कुलुस्सियो 3 - Halbiपवितर जीवना चो नियम 1 मान्तर जिदलदाय तुमी मसीह चो संगे जिआय गेलास, तेबे सरग चो तीजमन चो खोज ने राहा, जाहां मसीह हाजिर आसे आउर माहापुरू चो उजा पाट बसलो से। 2 धरतनी थानो चो नाई मान्तर सरग चो तीजमन ने धिआन लगाहा, 3 कसनबल्लोने तुमी तो मरून गेलास आउर तुमचो जीवन मसीह चो संगे माहापुरू ने लुकलोर आसे। 4 जिदलदाय मसीह जोन आमचो जीव आय, परकट होये दे, तेबे तुमी बले हुनचो संगे महिमा संगे परकट कराय जाहा। 5 ऐईकाजे आपलो हुन धड़मन के मारून दिआस जोन धरतनी थाने आसे, बल्लोने बेबीचार, अशुद्धता, खराप बिचारमन खराप लालच आउर लोभ के जोन मुरती पुजा चो बराबर आय। 6 ऐमन चो कारन माहापुरू चो परकोप हुकुम नी मानतो लोगमन चो उपरे पडु आय। 7 आउर तुमी बले, जिदलदाय ऐ खराप काममन ने जीवना बीताते राआस तेबे ऐमन चो अनुसार चलते रलास। 8 मान्तर अदायं तुमी बले ऐ सपाय के बल्लोने कुरूद, रीस, बईरभाव, निन्दा आउर मुंह ले झगड़ा करतोर ऐ सपाय गोठमन छांडुन दिआस। 9 गोटक दुसर ले झूठ नी बोला, कसनबल्लोने तुमी जुना माने के हुनचो काममन संगे निकरालासास 10 आउर नवा माने के पींदलासास, जोन आपलो बनालो बिता चो रूपरंग चो अनुसार गिआन पावतो काजे नवा बनाते जाऊ आय। 11 हुन थाने ना यूनानी रलो ना यहूदी, ना खतना, ना बिन खतना, ना रान चो, ना स्कूती, ना दास आउर ना छुटछाड़ा मात्र मसीह सपाय काई आउर सपाय ने आसे। मसीह जीवना 12 ऐईकाजे माहापुरू चो चुनलो बितामन चो असन जोन पवितर आउर लाड़रा आय, बड़े करूना, आउर भलाई, आउर दिनता, आउर नम्रता, आउर सयनशक्ति धारन करा, 13 आउर अगर कोकीई कोचीई उपरे दोष देतोर कोनी कारन आसे, तेबे गोटक दुसर चो सहा आउर गोटक दुसर चो अपराध छमा करा; जसन परबु तुमचो अपराध छमा करलो, असने ची तुमी बले करा। 14 ऐ सपाय चो उपरे मया के जोन सिद्ध चो बांदन आय बान्दा। 15 मसीह चो शान्ति जेचो काजे तुमी गोटक देंह होऊन भाती हाग दिया बले गेलासास, तुमचो मन ने राज करो; आउर तुमी धन्यबादी बनुन राहा। 16 मसीह चो बचन के आपलो मन ने जादा ले जादा बसुक दिआस, आउर सीद गिआन संगे गोटक दुसर के सिकाआ आउर जनावा, आउर आपलो-आपलो मन ने अनुग्रह चो संगे माहापुरू चो काजे भजन आउर स्तुति गीत आउर आत्मिक गीत गाहा। 17 बचन ने नाहले काम ने जोन काई बले करा सपाय परबु ईशु चो नाव ले करा, आउर हुनचो लागुन माहापुरू बुआ चो धन्यबाद करा। मसीही परिवार चो काजे नियम 18 हे बायलेमन, जसन परबु ने नुकु आय, असने ची आपलो-आपलो मनुक चो अधीन राहा। 19 हे मनुकमन, आपलो-आपलो बायले ले मया संगाहा, आउर हुनमन ले रिस नी करा। 20 हे पिलामन सपाय गोठमन ने आपलो-आपलो आया-बुआ चो हुकुम चो पालन करा, कसनबल्लोने परबु ऐचो ले हरिक होऊ आय। 21 हे पिला-झिला लोगमन, आपलो पिला-झिलामन के तंग नी करा, नी होओ कि हुनमन चो साहास टुटुन जाओ। 22 हे सेवकमन, जोन देंह चो अनुसार तुमचो मालिक आत, सपाय गोठमन ने हुनचो हुकुम चो पालन करा, मानेमन के हरिक करतो लोगमन चो असन दकातो काजे नाई, मान्तर मन चो सोज आउर माहापुरू चो डर ले। 23 जोन काई तुमी करू आस, तनमन ले करा, ऐ समजुन भाती कि मानेमन चो काजे नाई मान्तर परबु चो काजे करेसास; 24 कसनबल्लोने तुमी जानेसास कि तुमके ऐचो पालटा परबु ले हक मिरे दे; तुमी परबु मसीह चो सेवा करू आस। 25 कसनबल्लोने जोन खराप करू आय हुन आपलो खराप चो फर पाऐ दे, हुता काचीई भेद-भाव नुआय। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation