प्रेरितो 9 - Halbiशाऊल चो मन बदलतोर 1 शाऊल जोन ऐबले परबु चो चेलामन के धमकातोर आउर मारतोर धुन ने रये, माहायाजक लगे गेलो 2 आउर हुनचो ले दमिश्क चो आराधना घरमन चो नाव थाने ऐ इच्छा चो चिठ्ठीमन मांगलो कि काय माने काय बायले लेकी, जोनमन के हुन ऐ बाट ने पाओ हुनमन के बान्दुन भाती यरूशलेम धरून आनो। 3 मान्तर जाते-जाते जिदलदाय हुन दमिश्क लगे अमरलो, तेबे उधापड़े बादरी ले हुनचो भोंवरक उजर बरली, 4 आउर हुन भूईं ने घसरलो आउर ऐ शब्द सुनलो, “हे शाऊल, हे शाऊल, तुय मोके केंव कन्दराय सीस?” 5 हुन पचारलो, “हे परबु, तुय कोन आस?” हुन बल्लो, मय ईशु आंय, जेके तुय कन्दराय सीस। 6 मान्तर अदायं उठून भाती नंगर ने जा, आउर जोन तुके करतोर आय हुन तुचो ले बोला जाये दे। 7 जोन माने हुनचो संगे रला, हुनमन ओगाय रला; कसनबल्लोने शब्द सुनते रवत मान्तर कोकीई दकते नी रवत। 8 तेबे शाऊल भूईं ले उठलो, मान्तर जिदलदाय आँईक उगाढ़लो तेबे हुनके काई दका नी दिली, आउर हुनमन हुनचो हाथ धरून भाती दमिश्क ने नीला। 9 हुन तीन दिन तक नी दकुक सकलो, आउर ना खादलो आउर ना पिवलो। शाऊल चो डूबन 10 दमिश्क ने हनन्या नाव चो गोटक चेला रलो, हुनचो ले परबु दरशन ने बल्लो, “हे हनन्या!” हुन बल्लो, “हाँ, परबु।” 11 तेबे परबु हुनचो ले बल्लो, उठून भाती हुन खोरी ने जा जोन सीदा बलाया जाऊ आय, आउर यहूदा चो घर ने शाऊल नाव चो गोटक तरसुस चो रतो बिता के पुच; कसनबल्लोने दक, हुन पारथना करे से, 12 आउर हुन हनन्या नाव चो गोटक माने के भीतरे ऐतोर आउर आपलो उपरे हाथ संगातोर दकलो से; बल्ले फेर ले दकुक सको। 13 हनन्या जबाप दिलो, हे परबु, मय ऐ माने चो बारे ने खुबेमन ले सुनले से कि ऐ यरूशलेम ने तुचो पवितर लोगमन चो संगे बड़े-बड़े खरापमन करलो से; 14 आउर ऐथा बले ऐके परधान याजकमन चो बाटले अधिकार मिरली से कि जोन लोग तुचो नाव धरू आत, हुन सपाय के बान्दोत। 15 मान्तर परबु हुनचो ले बल्लो, तुय जाते जा; कसनबल्लोने हुन तो दुसर जातिमन आउर राजामन आउर इस्राएलीमन चो पुरे मोचो नाव परकट करतो काजे मोचो चुनलो बरतन आय। 16 आउर मय हुनके सांगेंदें कि मोचो नाव चो काजे हुनके कसन-कसन दुक उठाऊक पड़ेदे। 17 तेबे हनन्या उठून भाती हुन घर ने गेलो, आउर हुनचो उपरे आपलो हाथ संगाऊन भाती बल्लो, “हे भाई शाऊल, परबु, बल्लोने ईशु जोन हुन बाट ने, जाहां ले तुय ईलीस तुके दका दिलो, हुनी मोके पठालो से कि तुय फेर दकुक सक आउर पवितर आत्मा ले समपूरन हो।” 18 आउर तुरते हुनचो आँईकमन ले छाल असन घसरली आउर हुन दकुक मुरयालो, आउर उठून भाती डूबन धरलो; 19 फेर भात खाऊन बल पावलो। हुन कितलेई दिन हुन चेलामन संगे रलो जोन दमिश्क ने रला। शाऊल बाटले ईशु मसीह चो परचार 20 आउर हुन तुरते आराधना घरमन ने ईशु चो परचार करूक मुरयालो कि हुन माहापुरू चो बेटा आय। 21 सपाय सुनतो बितामन अकचकित होऊन भाती बोलुक मुरयाला, “काय ऐ हुनी माने नुआय जोन यरूशलेम ने हुनमन के जोन ऐ नाव के धरते रवत, नष्ट करते रलो; आउर ऐथा बले ऐईकाजे ऐऊ रलो कि हुनमन के बान्दुन भाती परधान याजकमन चो लगे धरून जाओ?” 22 मान्तर शाऊल आउर बले सामरती होते गेलो, आउर ऐ गोठ चो सबुत देऊन-देऊन भाती कि मसीह ऐई आय, दमिश्क चो रतो बितामन यहूदीमन चो मुंह बंद करते रलो। 23 जिदलदाय खुबे दिन बितुन गेली, तेबे यहूदीमन मिसुन भाती हुनके मारून देतोर उआट बनाला। 24 मान्तर हुनमन चो उआट शाऊल के जान पड़ली। हुनमन तो हुनके मारून देतो काजे राती दिना डेवनामन ने घत ने लगु रला। 25 मान्तर राती दाय हुनचो चेलामन हुनके गोपा ने बसाला, आउर बाड़ा थानले लटकाऊन भाती उतराला। यरूशलेम ने शाऊल 26 यरूशलेम ने अमरून भाती हुन चेलामन संगे मिसुन जातोर कोशिश करलो; मान्तर सपाय हुनचो ले डरते रवत, कसनबल्लोने हुनमन के बिश्वास नी होते रये, कि हुन बले चेला आय। 27 मान्तर बरनबास हुनके आपलो संगे पठालोबितामन चो लगे नेऊन भाती हुनमन के सांगलो कि ऐ कसन रीति ले बाट ने परबु के दकलो, आउर हुन ऐचो ले गोठयालो; फेर दमिश्क ने ऐ कसन हिम्मत ले ईशु चो नाव ले परचार करलो। 28 हुन हुनमन चो संगे यरूशलेम ने ऐते जाते रलो 29 आउर बेधड़क होऊन भाती परबु चो नाव ले परचार करते रलो; आउर यूनानी भाषा बोलतो बितामन यहूदीमन चो संगे गोठ बात आउर बहस करते रलो; मान्तर हुनमन हुनके मारून देतोर कोशिश करूक मुरयाला। 30 ऐ जानुन भाती भाई हुनके कैसरिया धरून आनलो, आउर तरसुस बाटे पटाऊन दिलो। 31 ऐई परकार पुईतराय यहूदिया, आउर गलील, आउर सामरिया ने कलीसिया के असतीर मिरली, आउर हुनचो उन्नती होते गेली; आउर हुन परबु चो भय आउर पवितर आत्मा चो शान्ति ने चलते आउर बाड़ते गेलो। ऐनियास चो चेंगा होतोर 32 फेर असन होली कि पतरस सपाय जगा फिरते-फिरते, हुन पवितर लोगमन चो लगे बले अमरलो जोन लुद्दा ने रते रवत। 33 हुता हुनके एनियास नाव चो लकवा चो रोगाहा गोटक माने मिरलो, जोन आंट बरक ले खटिया थाने पडुन रलो। 34 पतरस हुनके बल्लो, “हे एनियास! ईशु मसीह तुके चेंगा करे से। उठ, आपलो ओचना ओचाव।” तेबे हुन तुरते उठून उबा होलो। 35 तेबे लुद्दा आउर शारोन चो सपाय रतो बितामन हुनके दकुन भाती परबु चो बाटे फिरला। दोरकास के जीवदान 36 याफा ने तबीता बल्लोने दोरकास नाव चो गोटक बिश्वासिनी रते रली। हुन खुबे असन अच्छा-अच्छा काम आउर दान करते रली। 37 हुनी दिनमन ने हुन बेमार होऊन भाती मरून गेली; आउर हुनमन हुनके नाहान भाती अटारी उपरे संगाऊन दिला। 38 ऐईकाजे कि लुद्दा याफा चो लगे रये, चेलामन ऐ सुनुन भाती कि पतरस हुता आसे, दुय झान माने पटाऊन भाती हुनचो ले बिनती करला, “आमचो लगे ऐतोर ने बेर नी कर।” 39 तेबे पतरस उठून भाती हुनमन चो संगे होऊन गेलो, आउर जिदलदाय हुन अमरलो तेबे हुनमन हुनके हुन अटारी थाने नीला। सपाय रान्डीमन गागते-गागते हुनमन चो लगे ऐऊन उबा होला, आउर जोन कुड़तामन आउर फटीईमन दोरकास हुनमन चो संगे रते-रते बनाऊ रये, दकाऊक मुरयाला। 40 तेबे पतरस सपाय के बाहरे करून दिलो, आउर मांडी टेकुन पारथना करलो आउर मोड़ी चो बाटे दकुन भाती बल्लो, “हे तबीता, उठ।” तेबे हुन आपलो आँईक उगाढुन दिली; आउर पतरस के दकुन भाती उठून बसली। 41 हुन हाथ देऊन भाती हुनके उठालो, आउर पवितर लोगमन आउर रान्डीमन के हाग देऊन भाती हुनके जीवता दकान दिलो। 42 ऐ गोठ पुईतराय याफा ने फयलुन गेली; आउर खुबेमन परबु उपरे बिश्वास करला। 43 आउर पतरस याफा ने शिमोन नाव चो कोनी चामड़ा चो बेबार करतो बिता चो थाने खुबे दिन तक रलो। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation