प्रेरितो 13 - Halbiबरनबास आउर शाऊल के पटातोर 1 अन्ताकिया चो कलीसिया ने कितलो अगम गिआनी आउर उपदेशक रवत; जसन बरनबास आउर शिमोन जोन नीगर बलाया जाऊ आय; आउर लुकियुस कुरेनी, आउर चवथा देश चो राजा हेरोदेस चो पोसवा भाई मनाहेम, आउर शाऊल। 2 जिदलदाय हुनमन उपास संगे परबु चो उपास करते रवत, तेबे पवितर आत्मा बल्लो, “मोचो काजे बरनबास आउर शाऊल के हुन काम चो काजे अलग करा जेचो काजे मय हुनमन के हाग दिले से।” 3 तेबे हुनमन उपास आउर पारथना करून आउर हुनमन चो उपरे हाथ संगाऊन भाती हुनमन के बिदा करला। पौलुस चो पहिल परचार ने जातोर 4 आउर हुनमन पवितर आत्मा चो पठालो बिती सिलूकिया ने गेला; आउर हुता ले जाहाज थाने चेगुन भाती साइप्रस ने गेला; 5 आउर सलमीस ने अमरून भाती, माहापुरू चो बचन यहूदीमन चो आराधना घरमन ने सुनाला। यूहन्ना हुनमन चो सेवक रलो। 6 हुनमन हुन पुईतराय ढिपका ने होऊ-होऊ पाफुस लगले पोंचला। हुता हुनमन के बार-ईशु नाव चो गोटक यहूदी पोंगनाहा आउर फंदी अगम गिआनी मिरलो। 7 हुन हाकिम सिरगियुस पौलुस चो संगे रलो, जोन अकल बिता माने रलो। हुन बरनबास आउर शाऊल के आपलो लगे हाग देउन भाती माहापुरू चो बचन सुनुक चाहालो। 8 मान्तर इलिमास पोंगनाहा, कसनबल्लोने ऐई हुनचो नाव चो अरत आय, हुनमन चो बिरूद करून हाकिम के बिश्वास करतोर ले थेबाऊक चाहा लो। 9 तेबे शाऊल जेचो नाव पौलुस बले आय, पवितर आत्मा ले भरून हुनचो बाटे नजर गड़ाऊन भाती दकलो आउर बल्लो, 10 “हे सपाय कपट आउर सपाय चलाक ले भरलो शयतान चो पिला, थोमना धरम चो बयरी, काय तुय परबु चो सीदा बाटमन के टेड़ा करूक नी छांडीस?” 11 अदायं दक, “परबु चो हाथ तुचो उपरे लगली से; आउर तुय खिन्डिक समया तक काना रसे आउर बेर के नी दक से।” तेबे तुरते झांवर-झांवर आउर अंधार हुनचो थाने छाऊन गेली, आउर हुन ऐ घाई हुन घाई टमडुक मुरयालो बल्ले कोनी हुनचो हाथ धरून नेओत। 12 तेबे हाकिम जोन होऊ रली हुनके दकुन भाती आउर परबु चो उपदेश ले चकित होऊन भाती बिश्वास करलो। पिसिदिया चो अन्ताकिया ने पौलुस चो उपदेश 13 पौलुस आउर हुनचो संगवारी पाफुस ले जाहाज खोलुन भाती पंफूलिया चो पिरगा ने ईला; आउर यूहन्ना हुनमन के छांडुन भाती यरूशलेम ने बाहाडून गेलो। 14 पिरगा ले पयले बडुन भाती हुनमन पिसिदिया चो अन्ताकिया ने पोंचला; आउर सब्त चो दिने आराधना घर ने जाऊन भाती बोसुन दिला। 15 नियम आउर अगम गिआनीमन चो किताब ले पढ़लोर पाचे आराधना घर चो सरदारमन हुनमन चो लगे बुलावा पठाला, “हे भाईमन, अगर लोगमन चो उपदेश चो काजे तुमचो मन ने काई गोठ आसे तो बोला।” 16 तेबे पौलुस उबा होऊन भाती आउर हाथ ले सोयका करून बल्लो, हे इस्राएलीमन, आउर माहापुरू ले डरतो बितामन, सुना 17 हे इस्राएली लोगमन चो माहापुरू आमचो बुआ दादीमन के चुनलो, आउर जिदलदाय ऐ लोग मिस्र देश ने परदेशी होऊन भाती रते रवत, तेबे हुनमन चो उन्नती करलो; आउर ताकत बाहां ले निकराऊन आनलो। 18 हुन कोनी चालीस बरक ले रान ने हुनमन चो सहन करते रलो, 19 आउर कनान देश ने सात जातिमन चो नाश करून हुनमन चो देश कोनी साढ़े चार सव बरक ने ऐ मन चो अधिकार ने करून दिलो। 20 ऐचो पाचे हुन शमूएल अगम गिआनी लगले हुनमन ने नियायी ठेबा ओ। 21 हुनचो पाचे हुनमन गोटक राजा मांगला; तेबे माहापुरू चालीस बरक चो काजे बिन्यामीन चो पुरखा थानले गोटक माने; बल्लोने कीश चो बेटा शाऊल के हुनमन उपरे राजा थेबालो। 22 फेर हुनके अलग करून दाऊद के हुनमन चो राजा बनालो; जेचो बारे ने हुन गोहई दिलो, मोके गोटक माने, यिशै चो बेटा दाऊद, मोचो मन चो अनुसार मिरून गेलो से; हुनी मोचो सपाय इच्छा पुरा करे दे। 23 ऐचीई कुल थानले माहापुरू आपलो बायदा चो अनुसार इस्राएल चो लगे गोटक मुक्तिकरू, बल्लोने ईशु के पठालो। 24 जेचो ऐतोर पयले यूहन्ना सपाय इस्राएलीमन ने मन फिराव चो डूबन चो परचार करलो। 25 जिदलदाय यूहन्ना आपलो सेवा पुरा करतो थाने रलो, तेबे हुन बल्लो, तुमी मोके काय समजेसास? मय हुन नुआय! मान्तर दका, मोचो पाचे गोटक ऐतो बिता आय, जेचो पाँय चो पनही बले मय हिटातोर लायक नुआय। 26 हे भाईमन, तुमी जोन अब्राहाम चो पिलामन आस; आउर तुमी जोन माहापुरू ले डरू आस, तुमचो लगे ऐ मुक्ति चो बचन पटाया गेली से। 27 कसनबल्लोने यरूशलेम चो रतो बितामन आउर हुनमन सरदारमन, ना हुनके चिताला आउर ना अगम गिआनीमन चो गोठमन समजला, जोन हर सब्त चो दिने पढ़ा जाऊ आय, ऐईकाजे हुनके दोषी ठेबाऊन भाती हुन गोठमन के पुरा करलो। 28 हुनमन मारतोर लायक चो काई दोष हुनचो थाने नी पावला, तेबले बले पिलातुस ले बिनती करला कि हुन मरून दिया जाओ। 29 जिदलदाय हुनमन हुनचो बारे ने लिकलोर सपाय गोठ पुरा करला, तेबे हुनके कुरूस थानले उतराऊन भाती कबर ने संगाला। 30 मान्तर माहापुरू हुनके मरलो बितामन थानले जिआ लो, 31 आउर हुन हुनमन के जोन हुनचो संगे गलील ले यरूशलेम ऐऊ रवत, खुबे दिन ले दका देते रलो; लोगमन चो पुरे अदायं हुनमन ची हुनचो गोहई आत। 32 आमी तुमके हुन बायदा चो बारे ने जोन बुआ दादीमन ले करा जाऊ रली, ऐ नगतखबर सुनाऊ से, 33 कि माहापुरू ईशु के जिआऊन भाती, हुनी बायदा आमचो पिलामन चो काजे पुरा करलो; जसन दुसर भजन ने बले लिकलोर आसे, तुय मोचो बेटा आस; आजी मय तुके जनमा ले से। 34 आउर हुनचो ऐ रीति ले मरलो बितामन थानले जिआतोर बारे ने बले कि हुन केबीई नी कुओ, हुन असन बल्लो से, मय दाऊद थानो पवितर आउर नी गुचतो किरपा तुमचो उपरे करें दें। 35 ऐईकाजे हुन गोटक आउर भजन ने बले बल्लो से, तुय आपलो पवितर जन के कुऊक नी दे से। 36 कसनबल्लोने दाऊद तो माहापुरू चो इच्छा चो अनुसार आपलो समया ने सेवा करून सोऊन गेलो, आउर आपलो बुआ दादीमन ने जाऊन मिसलो, आउर कुऊन बले गेलो। 37 मान्तर जोन के माहापुरू जिआ लो, हुन कुऊक नी पावलो। 38 ऐईकाजे, हे भाईमन, तुमी जाना कि ऐचीई बाटले पापमन चो छमा चो खबर तुमके दिया जाये से; 39 आउर जोन गोठमन ने तुमी मूसा चो नियम चो बाटले बेकसूर नी ठेबुक सकते रलास, हुनी सपाय ने हरकोनी बिश्वास करतो बिता हुनचो लगुन बेकसूर ठेबु आत। 40 ऐईकाजे हुसीयार राहा, असन नी होओ कि जोन अगम गिआनीमन चो किताब ने ईली से, तुमचो उपरे बले ऐऊन पड़ो: 41 हे निन्दा करतो बितामन, दका, आउर चकित हुआ, आउर मेटून जाआ; कसनबल्लोने मय तुमचो दिनमन ने गोटक काम करें से, असन काम कि अगर कोनी तुमचो ले हुनचो चरचा कर दे, तेबे तुमी बिश्वास नी करा से। अन्ताकिया ने पौलुस आउर बरनबास 42 हुनमन चो बाहरे निकरतो समया लोग हुनमन चो बिनती करूक मुरयाला कि ऐतो सब्त चो दिने आमके ऐ गोठमन फेर सुनाया जाओ। 43 जिदलदाय आराधना सभा उठून गेली तेबे यहूदीमन आउर यहूदी दल ने ईलो भगतमन थानले खुबे असन पौलुस आउर बरनबास चो पाट-पाट होला; आउर हुनमन-हुनमन चो ले गोठमन करून समजाला कि माहापुरू चो अनुग्रह ने बनु राहा। 44 ऐतो सब्त चो दिने नंगर चो लग-भग सपाय लोग माहापुरू चो बचन सुनतो काजे रूंड़ा होऊन गेला। 45 मान्तर यहूदी भीड़ के दकुन भाती डाह ले भरला, आउर निन्दा करते-करते पौलुस चो गोठमन चो बिरूद ने बोलुक मुरयाला। 46 तेबे पौलुस आउर बरनबास निडर होऊन बल्ला, जरूरी रये कि माहापुरू चो बचन पयले तुमके सुनाया जाति; मान्तर जिदलदाय तुमी हुनके लापी गुचाऊ आस, आउर आपन के अमर जीवना चो लायक नी ठेबा आस, तेबे दका, आमी दुसर जातिमन चो बाटे फिरू आंव। 47 कसनबल्लोने परबु आमके ऐ हुकुम दिलो से, मय तुके दुसर जातिमन चो काजे उजर थेबाले से, बल्ले तुय धरतनी चो कोनया मुक्ति चो बाट हो। 48 ऐ सुनुन भाती दुसर जातिमन हरिक होला, आउर माहापुरू चो बचन चो बड़ाई करूक मुरयाला; आउर जितरो अमर जीवना चो काजे थेबाया जाऊ रवत, हुनमन बिश्वास करला। 49 तेबे परबु चो बचन हुन सपाय देश ने फयलुक मुरयाली। 50 मान्तर यहूदीमन भगत आउर सियानिन बायले लेकीमन के आउर नंगर चो मुखिया लोगमन के हुच हुचाला, आउर पौलुस आउर बरनबास चो बिरूद हुड़दुम कराऊन भाती हुनमन के आपलो संदी ले निकराऊन दिला। 51 तेबे हुनमन-हुनमन चो पुरे आपलो पाँयमन चो धुरला फाफडून भाती इकुनियुम ने गेला। 52 आउर चेला हरिक ले आउर पवितर आत्मा ले समपूरन होते गेला। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation