प्रेरितो 15 - Halbiयरूशलेम चो सभा 1 फेर कितलो लोग यहूदिया ले ऐऊन भाती भाईमन के सिकाऊक मुरयाला: “अगर मूसा चो रीति थाने तुमचो खतना नी होये तो तुमी मुक्ति नी पावऊक सकास।” 2 जिदलदाय पौलुस आउर बरनबास चो हुनमन ले खुबे झगड़ा आउर बोला-बल्ली होली तेबे ऐ थेबाया गेली कि पौलुस आउर बरनबास आउर हुनमन थानले कितलो माने ऐ गोठ चो बारे ने पठालोबिता आउर सियानमन चो लगे यरूशलेम ने जाओत। 3 आउर कलीसिया हुनमन के कितलो दूर ले पोंचाला; आउर हुनमन फिनिके आउर सामरिया ले होते-होते दुसर जातिमन चो मन फिरातोर खबर सुनाते गेला, आउर सपाय भाई खुबे हरिक होला। 4 जिदलदाय हुनमन यरूशलेम पोंचला, तेबे कलीसिया आउर पठालोबिता आउर सियान हुनमन ले हरिक चो संगे मिलला, आउर हुनमन सांगला कि माहापुरू हुनमन चो संगे होऊन भाती कसन-कसन कामकरू रये। 5 मान्तर फरीसीमन चो गुट ले जोनमन बिश्वास करू रला, हुनमन थानले कितलो उठून भाती बल्ला, “हुनमन के खतना करातोर आउर मूसा चो नियम के मानतोर हुकुम देतोर आसे।” 6 तेबे पठालोबिता आउर सियान ऐ गोठमन चो बारे ने बिचार करतो काजे रूंड़ा होला। 7 तेबे पतरस खुबे बोला-बल्ली होऊन गेलोर पाचे उबा होऊन भाती हुनमन के बल्लो, हे भाईमन, तुमी जानास कि खुबे दिन होली माहापुरू तुमचो थानले मोके चुनलो कि मोचो मुंह ले दुसर जातिमन नगतखबर चो बचन सुनुन भाती बिश्वास करोत। 8 मन चो जाचतो बिता माहापुरू हुनमन के बले आमचो असन पवितर आत्मा देऊन भाती हुनमन चो गोहई दिलो; 9 आउर बिश्वास चो लागुन हुनमन चो मन शुद्ध करून आमचो ने आउर हुनमन ने काई भेद नी संगालो। 10 तेबे अदायं तुमी केंव माहापुरू चो परीक्षा करेसास कि चेलामन चो टोडरा थाने असन जुआंड़ी संगाव, जोन के ना आमचो बुआ दादी उठाऊक सकु रवत आउर ना आमी उठाऊक सकु? 11 हव, आमचो ऐ तय आय कि जोन रीति ले हुनमन परबु ईशु चो अनुग्रह ले मुक्ति पावदे; हुनी रीति ले आमी बले पावां। 12 तेबे पुईतराय सभा ओगाय बरनबास आउर पौलुस चो सुनुक मुरयाली, कि माहापुरू हुनमन चो बाटले दुसर जातिमन ने कसन बड़े-बड़े चिना, आउर भयंकर काम दकालो। याकूब चो फयसला 13 जिदलदाय हुनमन ओगाय होला तेबे याकूब बोलुक मुरयालो, हे भाईमन, मोचो सुना। 14 शिमोन सांगलो कि माहापुरू पयले-पयले दुसर जातिमन ने कसन दयाधरम करलो कि हुनमन थानले आपलो नाव चो काजे गोटक लोग बना ओ। 15 ऐचो ले अगम गिआनीमन चो गोठमन बले मिलु आय, जसन कि लिकलोर आसे, 16 ऐचो पाचे मय फेर ऐऊन भाती दाऊद चो घसरलो डेरा उठायें दें, आउर हुनचो खंडरमन के फेर बनायें दें, आउर हुनके उबा करें दें, 17 ऐईकाजे कि बाकी माने, बल्लोने सपाय दुसर जाति जोन मोचो नाव चो बलाय जाऊ आत, परबु के डगरा ओत, 18 ऐ हुनी परबु बले से जोन जगत चो मुर ले ऐ गोठमन चो खबर देते ईलो से। 19 ऐईकाजे मोचो बिचार ऐ आय कि दुसर जातिमन ले जोन लोग माहापुरू चो बाटे फिरू आत, आमी हुनमन के दुक नी देऊ; 20 मान्तर हुनमन के लिकुन पटाऊ कि हुनमन मुरतीमन चो अशुद्धतामन आउर बेबीचार आउर टोडरा अलटलो बिती चो मास ले आउर लऊ ले लापी रओत। 21 कसनबल्लोने पयले जुग ले नंगर-नंगर मूसा चो नियम चो परचार करतो बिता होते ईला सोत, आउर हुन हर सब्त चो दिने आराधना घर ने पड़ा जाऊ आय। दुसर-यहूदी बिश्वासीमन के चिठ्ठी 22 तेबे सपाय कलीसिया संगे पठालोबिता आउर सियानमन के अच्छा लागली कि आपलो थानले खिन्डिक मानेमन के चुनोत, बल्लोने यहूदा जोन बरसबा बलाया जाऊ आय, आउर सीलास के जोन भाईमन ने मुखिया रये; आउर हुनमन के पौलुस आउर बरनबास चो संगे अन्ताकिया पठाला। 23 हुनमन-हुनमन चो हाथे ऐ लिकुन पठाला: “अन्ताकिया आउर सीरिया आउर किलिकिया चो रतो बिता भाईमन के जोन दुसर जातिमन थानले आत, पठालोबिता आउर सियान भाईमन चो जुहार।” 24 आमी सुनलु से कि आमचो थानले कितलो झान हुता जाऊन भाती, तुमके आपलो गोठमन ले घबराऊन दिला; आउर तुमचो मन उलटाऊन दिला से मान्तर आमी हुनमन के हुकुम नी देऊ रलु। 25 ऐईकाजे आमी गोटक मन होऊन भाती ठीक समजलु कि चुनलो बिता माने के आपलो लाड़रा बरनबास आउर पौलुस चो संगे तुमचो लगे पटाऊ। 26 ऐ असन माने आत जोनमन आपलो जीव आमचो परबु ईशु मसीह चो नाव चो काजे खतरा ने डालला सोत। 27 ऐईकाजे आमी यहूदा आउर सीलास के पठालु से, जोन आपलो मुंह ले बले ऐ गोठमन बोलुन देदे। 28 पवितर आत्मा के आउर आमके ठीक जान पढ़ली कि ऐ जरूरी गोठमन के छांडुन, तुमचो उपरे आउर बोजा नी डालु; 29 “कि तुमी मुरतीमन थाने पुजलो बिती ले आउर लऊ ले, आउर टोडरा अलटलो बिती मास ले आउर बेबीचार ले लापी राहा। ऐ मन ले लापी राहा तेबे तुमचो भला होये दे। पुरे शुभ।” 30 फेर हुनमन बिदा होऊन भाती अन्ताकिया पोंचला, आउर सभा के रूंड़ा करून हुन चिठ्ठी हुनमन के देऊन दिला। 31 हुनमन चिठ्ठी पडुन भाती हुन उपदेश चो गोठ ले खुबे हरिक होला। 32 यहूदा आउर सीलास जोन खुद बले अगम गिआनी रवत, खुबे गोठमन ले भाईमन के उपदेश देऊन भाती थीर करला। 33 हुनमन खिन्डिक दिन रऊन भाती भाईमन ले शान्ति चो संगे बिदा होला कि आपलो पठालोबितामन चो लगे जाओत। 34 (मान्तर सीलास के हुता रतोर अच्छा लागली।) 35 मान्तर पौलुस आउर बरनबास अन्ताकिया ने रऊन गेला: आउर दुसर खुबे असन लोगमन चो संगे परबु चो बचन चो उपदेश करते आउर नगतखबर सुनाते रला। पौलुस आउर बरनबास ने ऊँच-नीच 36 खिन्डिक दिन पाचे पौलुस बरनबास ले बल्लो, “जोन-जोन नंगर ने आमी परबु चो बचन सुनाऊ रलु, ईआ, फेर हुनमन थाने जाऊन भाती आपलो भाईमन के दकु कि हुनमन कसन आसोत।” 37 तेबे बरनबास यूहन्ना के जोन मरकुस बलाया जाऊ आय, संगे धरतोर बिचार करलो। 38 मान्तर पौलुस हुनके जोन पंफूलिया ने हुनमन ले अलग होऊन जाऊ रलो, आउर काम थाने हुनमन चो संगे नी गेलो, संगे धरून जातोर अच्छा नी समजलो। 39 आउर असन झगड़ा उठली कि हुनमन गोटक दुसर ले अलग होऊन गेला; आउर बरनबास, मरकुस के धरून जाहाज थाने साइप्रस जाते गेलो। पौलुस चो (सीलास संगे) दुसरहार परचार ने जातोर 40 मान्तर पौलुस सीलास के चुनलो, आउर भाईमन ले माहापुरू चो अनुग्रह ने सोपी जाऊन भाती हुता ले जाते गेलो; 41 आउर हुन कलीसियामन के थीर करते-करते सीरिया आउर किलिकिया ले होते-होते निकरलो। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation