प्रेरितो 19 - Halbiइफिसुस ने पौलुस 1 जिदलदाय अपुल्लोस कुरिन्थुस ने रलो, तेबे पौलुस उपर चो सपाय परदेश ले होऊन भाती इफिसुस ने ईलो। हुता खिन्डिक चेलामन के दकुन भाती 2 हुनमन ले बल्लो, “काय तुमी बिश्वास करतो बेरा पवितर आत्मा पावलास?” हुनमन हुनचो ले बल्ला, “आमी तो पवितर आत्मा चो गोठ बले नी सुनलु।” 3 हुन हुनमन ले बल्लो, “तेबे फेर तुमी कोचो डूबन धरलास?” हुनमन बल्ला, “यूहन्ना चो डूबन।” 4 पौलुस बल्लो, “यूहन्ना ऐ बोलुन भाती मन फिराव चो डूबन दिलो कि जोन मोचो पाचे ऐतो बिता आय, हुनचो उपरे बल्लोने ईशु उपरे बिश्वास करा।” 5 ऐ सुनुन भाती हुनमन परबु ईशु चो नाव ले डूबन धरला। 6 जिदलदाय पौलुस हुनमन चो उपरे हाथ संगालो, तेबे पवितर आत्मा हुनमन उपरे उतरली, आउर हुनमन अलग-अलग भाषा बोलुक आउर अगम गोठ करूक मुरयाला। 7 ऐ मन सपाय लग-भग बारा झान माने रवत। 8 हुन आराधना घर ने जाऊन भाती तीन मयना तक डर नाहलोर होऊन भाती बोलते रलो, आउर माहापुरू चो राज चो बारे ने गोठ बात करते आउर समजाते रलो। 9 मान्तर जिदलदाय खिन्डिक लोगमन कटर होऊन भाती हुनचो नी मानला मान्तर लोगमन चो पुरे ऐ बाट के खराप बोलुक मुरयाला, तेबे हुन हुनमन के छांडुन दिलो आउर चेलामन के अलगाऊन दिलो, आउर रोजे दिना तुरन्नुस चो गिआनगुड़ी ने गोठ बात करते रलो। 10 दुय बरक तक असने ची होते रये, ऐथा ले कि आसिया चो रतो बितामन काय यहूदी काय यूनानी सपाय परबु चो बचन सुनला। इफिसुस ने सामरत चो भयंकर काम 11 माहापुरू पौलुस चो हाथमन ले सामरत चो भयंकर काम दकाते रलो। 12 ऐथा ले कि सापी आउर तुआल हुनचो देंह ले छिंआन भाती बेमारीमन उपरे संगाते रवत, आउर हुनमन चो बेमारमन जाते रते रली; आउर दुष्टआत्मामन हुनमन थानले निकरून जाते रली। 13 मान्तर कितलो यहूदी जोन झाड़ा फुका करते फिरते रवत, ऐ करूक मुरयाला कि जोन मन ने दुष्टआत्मा रओ हुनमन उपरे परबु ईशु चो नाव ऐ बोलुन भाती फुकला, “जोन ईशु चो परचार पौलुस करू आय, मय तुमके हुनचेई किरिया देयें से।” 14 आउर स्क्किवा नाव चो गोटक यहूदी परधान याजक चो सात झान बेटा रवत, जोन असने ची करते रवत। 15 मान्तर दुष्टआत्मा हुनमन के जबाप दिलो, “ईशु के मय जाने, आउर पौलुस के बले चिताऊ आंय, मान्तर तुमी कोन आहास?” 16 आउर हुन माने जेचो थाने दुष्टआत्मा रली हुनमन उपरे झपटून भाती आउर हुनमन के बस ने आनुन भाती, हुनमन उपरे असन हुड़दुम करलो कि हुनमन बीन फटीई आउर अदमड़ा होऊन भाती हुन घर ले निकरून पराला। 17 ऐ गोठ इफिसुस चो रतो बितामन सपाय यहूदी आउर यूनानी बले जानुन गेला, आउर हुन सपाय उपरे डर छाऊन गेली; आउर परबु ईशु नाव चो बड़पन होली। 18 जोन मन बिश्वास करू रला, हुनमन थानले खुबे असन ऐऊन भाती आपलो-आपलो काममन के मानला आउर उजागर करला। 19 जादु करतो बितामन थानले ले खुबे झान आपलो-आपलो मोंडरीमन रूंड़ा करून सपाय चो पुरे जराऊन दिला, आउर जिदलदाय हुनमन चो कीमत जोड़ा गेली, तेबे पचास हजार चाँदी चो रूपया चो बराबर निकरली। 20 असन परकार परबु चो बचन सामरत ले फयलते आउर परबल होते गेली। 21 जिदलदाय ऐ गोठमन होऊन चुकली तेबे पौलुस आत्मा ने ठानलो कि मकिदुनिया आउर अखाया ले होऊन भाती यरूशलेम ने जायें दें, आउर बल्लो, “हुता गेलोर पाचे मोके रोम के बले दकतोर जरूरी आय।” 22 ऐईकाजे आपलो सेवा करतो बितामन थानले तीमुथियुस आउर इरास्तुस के मकिदुनिया पटाऊन भाती खुद खिन्डिक दिन आसिया ने रऊन गेलो। इफिसुस ने उपद्रव 23 हुन समया हुन बाट चो बारे ने बड़े कोलार होली। 24 कसनबल्लोने देमेत्रियुस नाव चो गोटक सोनार अरतिमिस चो चाँदी चो मंदिर बनाऊन भाती चाटुबड़ईमन के खुबे काम दिआते रलो। 25 हुन हुनमन के आउर असने ची तीजमन चो चाटुबड़ईमन के रूंड़ा करून भाती बल्लो, हे मानेमन, तुमी जानास कि ऐ काम ले आमके कितलो धन मिरू आय। 26 तुमी दकु आहास आउर सुनु आहास कि मात्र इफिसुस ची ने नाई, मान्तर लग-भग पुईतराय आसिया ने ऐ बोलुन भाती ऐ पौलुस खुबे असन लोगमन के समजालो आउर भरमालो से बले, कि जोन हाथ चो चाटुबड़ई आत हुनमन ईश्पर नुआत। 27 ऐचो ले अदायं मात्र ऐई गोठ चो ची डर नुआय कि आमचो ऐ धंधा चो मान जाते रये दे, मान्तर ऐ कि बड़े देबी अरतिमिस चो मंदिर नीच समजा जाये दे, आउर जेके सपाय आसिया आउर जगत पुजा करू आय हुनचो मान बले जाते रये दे। 28 हुनमन ऐ सुनुन भाती रीस ले भरून गेला आउर चिचयाऊन-चिचयाऊन भाती बोलुक मुरयाला, “इफिसिमन चो अरतिमिस, बड़े आय!” 29 आउर सपाय नंगर ने बड़े कोलार होऊन गेली, आउर लोगमन मकिदुनिया बासी गयुस आउर अरिस्तर्खुस के जोन पौलुस चो संगवारी यातरी रवत, धरला, आउर गोटक संगे रंगगुड़ी ने पराला। 30 जिदलदाय पौलुस लोगमन चो लगे भीतरे जाऊक मन करलो तेबे चेलामन हुनके जाऊक नी दिला। 31 आसिया चो बड़े अधिकारीमन थानले बले हुनचो कितलो मीतमन बले हुनचो लगे खबर पठाला आउर बिनती करला कि रंगगुड़ी ने जाऊन भाती खतरा नी उठाव। 32 हुता कोनी काई चिचयाते रलो आउर कोनी काई, कसनबल्लोने सभा ने बड़े गड़बड़ होते रली, आउर खुबे असन लोग तो ऐ जानते बले नी रला कि आमी काय काजे रूंड़ा होलु से। 33 तेबे हुनमन सिकन्दर के, जेके यहूदीमन उबा करू रवत, भीड़ थानले पुरे बड़ाला। सिकन्दर हाथ ले ईसारा करून लोगमन चो पुरे जबाप देऊक मन करते रलो। 34 मान्तर जिदलदाय हुनमन जानला कि हुन यहूदी आय, तेबे सपाय चो सपाय गोटक शब्द ले कोनी दुय घंटा ले चिचयाते रवत, “इफिसिमन चो अरतिमिस, माहान आय।” 35 तेबे नंगर चो मंत्री लोगमन के ओगाय करून बल्लो, हे इफिसुस चो लोगमन, कोन नी जाने कि इफिसिमन चो नंगर महान देबी अरतिमिस चो मंदिर, आउर बादरी ले घसरलो बिती मुरती चो राका करू आय। 36 आउर जिदलदाय कि ऐ गोठमन चो सरासरी नी होऊक सके, तेबे ठीक आय कि तुमी ओगाय राहा आउर बिन सोचुन बिचारून काई नी करा। 37 कसनबल्लोने तुमी ऐ मानेमन के आनलासास जोन ना तो मंदिर चो जुरिया आत आउर ना आमचो देबी चो निन्दा करू आत। 38 अगर देमेत्रियुस आउर हुनचो संगवारी चाटुबड़ईमन के कोचीई ले झगड़ा होओ तो कचरी खुलली से आउर हाकिम बले आसोत; हुनमन गोटक दुसर उपरे नालिस करोत। 39 मान्तर अगर तुमी कोनी दुसर गोठ चो बारे ने काई पचारूक मन करेसास, तेबे थेबालो सभा ने फयसला करा जाये दे। 40 कसनबल्लोने आजी चो बदलतोर लागुन आमचो उपरे दोष लगाया जातोर डर आसे, ऐईकाजे कि ऐचो काई कारन निआय, आउर आमी ऐ भीड़ चो रूंड़ा होतोर काई जबाप नी देऊक सकु दें। 41 ऐ बोलुन भाती हुन सभा के बिदा करलो। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation