प्रेरितो 10 - Halbiकुरनेलियुस चो दरशन 1 कैसरिया ने कुरनेलियुस नाव चो गोटक माने रये, जोन इतालियानी नाव चो पलटन चो सुबेदार रये। 2 हुन भगत रये, आउर आपलो सपाय घरमन संगे माहापुरू के डरते रलो, आउर यहूदी लोगमन के खुबे दान देते, आउर बराबर माहापुरू ले पारथना करते रये। 3 हुन दिन चो तीसर पाहार चो लगे दरशन ने सयगो दकलो कि माहापुरू चो गोटक सरगदूत हुनचो लगे भीतरे ऐऊन भाती बले से, “ऐ कुरनेलियुस!” 4 हुन हुनके धिआन ले दकलो आउर डरून भाती बल्लो, “हे परबु, काय आय?” हुन हुनके बल्लो, तुचो पारथनामन आउर तुचो दान सुरता काजे माहापुरू चो पुरे अमरली से; 5 आउर अदायं याफा ने माने पटाऊन भाती शिमोन के, जोन पतरस बलया जाऊ आय, हाग देस। 6 हुन शिमोन, चामड़ा चो बेबार करतो बितामन चो थाने सगा ईलो से, जेचो घर समुन्द रेटे आसे। 7 जिदलदाय हुन सरगदूत जोन हुनचो ले गोठयाऊ रये जाते गेलो, तेबे हुन दुय झान दास, आउर जोन हुनचो लगे हाजिर रते रवत हुनमन थानले गोटक भगत पलटन के हाग दिलो, 8 आउर हुनके सपाय गोठमन सांगुन भाती याफा ने पठालो। पतरस चो दरशन 9 दुसर दिने, जिदलदाय हुनमन हिन्ड़ते-हिन्ड़ते नंगर लगे अमरला, तेबे दुसर पाहार चो लगे पतरस छानी उपरे पारथना करूक चेगलो। 10 हुनके भुक लागली, आउर काई खाऊक मन करते रलो, मान्तर जिदलदाय हुनमन तिआर करते रवत तेबे हुन बेसुद होलो; 11 आउर हुन दकलो, कि बादरी उगाढ़ी होली; आउर गोटक बरतन बड़े चदर चो असन, चारो कोना ले लटकालोर, धरतनी बाटे उतरे से। 12 जोन थाने धरतनी चो सपाय परकार चो चार पाँय बिती आउर रेंगतो बिती जीव जन्तु आउर बादरी चो चड़ीई रवत। 13 हुनके गोटक शब्द सुना दिली, “हे पतरस उठ, मार आउर खा।” 14 मान्तर पतरस बल्लो, “नाई परबु, केबीई नाई; कसनबल्लोने मय केबीई कोनी अपवितर नाहले अशुद्ध तीज नी खादले से।” 15 फेर दुसरहार हुनके शब्द सुना दिली, “जोन काई माहापुरू शुद्ध ठेबालो से, हुनके तुय अशुद्ध नी बोल।” 16 तीन हार असने ची होली; तेबे तुरते हुन बरतन बादरी उपरे उठाया गेली। कुरनेलियुस चो घरे पतरस 17 जिदलदाय पतरस आपलो मन ने परेशान रये, कि ऐ दरशन जोन मय दकले, हुन काय होऊक सके, तेबे दका, हुन मानेमन जोनमन के कुरनेलियुस पठाऊ रये, शिमोन चो घर चो पता लगाऊन भाती डेवना ने ऐऊन उबा होला, 18 आउर हाग देऊन भाती पचारूक मुरयाला, “काय शिमोन जोन पतरस बलाया जाऊ आय, ऐई सगा आय?” 19 पतरस तो हुन दरशन थाने बिचार ते ची रलो, कि आत्मा हुनचो ले बल्ली, दक, तीन झान माने तुचो खोज ने आसोत। 20 आउर उठून भाती खाले जा, आउर बिना संका हुनमन संगे हो; कसनबल्लोने मय ची हुनमन के पठाले से। 21 तेबे पतरस उतरून भाती हुन मानेमन ले बल्लो, “दका, जेचो खोज तुमी करेसास, हुन मय ची आंय। तुमचो ऐतोर काय कारन आय?” 22 हुनमन बल्ला, “कुरनेलियुस सुबेदार जोन धरमी आउर माहापुरू ले डरतो बिता आउर पुईतराय यहूदी जाति ने सुनाम माने आय, हुन गोटक पवितर सरगदूत ले ऐ निर्देश पावला से कि तुके आपलो घरे हाग देउन भाती तुचो ले बचन सुनोत।” 23 तेबे हुन हुनमन के भीतरे हाग देउन भाती हुनमन चो पहुनाई करलो। दुसर दिने हुन हुनमन चो संगे गेलो, आउर याफा चो भाईमन थानले कितलो हुनचो संगे होऊन गेला। 24 दुसर दिने हुनमन कैसरिया पहुँचला, आउर कुरनेलियुस आपलो कुटुममन आउर लाड़रा मीतमन के रूंड़ा करून हुनमन चो बाट दकते रलो। 25 जिदलदाय पतरस भितरे ऐते रलो, तेबे कुरनेलियुस हुनचो ले भेट करलो, आउर हुनचो पाँयमन थाने घसरुन भाती हुनके जुहार करलो; 26 मान्तर पतरस हुनके उठाऊन भाती बल्लो, “उबा हो, मय बले तो माने आय।” 27 आउर हुनचो संगे गोठ बात करते-करते भीतरे गेलो, आउर खुबे असन लोगमन के रूंड़ा दकुन भाती 28 हुनमन ले बल्लो, तुमी जानास कि दुसरजाति चो संगत करतोर नाहले हुनचो थाने जातोर यहूदी चो काजे अधरम आय, मान्तर माहापुरू मोके सांगलो से कि कोनी माने के अपवितर नाहले अशुद्ध नी बोल। 29 ऐईकाजे मय जिदलदाय हाग दिआय गेले तो बिना काई बोललोर ऐते ईले। अदायं मय पचारें सें कि मोके काय काम काजे हाग दिया गेली? 30 कुरनेलियुस बल्लो, ऐई घड़ी, पुरा चार दिन होली, मय आपलो घर ने तीसर पाहार पारथना करते रये; तेबे दका, गोटक माने चमकतो बिती फटीई पिन्दलोर, मोचो पुरे ऐऊन उबा होलो 31 आउर बोलुक मुरयालो, हे कुरनेलियुस, तुचो पारथना सुना गेली से आउर तुचो दान माहापुरू चो पुरे सुरता करा गेली से। 32 ऐईकाजे कोनी के याफा पटाऊन भाती शिमोन के जोन पतरस बलाया जाऊ आय, हाग देस। हुन समुन्द रेटे शिमोन, चामड़ा चो बेबार करतो बितामन चो घर ने सगा ईलो से। 33 तेबे मय तुरते तुचो लगे लोग पठाले, आउर तुय अच्छा करलीस जोन ईलीस। अदायं आमी सपाय ऐथा माहापुरू चो पुरे आंसु, बल्ले जोन काई माहापुरू तुचो ले बल्लो से हुनके सुनु। कुरनेलियुस चो घरे पतरस चो उपदेश 34 तेबे पतरस बल्लो, “अदायं मोके तय होली कि माहापुरू काचीई पक्ष नी करे” 35 मान्तर हर जाति ने जोन हुनचो ले डरू आय आउर धरम चो कामकरू आय, हुन हुनके भाऊ आय। 36 जोन बचन हुन इस्राएलीमन चो लगे पठालो, जिदलदाय हुन ईशु मसीह चो बाटले (जोन सपाय चो परबु आय) शान्ति चो नगतखबर सुनालो, 37 हुन बचन तुमी जानेसास, जोन यूहन्ना चो डूबन चो परचार चो पाचे गलील ले मुरयाऊन भाती पुईतराय यहूदिया ने फयलुन गेली: 38 माहापुरू कोन रीति ले ईशु नासरी के पवितर आत्मा आउर सामरत ले अभिषेक करलो; हुन भलाई करते आउर सपाय के जोन शयतान चो कन्दरालोर रवत, अच्छा करते फिरलो, कसनबल्लोने माहापुरू हुनचो संगे रलो। 39 आमी हुन सपाय काममन चो गोवाह आंव जोन हुन यहूदिया चो देश आउर यरूशलेम ने बले करलो, आउर हुनमन हुनके रूक थाने लटकाऊन भाती मारून दिला। 40 हुनके माहापुरू तीसर दिने जिआ लो, आउर परकट बले करून दिलो से; 41 सपाय लोगमन उपरे नाई मान्तर हुन गोहईमन उपरे जोनमन के माहापुरू पयले ले चुनुन रलो, बल्लोने आमचो उपरे जोनमन हुनचो मरलो बितामन थानले जीव उठलोर पाचे हुनचो संगे खादला-पिवला; 42 आउर हुन आमके हुकुम दिलो कि लोगमन ने परचार करा आउर गोहई दिआस, कि ऐ हुनी आय जोन के माहापुरू जीवता आउर मरलो बितामन चो नियायी ठेबालो से। 43 हुनचो सपाय अगम गिआनी गोहई देऊ आत कि जोन कोनी हुनचो उपरे बिश्वास कर दे, हुनके हुनचो नाव चो लागुन पापमन चो छमा मिरे दे। गयर यहूदिमन चो उपरे पवितर आत्मा चो उतरतोर 44 पतरस ऐ गोठमन बोलते ची रलो कि पवितर आत्मा बचन चो सपाय सुनतो बितामन उपरे उतरली। 45 आउर जितरो खतना करलोर बिश्वासी पतरस चो संगे ऐऊन रवत, हुनमन सपाय चकित होला कि दुसर जातिमन उपरे बले पवितर आत्मा चो बर उँढ़ेला गेली से 46 कसनबल्लोने हुनमन हुनके बरन-बरन चो भाषा बोलतोर आउर माहापुरू चो बड़ाई करतोर सुनला। ऐई थाने पतरस बल्लो, 47 “काय कोनी पानी चो रोक करूक सकु आय कि ऐ डूबन नी पाओत, जोनमन आमचो असन पवितर आत्मा पावला सोत?” 48 आउर हुन हुकुम दिलो कि हुनमन के ईशु मसीह चो नाव ले डूबन दिया जाओ। तेबे हुनमन हुनके गुहार करला कि हुन खिन्डिक दिन आउर हुनमन चो संगे रओ। |
Halbi Bible by The Love Fellowship is licensed under Creative Commons Attribution-ShareAlike 4.0 License.
Beyond Translation