प्रेरितो 3 - Halbiखोड़ीया भिकारी के चेंगा करतोर 1 पतरस आउर यूहन्ना तीसर पाहार पारथना चो समया मंदिर ने जाते रवत। 2 आउर लोगमन गोटक जनम चो खोड़ीया के आनते रवत, जोन के हुनमन रोजे दिना मंदिर चो हुन बाट थाने जोन “सुन्दर” बलाया जाऊ आय, बसाऊन देते रवत कि हुन मंदिर ने जातो बितामन ले भिक मांगो। 3 जिदलदाय हुन पतरस आउर यूहन्ना के मंदिर ने जातोर दकलो, तेबे हुनमन के भिक मांगलो। 4 पतरस यूहन्ना चो संगे हुनचो बाटे धिआन ले दकुन भाती बल्लो, “आमचो बाटे दक!” 5 आउर हुन हुनमन ले काई पावतोर आशा संगाऊन भाती हुनमन चो बाटे दकुक मुरयालो। 6 तेबे पतरस बल्लो, “चाँदी आउर सोना तो मचो लगे आसे नाई, मान्तर जोन मोचो लगे आसे हुन तुके देये से; ईशु मसीह नासरी चो नाव ले हिन्ड़ बुल।” 7 आउर हुन हुनचो उजा हाथ धरून भाती हुनके उठालो; आउर तुरते हुनचो पाँयमन आउर लेड़ीमन ने बल ईली। 8 हुन उदलुन भाती उबा होलो आउर हिन्ड़ा बुला होऊक मुरयालो; आउर हिन्ड़ते, आउर डगाते, आउर माहापुरू चो स्तुति करते-करते हुनमन चो संगे मंदिर ने गेलो। 9 सपाय लोगमन हुनके हिन्ड़ते बुलते आउर माहापुरू चो स्तुति करते दकुन भाती, 10 हुनके चिताला कि ऐ हुनी आय जोन मंदिर चो “सुन्दर” कपाट थाने बसुन भाती भिक मांगते रलो; आउर हुन घटना ले जोन हुनचो संगे होऊ रली हुनमन खुबे भकवा आउर चकित होला। सुलेमान चो बरांदा ने पतरस चो परचार 11 जिदलदाय हुन पतरस आउर यूहन्ना के धरू रये, तेबे सपाय लोग खुबे भक्याते-भक्याते हुन बरांदा ने जोन सुलेमान चो बोला जाऊ आय, हुनमन लगे पराते ईला। 12 ऐ दकुन भाती पतरस लोगमन ले बल्लो, “हे इस्राएलीमन, तुमी ऐ माने उपरे केंव भक्यायसास, आउर आमचो बाटे केंव ऐ परकार दकेसास कि माना आमी ची आपलो सामरत नाहले भक्ति ले ऐके हिन्ड़तोर बुलतोर लायक बनान दिलु।” 13 अब्राहाम आउर इसाक आउर याकूब चो माहापुरू, आमचो बुआ दादीमन चो माहापुरू आपलो सेवा करू ईशु चो महिमा करलो, जेके तुमी धरालास, आउर जिदलदाय पिलातुस हुनके छांडतोर बिचार करलो, तेबे तुमी हुनचो पुरे हुनचो इन्कार करलास। 14 तुमीमन हुन पवितर आउर धरमी चो इन्कार करलास, आउर बिनती करलास कि गोटक हत्या करू के तुमचो काजे छांडुन दिया जाओ; 15 आउर तुमीमन जीवना चो करता के मारून दीलास, जेके माहापुरू मरलो बितामन थानले जिआ लो; आउर ऐ गोठ ने आमी गोहई आंसु। 16 आउर हुनचेई नाव ने, हुन बिश्वास चो बाटले जोन हुनचो नाव थाने आसे, ऐ माने के जेके तुमी दकसास आउर जानास बले सामरत दिलो से। हुनी बिश्वास जोन हुनचो बाटले आय, ऐके तुमी सपाय चो पुरे बिलकुल अच्छा चेंगा करून दिलो से। 17 अदायं हे भाईमन, मय जाने से कि ऐ काम तुमीमन अगिआन ने करलास, आउर असने ची तुमचो सरदारमन बले करला। 18 मान्तर जोन गोठमन के माहापुरू सपाय अगम गिआनीमन चो मुंह ले पयले ची सांगुन देऊ रलो, कि हुनचो मसीह दुख उठाये दे, हुनमन के हुन ऐ रीति ले पुरा करलो। 19 ऐईकाजे, मन फिरावा आउर बाहाडून ईआ कि तुमचो पाप मेटुन जाओ, जेचो ले परबु चो पुरे ले विश्रांति चो दिन ऐओ, 20 आउर हुन ईशु के पटाओ जोन तुमचो काजे पईल ले ची मसीह ठेबाया गेलो से। 21 जरूरी आय कि हुन सरग ने हुन समया ले रओ जिदलदाय ले कि हुन सपाय गोठमन चो सुधार नी करो जेचो चरचा पीढ़ीमन चो दिन ले माहापुरू आपलो पवितर अगम गिआनीमन चो मुंह ले करलो से। 22 “जसन कि मूसा बल्लो से, ‘परबु माहापुरू तुमचो भाईमन थानले तुमचो काजे मोचो असन गोटक अगम गिआनी उठाये दे, जोन काई हुन तुमचो ले बले दे, हुनचो सुना।’” 23 मान्तर सपाय माने जोन हुन अगम गिआनी चो नी सुनोत, लोगमन ले नष्ट करा जाये दे। 24 आउर शमूएल ले धरून भाती हुनचो पाचे बितामन ले जितरो अगम गिआनी बल्ला हुन सपाय ऐ दिनमन चो खबर दिला सोत। 25 “तुमी अगम गिआनीमन चो पिला आउर हुन बायदा चो भागी आस, जोन माहापुरू तुमचो बुआ दादीमन ले बान्दलो, जिदलदाय हुन अब्राहाम ले बल्लो, ‘तुचो बंश चो बाटले धरतनी चो सपाय घरमन आशीष पावदे।’” 26 “माहापुरू आपलो सेवा करू के उठाऊन भाती पयले तुमचो लगे पठालो, कि तुमनमन ले हरकोनी के हुनचो बुराईमन ले फिराऊन भाती आशीष देओ।” |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation