प्रेरितो 4 - Halbiपतरस आउर यूहन्ना चो बन्दी बनातोर 1 जिदलदाय हुनमन लोगमन ले ऐ बोलते रवत, तेबे याजक आउर मंदिर चो सरदार आउर सदूकी हुनमन उपरे चडुन ईला। 2 कसनबल्लोने हुनमन खुबे रिस होला कि हुनमन लोगमन के सिकाते रवत आउर ईशु चो उदाहरन देऊन-देऊन भाती मरलो बितामन चो जीव उठतोर परचार करते रवत। 3 हुनमन-हुनमन के धरून भाती दुसर दिन ले जयल ने संगाला कसनबल्लोने संझ होऊन रली। 4 मान्तर बचन चो सुनतो बितामन थानले खुबेमन बिश्वास करला, आउर हुनमन चो गेनती पांच हजार मानेमन चो लगे-लगे होऊन गेली। पतरस आउर यूहन्ना: यहूदीमन चो सभा चो पुरे 5 दुसर दिन असन होली कि हुनमन चो सरदार आउर पुरनिमन आउर शास्तरी। 6 आउर माहायाजक हन्ना आउर कैफा आउर यूहन्ना आउर सिकन्दर आउर जितरो माहायाजक चो घरमन चो रवत, सपाय यरूशलेम ने रूंड़ा होला। 7 आउर पतरस आउर यूहन्ना के मंजी ने उबा करून पचारूक मुरयाला कि तुमनमन ऐ काम कोन सामरत ले आउर कोन नाव ले करलासास। 8 तेबे पतरस पवितर आत्मा ले भरपूर होऊन भाती हुनमन ले बल्लो, 9 “हे लोगमन चो सरदारमन आउर पुरनिमन, ऐ दुर्बल माने चो संगे जोन भलाई करा गेली से, अगर आजी आमचो ले हुनचो बारे ने जाच पड़ताल करा जाये से, कि हुन कसन चेंगा होलो।” 10 तेबे तुमी सपाय आउर पुईतराय इस्राएली लोग जानुन राआ कि ईशु मसीह नासरी चो नाव ले जेके तुमी कुरूस उपरे चेगालास आउर माहापुरू मरलो बितामन थानले जिआ लो, ऐ माने तुमचो पुरे अच्छा चेंगा उबा आसे। 11 ऐ हुनी पकना आय जेके तुमी राजमिस्त्रीमन तुच्छ जानलास आउर हुन कोनया चो मुंडी चो पकना होऊन गेलो। 12 “कोनी दुसर चो बाटले मुक्ति निआय; कसनबल्लोने सरग चो खाले मानेमन ने आउर कोनी दुसर नाव नी दिया गेली, जेचो बाटले आमी मुक्ति पाऊक सकु।” ईशु चो नाव काजे चेलामन के धमकातोर 13 जिदलदाय हुनमन पतरस आउर यूहन्ना चो साहास दकला, आउर ऐ जानला कि ऐ अपढ़ आउर सादा माने आत, तेबे भक्याला; फेर हुनमन के चिताला, कि ऐ ईशु चो संगे रला सोत। 14 हुन माने के जोन अच्छा होऊ रलो, हुनमन चो संगे उबा दकुन भाती, हुनमन बिरूद ने काई बोलुक नी सकला। 15 मान्तर हुनमन के सभा चो बाहरे जातोर हुकुम देऊन भाती, हुनमन आपस ने बिचार करूक मुरयाला, 16 “आमी ऐ मानेमन चो संगे काय करूं दे? कसनबल्लोने यरूशलेम चो सपाय रतो बितामन थाने उजागर आसे, कि ऐ मन चो बाटले गोटक नामी चिना दकाया गेली से; आउर आमी हुनचो इन्कार नी करूक सकु।” 17 मान्तर ऐईकाजे कि गोठ लोगमन ने आउर खुबे फयलुन नी जाओ, आमी हुनमन के धमकाऊं, कि हुनमन ऐ नाव ले फेर कोनी माने ले गोठया ओत नाई। 18 तेबे हुनमन के हाग दिला आउर जनाऊन भाती ऐ बल्लो, “ईशु चो नाव ले काई बले नी बोला आउर नी सिकाहा।” 19 मान्तर पतरस आउर यूहन्ना हुनमन के जबाप दिला, “तुमी ची नियाय करा; काय ऐ माहापुरू चो लगे नगत आय कि आमी माहापुरू चो गोठ ले बडुन भाती तुमचो गोठ मानुन्दे।” 20 “कसनबल्लोने ऐ तो आमचो ले होऊक नी सके कि जोन आमी दकलु आउर सुनलु, हुन नी बोलु।” 21 तेबे हुनमन-हुनमन के आउर धमकाऊन भाती छांडुन दिला, कसनबल्लोने लोगमन चो कारन हुनमन के डण्ड देतोर कोनी दाँव नी मिरली, ऐईकाजे कि जोन घटना होऊ रली हुनचो कारन सपाय लोग माहापुरू चो बड़ाई करते रवत। 22 हुन माने, जेचो उपरे ऐ चेंगा करतोर चिना दकाया जाऊ रये, चालीस बरक ले खुबे उमर चो रलो। चेलामन चो पारथना 23 हुनमन छंडाय होऊन आपलो संगवारीमन चो लगे ईला, आउर जोन काई परधान याजकमन आउर पुरनिमन हुनमन ले बोलु रला, हुनमन के सुनान दिला। 24 ऐ सुनुन भाती हुनमन गोटक मन होऊन भाती बड़े जोर ले माहापुरू ले बल्ला, “हे मालिक, तुय हुनी आस जोन सरग आउर धरतनी आउर समुन्द आउर जोन काई हुन थाने आसे बनालीस।” 25 “तुय पवितर आत्मा चो बाटले आपलो सेवक आमचो बुआ दाऊद चो मुंह ले बल्लीस, ‘दुसर जातिमन कोलार केंव करला? आउर देश-देश चो लोगमन केंव फकाहा गोठमन बिचारला? 26 परबु आउर मसीह अभिषिक्त चो बिरूद ने धरतनी चो राजा उबा होला, आउर हाकिम गोटक संगे रूंड़ा होऊन गेला।’” 27 कसनबल्लोने सत-सत तुचो सेवक ईशु चो बिरूद ने, जेचो तुय अभिषेक करलीस, हेरोदेस आउर पुन्तियुस पिलातुस बले दुसर जातिमन आउर इस्राएलीमन चो संगे ऐ नंगर ने रूंड़ा होला, 28 कि जोन काई पयले ले तुचो सामरत आउर मति ले ठेबु रली हुनी करा। 29 अदायं हे परबु, हुनमन चो धमकीमन के दक; आउर आपलो दासमन के ऐ बरदान देस कि तुचो बचन बड़े हिम्मत ले सुनाऊ। 30 “चेंगा करतो काजे तुय आपलो हाथ बड़ाव कि चिना आउर भयंकर काम तुचो पवितर सेवक ईशु चो नाव ले करा जाओ।” 31 जिदलदाय हुनमन पारथना करून चुकला, तेबे हुन जगा जोन थाने हुनमन रूंड़ा रवत हलुन गेली, आउर हुनमन सपाय पवितर आत्मा ले भरपूर होऊन गेला, आउर माहापुरू चो बचन हिम्मत ले सुनाते रला। बिश्वासीमन चो सायता करू 32 बिश्वास करतो बितामन चो मण्डली गोटक बिचार आउर गोटक मन चो रली, ऐथा ले कि कोनी बले आपलो धनमाल आपलो नी बोलते रला, मान्तर सपाय काई मांदी ने रली। 33 पठालोबिता बड़े सामरत ले परबु ईशु चो जीव उठतोर गोहई देते रवत आउर हुन सपाय उपरे बड़े अनुग्रह रली। 34 हुनमन ने कोनी बले दरिदर नी रला; कसनबल्लोने जेचो लगे भुईं नाहले घर रये, हुनमन हुनके बिकुन-बिकुन भाती, बिकलो बिती तीजमन चो रकम आनोत, आउर हुनके पठालोबितामन चो पाँयमन थाने संगाते रवत; 35 आउर जसन जोन के जरूरत होते रली, हुनचो अनुसार हरकोनी के बाटते रवत। 36 यूसुफ नाव साइप्रस चो गोटक लेवी रलो जेचो नाव पठालोबितामन बरनबास (बल्लोने शान्ति चो बेटा) संगाऊ रला। 37 हुनचो खिन्डिक भुईं रली, जेके हुन बिकलो, आउर दाम चो रूपया आनुन भाती पठालोबितामन चो पाँयमन थाने संगाऊन दिलो। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation