कुलुस्सियो 2 - Halbi

¹ मय चाहाऊं आंय कि तुमी जानुन राहा कि तुमचो आउर हुनमन काजे जोन लौदीकिया ने आसोत, आउर हुन सपाय चो काजे जोनमन मोचो शारीरिक मुंह नी दकला, मय कसन मसागत करूं आंय,

² बल्ले हुनमन चो मनमन ने शान्ति होओ आउर हुनमन मया ले आपस ने बन्दुन रओत, आउर हुनमन पुईतराय समज चो धन परापत करोत, आउर माहापुरू बुआ चो भेद के बल्लोने मसीह के चिता ओत।

³ जोन थाने बुद्धि आउर गिआन चो पुईतराय भण्डार लुकलोर आसे।

⁴ ऐ मय ऐईकाजे बलेंसें कि कोनी माने तुमके ललचातो बिती गोठमन ले धोका नी देओत।

⁵ मान्तर मय देंह चो भाव ले तुमचो ले लापी आसे, तेबले बले आत्मिक भाव ले तुमचो लगे आसे, आउर तुमचो बने बुनाया जीवना के आउर तुमचो बिश्वास चो, जोन मसीह ने आसे, जमखम दकुन भाती हरिक होऊँ आंय।

मसीह ने बनु राआ

⁶ आउर जसन तुमी मसीह ईशु के परबु करून गरहन करलासास, असने ची हुनी थाने चलते राहा,

⁷ आउर हुनी थाने चेर धरते आउर बाड़ते जाहा; आउर तुमी सिकाय गेलास असने ची बिश्वास ने जमखम होते जाहा, आउर खुबे-खुबे धन्यबाद करते राहा।

⁸ चेत ने राहा कि कोनी तुमके हुन तत्व गिआन आउर फकाहा धोका चो लागुन आपलो अहेर नी बना ओत, जोन मानेमन चो रीति बिदीमन आउर संवसार चो मुर सिक्या चो अनुसार तो आय, मान्तर मसीह चो अनुसार नुआय।

⁹ कसनबल्लोने हुन थाने ईश्पर चो सपाय परिपुरनता संका बास करू आय,

¹⁰ आउर तुमी हुनी थाने भरपूर होलासास जोन सपाय बड़पन आउर अधिकारी चो शिरोमणि आय।

¹¹ हुनी थाने तुमचो असन खतना होली जोन हाथ ले नी होये, बल्लोने मसीह चो खतना जेचो ले शारीरिक देंह उतराऊन दियाय जाऊ आय,

¹² आउर हुनचेई संगे डूबन ने गाड़ाय गेला आउर हुनचेई थाने माहापुरू चो सामरत उपरे बिश्वास करून, जेचो ले हुनके मरलो बितामन थानले जिआलो, हुनचो संगे जीव बले उठला।

¹³ हुन तुमके बले, जोन आपलो अपराधमन के आउर आपलो देंह चो बिन खतना हाल ने मुरदा रवत, हुनचो संगे जिआ लो, आउर आमचो सपाय अपराधमन के छमा करलो,

¹⁴ आउर बिदीमन चो हुन लेखा जोन आमचो नाव ने आउर आमचो बिरूद ने रली मेटाऊन दिलो, आउर हुनके कुरूस उपरे खुटीमन ले ठेचुन भाती पुरे ले गुचाऊन दिलो से।

¹⁵ आउर हुन परधानपन आउर अधिकारमन के आपलो ऊपर ले उतराऊन भाती हुनमन चो खुलम खुला तमाशा बनालो आउर कुरूस चो लागुन हुनमन उपरे जय-जय कार चो कोलार सुनाला।

¹⁶ ऐईकाजे खातोर-पीतोर नाहले परब नाहले नवा जोन, नाहले सब्त चो बारे ने तुमचो कोनी नियाय नी करोत।

¹⁷ कसनबल्लोने ऐ सपाय ऐतो बिती गोठमन चो छांय आय, मान्तर मुर तीजमन मसीह चो आय।

¹⁸ कोनी माने दीनता आउर सरग दूतमन चो पुजा कराऊन तुमके दौड़ चो करलो फल ले धुर नी करोत। असन माने दकलो बिती गोठमन ने लगुन रऊ आय आउर आपलो देंह चो समज थाने फोकाहा फुलु आय,

¹⁹ आउर हुन शिरोमणि के धरून नी रये, जेचो ले पुईतराय देंह जोड़ानमन आउर जुआनमन चो कारन पालन पोषन पाऊन आउर गोटक संगे बन्दुन भाती, माहापुरू चो बाटले बड़ते जाऊ आय।

मसीह चो संगे जिवतोर आउर मरतोर

²⁰ “जिदलदाय तुमी मसीह चो संगे जगत चो मुर सिक्या चो बाटले मरून गेलासास, तेबे फेर केंव हुनमन चो असन जोन संवसार चो आत जीवना बितायसास? तुमी असन बिदीमन चो बश ने केंव रयेसास

²¹ कि ‘ऐके नी छिंआ,’ ‘हुनके नी चाका,’ आउर ‘हुनके हाथ बले नी लगाआ’?,

²² (ऐ सपाय तीजमन काम ने आनते-आनते नष्ट होऊन जायेदे) कसनबल्लोने ऐ मानेमन चो हुकुममन आउर सिक्यामन चो अनुसार आय।

²³ ऐ बिदीमन ने आपलो इच्छा चो अनुसार गड़लो बिती भक्ति चो रीति, आउर आत्मा-हीनता, आउर देंह चो आदत चो भाव ले गिआन चो नाव तो आसे, मान्तर शारीरिक लालचमन के रोकतो ने काई बले लाब नी होये।”