय परकार चो भलाई, आउर धारमिकता, आउर सत आय), 10 आउर ऐ परका कि परबु के काय भाऊ आय। 11 अंधार चो ओफल काममन ने शामिल नी हुआ, मान्तर हुनमन उपरे सिक्या दिआस। 12 कसनबल्लोने हुनमन चो गुपत काममन चो गोठ बात बले लाज चो गोठ आय। 13 मान्तर जितरो काममन उपरे सिक्या दिआ जाऊ आय हुनमन सपाय उजर ले परकट होऊ आत, कसनबल्लोने जोन सपाय काई के परकट करू आय हुन उजर आय। 14 ऐईकाजे हुन बलेंसें, “हे सोहतो बितामन, चेत आउर मरलो थानले जीव उठ; तेबे मसीह चो उजर तुचो उपरे चमके दे।” अकल ने चला 15 ऐईकाजे धिआन ले दका, कि कसन चाल चलेसास; बेअकलमन चो असन नाई मान्तर अकल बितामन चो असन चला। 16 मवका के किमती समजा, कसनबल्लोने दिन खराप आय। 17 ऐई लागुन बेअकल नी हुआ, मान्तर धिआन ले समजा कि परबु चो इच्छा काय आय। 18 दाखरस ले मतवार नी बना, कसनबल्लोने ऐचो ले लुचपन होऊ आय, मान्तर आत्मा ले भरपूर होते जाआ, 19 आउर आपस ने भजन आउर स्तुति गीत आउर आत्मिक गीत गावते राहा, आउर आपलो-आपलो मन ने परबु चो पुरे गावते आउर किरतन करते राहा। 20 आउर सदा सपाय गोठमन चो काजे आमचो परबु ईशु मसीह चो नाव ले माहापुरू बुआ चो धन्यबाद करते राहा। 21 मसीह चो डर ले गोटक दुसर चो अधीन राआ। मनुकमन आउर बायलेमन के हुकुम 22 हे बायलेमन, आपलो-आपलो मनुक चो असन अधीन राहा जसन परबु चो। 23 कसनबल्लोने मनुक बायले चो मुण्ड आय जसन कि मसीह कलीसिया चो मुण्ड आय आउर खुदे ची देंह चो मुक्ति करू बिता आय। 24 मान्तर जसन कलीसिया मसीह चो अधीन आसे, असने ची बायलेमन बले सपाय गोठ ने आपलो-आपलो मनुक चो अधीन रओत। 25 हे मनुकमन, आपलो-आपलो बायले ले मया संगाहा जसन मसीह बले कलीसिया ले मया करून आपन खुद के हुनचो काजे देउन दिलो। 26 कि हुनके बचन चो दुवारा पानी चो नाहलो ले शुद्ध करून पवितर बनाओ, 27 आउर हुनके गोटक असन तेज बिती कलीसिया बनाऊन भाती आपलो लगे उबा करो, जोन थाने ना कलंक, ना झुरा ना कोनी आउर असन तीज होओ मान्तर पवितर आउर बेकसूर होओ। 28 ऐई परकार ठीक आय कि मनुक आपलो-आपलो बायलेमन ले आपलो देंह चो असन मया संगाओ। जोन आपलो बायले ले मया संगाऊ आय, हुन आपन खुद ले मया संगाऊ आय। 29 कसनबल्लोने कोनी केबीई आपलो देंह ले बयर नी संगाये मान्तर हुन हुनचो पालन-पोषन करू आय, जसन मसीह बले कलीसिया चो संगे करू आय। 30 ऐईकाजे कि आमी हुनचो देंह चो धड़ आंव। 31 “ऐई लागुन माने आपलो आया-बुआ के छांडुन भाती आपलो बायले ले मिसुन रये दे, आउर हुनमन दुनो गोटक देंह होदे।” 32 ऐ भेद तो बड़े आय, मान्तर मय ऐथा मसीह आउर कलीसिया चो बारे ने बलेंसें। 33 मान्तर तुमचो ने हरकोनी आपलो बायले ले आपलो असन मया संगाओ, आउर बायले बले आपलो मनुक चो भय मानो। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation