इफिसीयो 1 - Halbiजुहार 1 पौलुस चो बाटले जोन माहापुरू चो इच्छा ले ईशु मसीह चो पठालोबिता आय, हुन पवितर आउर मसीह ईशु ने बिश्वासी लोगमन चो नाव जोन इफिसुस ने आसोत, 2 आमचो बुआ माहापुरू आउर परबु ईशु मसीह चो बाटले तुमके अनुग्रह आउर शान्ति मिरते रओ। मसीह ने छुटकारा 3 आमचो माहापुरू आउर परबु ईशु मसीह चो बुआ चो धन्यबाद होओ कि हुन आमके मसीह ने सरग चो जगामन ने सपाय परकार चो आत्मिक आशीष दिलो से। 4 जसन हुन आमके जगत चो उपजास ले पयले हुन थाने चुनलो कि आमी हुनचो लगे मया ने पवितर आउर बेकसूर होऊँ। 5 आउर आपलो इच्छा चो नुकु इच्छा चो अनुसार आमके आपलो काजे पयले ठेबालो कि ईशु मसीह चो दुवारा आमी हुनचो हकदार बेटा होऊँ, 6 कि हुनचो हुन अनुग्रह चो महिमा चो स्तुति होओ, जेके हुन आमके आपलो लाडरा बेटा चो बाटले सेंत-मेंत दिलो। 7 आमके हुन थाने हुनचो लऊ चो दुवारा छुटकारा, बल्लोने अपराधमन चो छमा, हुनचो हुन अनुग्रह चो धन चो अनुसार मिरली से, 8 जेके हुन सपाय गिआन आउर समज संगे आमचो उपरे खुबे ले खुबे करलो। 9 कसनबल्लोने हुन आपलो इच्छा चो भेद हुन नुकु इच्छा चो अनुसार आमके सांगलो, जेके हुन आपन खुद ठानुन रये 10 कि समयामन चो पुरा होतोर असन जुगाड़ होओ कि जोन काई सरग ने आसे आउर जोन काई धरतनी थाने आसे, सपाय काई हुन मसीह ने रूंडा करो। 11 हुनी थाने जोन थाने आमी बले हुनचेई मन ले जोन आपलो इच्छा चो मत चो अनुसार सपाय काई करू आय, पयले ले ठेबाया जाऊन भाती हकदार बनु 12 कि आमी, जोनमन पयले ले मसीह उपरे आशा संगाऊ रलु, हुनचो महिमा चो स्तुति चो कारन होओ। 13 आउर हुनी थाने तुमचो थाने बले, जिदलदाय तुमी सत चो बचन सुनलास जोन तुमचो मुक्ति चो नगतखबर आय आउर जोन थाने तुमी बिश्वास करलास, बायदा करलो बिती पवितर आत्मा चो छापा लगली। 14 हुन हुनचो घेनलो बिती चो छुटकारा चो काजे आमचो हक चो बयाना आय, कि हुनचो महिमा चो स्तुति होओ। आत्मिक गिआन चो काजे पारथना 15 ऐई लागुन, मय बले हुन बिश्वास चो खबर सुनुन भाती जोन तुमी लोगमन ने परबु ईशु थाने आसे आउर सपाय पवितर लोगमन उपरे मया चो खबर सुनुन भाती, 16 तुमचो काजे धन्यबाद करतोर नी छांडले, आपलो पारथनामन ने तुमके सुरता करू आंय 17 कि आमचो परबु ईशु मसीह चो माहापुरू जोन महिमा चो बुआ आय, तुमके आपलो पयचान ने गिआन आउर उजर चो आत्मा देओ, 18 आउर तुमचो मन चो आँईकमन उजर मय होओ कि तुमी जाना कि हुनचो बुलाहट चो आशा काय आय, आउर पवितर लोगमन ने हुनचो हक चो महिमा चो धन कसन आय, 19 आउर हुनचो सामरत आमचो थाने जोन बिश्वास करू आत, कितलो माहान आय, हुनचो शक्ति चो असर चो हुन काम चो अनुसार 20 जोन हुन मसीह ने करलो कि हुनके मरलो बितामन थानले जिआऊन भाती सरग चो जगामन ने आपलो उजा बाटे 21 सपाय परकार चो बड़पन, आउर अधिकार, आउर सामरत, आउर परभुता चो, आउर हरकोनी नाव चो उपरे, जोन मात्र ऐ जुग ने मान्तर ऐतो बिती लोक ने बले धरा जायदे, बसालो; 22 आउर सपाय काई हुनचो पाँयमन खाले करून दिलो; आउर हुनके सपाय तीजमन थाने शिरोमणि ठेबाऊन भाती कलीसिया के देऊन दिलो, 23 ऐ हुनचो देंह आय, आउर हुनचेई भरपूरी आय जोन सपाय ने सपाय काई पुरा करू आय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation