प्रेरितो 6 - Halbi

सात सुनाम सेवा करूमन के चुनतोर

¹ हुन दिनमन ने जिदलदाय चेलामन चो गेनती खुबे बडूक मुरयाली, तेबे यूनानी भाषा बोलतो बितामन इब्रानी भाषा बोलतो बितामन थाने गुरमुरूक मुरयाला, कि रोजे दिना चो सेवकाई ने आमचो रान्डीमन चो सुद्धि नी धरा जाये।

² तेबे हुन बारहों चेलामन चो मण्डली के आपलो लगे हाग देऊन भाती बल्ला, “ऐ नुकु नुआय कि आमी माहापुरू चो बचन छांडुन भाती खुआतो-पिआतोर चो सेवा ने रऊ।”

³ ऐईकाजे हे भाईमन, आपलो थानले सात सुनाम मानेमन के जोन पवितर आत्मा आउर अकल ले समपूरन होओ, चुना, कि आमी हुनमन के ऐ काम थाने ठेबाऊन देऊ

⁴ मान्तर आमी तो पारथना ने आउर “बचन चो सेवा ने लगुन रवां।”

⁵ ऐ गोठ सपाय मण्डली के अच्छा लागली, आउर हुनमन स्तिफनुस नाव चो गोटक माने के जोन बिश्वास आउर पवितर आत्मा ले समपूरन रये, आउर फिलिप्पुस, आउर पुरखुरुस, आउर नीकानोर, आउर तीमोन, आउर परमिनास, आउर अन्ताकिया गड़ीया निकुलाऊस के जोन यहूदी दल ने ऐऊन जाऊ रये, चुनला।

⁶ ऐ मन के पठालोबितामन चो पुरे उबा करला आउर हुनमन पारथना करून हुनमन उपरे हाथ संगाला।

⁷ माहापुरू चो बचन फयलते गेली आउर यरूशलेम ने चेलामन चो गेनती खुबे बड़ते गेली; आउर याजकमन चो गोटक बड़े समाज ऐ दल के मानतो बिता होऊन गेलो।

स्तिफनुस चो बन्दी होतोर

⁸ स्तिफनुस अनुग्रह आउर सामरत ले समपूरन होऊन भाती लोगमन ने बड़े-बड़े भयंकर काम आउर चिना दकाया करते रलो।

⁹ तेबे हुन आराधना घर थानले जोन लिबिरतीनमन चो बलाया जाते रली, आउर कुरेनी आउर सिकन्दरिया आउर किलिकिया आउर आसिया चो लोगमन थानले कितलो झान उठून भाती स्तिफनुस ले बहस करूक मुरयाला।

¹⁰ मान्तर हुन गिआन आउर हुन आत्मा चो जेचो ले हुन गोठयाते रलो, हुनमन सामना नी करूक सकला।

¹¹ ऐ थाने हुनमन कितलो लोगमन के उकसाला जोन बोलुक मुरयाला, “आमी ऐके मूसा आउर माहापुरू चो बिरूद ने निन्दा चो गोठमन बोलते सुनलु से।”

¹² आउर लोगमन आउर सियानमन आउर शास्तरीमन के भड़काऊन भाती चेगुन ईला आउर हुनके धरून भाती माहासभा ने धरून ईला।

¹³ आउर झूठा गोहई उबा करला, जोनमन बल्ला, “ऐ माने ऐ पवितर जगा आउर नियम चो बिरूद ने बोलतोर नी छांडे।”

¹⁴ कसनबल्लोने आमीमन हुनके ऐ बोलतोर सुनलु से कि ऐई “ईशु नासरी ऐ जगा के उजराऊन देये दे, आउर हुन रीतिमन के बदलुन देये दे जोन मूसा आमके सोपलो से।”

¹⁵ तेबे सपाय लोगमन जोन सभा ने बसु रवत, हुनचो उपरे नंजराला तेबे हुनचो थोमना सरगदूत चो असन दकला।